Dilongesha dia 7
Malu akenzeka kale adi atudimuija
Yehowa kakulekela bantu babi banyanga Mparadizu to. Anu balunda bende ke basombamu. Ntshinganyi tshiafikila bantu babi? Bua kupeta diandamuna, angata bu tshilejilu, muyuki wa Noa. Noa uvua ne muoyo kukadi bidimu nkama mivule. Uvua muntu muimpe, dîba dionso uvua uditatshisha bua kuenza disua dia Yehowa. Kadi bantu bakuabu bavua pa buloba bavua benza malu mabi. Ke bua tshinyi Yehowa wakambila Noa ne: Uvua ne bua kulokesha mvula bua kubutula bantu babi abu bonso. Wakambila Noa bua kuenza buatu bua yeye ne dîku diende kabafu pavua Mvula wa kabutu ne bua kulua.—Genese 6:9-18.
Noa ne dîku diende bakenza buatu. Noa wakadimuija bantu ne: Mvula wa kabutu uvua ne bua kulua, kadi kabakamuteleja to. Bakatungunuka ne kuenza malu mabi. Kunyima kua buatu bumane kujika, Noa wakabuejamu nyama; yeye ne dîku diende bakabuelamu pabu. Pashishe Yehowa wakatuma mvula mukole. Mvula wakaloka munya ne butuku munkatshi mua matuku 40. Mâyi akuula pa buloba bujima.—Genese 7:7-12.
Bantu babi bakafua, kadi Noa ne dîku diende bakapanda. Yehowa wakabapandisha ku Mvula wa kabutu ne kubateka pa buloba buvua kabutshiyi ne bubi. (Genese 7:22, 23) Bible udi wamba ne: dîba didi dilua dikala Yehowa mua kubutula kabidi bantu badi babenga kuenza malu makane. Kakubutula bantu badi benza malu mimpe to. Neabapeshe muoyo wa tshiendelele mu Mparadizu pa buloba apa.—2 Petelo 2:5, 6, 9.
Bantu ba bungi badi benza malu mabi lelu. Buloba mbûle ne malu mabi. Yehowa udi utuma Bantemu bende njila ne njila bua kudimuija bantu, kadi ba bungi ki mbasue kuteleja mêyi a Yehowa to. Ki mbasue kushintuluka to. Ki mbasue kuitaba tshidi Nzambi wamba bua malu makane ne malu mabi to. Ntshinyi tshienzekela bantu babi aba? Nebashintulukeku dimue dituku anyi? Ba bungi kabakushintuluka nansha. Tshikondo tshidi tshilua tshiabutulabu bantu babi ne tshikalabu kabatshiyi kabidi ne muoyo to.—Musambu 92:7.
Kabakubutula buloba to; nebabukudimune mparadizu. Bantu badi bashala balunda ba Nzambi nebikale ne muoyo wa kashidi mu Mparadizu pa buloba apa.—Musambu 37:29.