Dilongesha 6

Mparadizu ukadi pabuipi

Malu mabi adi enzeka pa buloba lelu adi aleja ne: Mparadizu ukadi pabuipi. Bible wakamba ne: malu avua ne bua kukola kumpala kua Mparadizu kuluaye. Tudi tumona malu au lelu’eu. Tangila amue malu avua Bible muambe ne: avua ne bua kuenzeka:

Mvita minene. ‘Tshisamba tshikuabu netshiluangane ne tshinga, bukalenge bukuabu nebuluangane ne bunga.’ (Matayo 24:7) Mulayi eu ukadi mukumbane. Kubangila mu 1914, nkuenzeke mvita ibidi ya buloba bujima ne mvita mikuabu ya mikese-mikese ya bungi. Ne bantu miliyo ya bungi mbafue mu mvita eyi.

Masama a bipupu. Kuvua ne bua kumueneka ‘masama a bipupu mu nseke ne nseke mishilangane.’ (Luka 21:11, Muanda Mulenga Lelu) Bualu ebu mbuenzeke anyi? Eyowa. Disama dia kansere, dia mioyo, dia tshiadi, dia SIDA, malariya ne makuabu masama mbishipe bantu miliyo ne miliyo.

Biyole bia nzala. Kudi bantu pa buloba apa badi ne biakudia anu bikese. Nzala idi ishipa bantu miliyo mivule tshidimu tshionso etshi. Bualu ebu ntshimanyinu tshikuabu tshidi tshileja ne: Mparadizu ukadi pabuipi. Bible udi wamba ne: “Biyole bia nzala nebibuele.”—Mâko 13:8, Mukanda wa Mvidi Mukulu.

Bikumina. “Bikumina nebienzeke miaba ne miaba.” (Matayo 24:7, MMM) Bualu ebu kabidi tudi tubumona mu tshikondo tshietu etshi. Bikumina mbishipe bantu bapite muliyo mujima katshia mu 1914.

Benji ba malu mabi. Bantu bavua ne bua kuikala “banangi ba biuma” ne “badisui.” Bavua ne bua kuikala ‘banangi ba masanka, kabayi banangi ba Nzambi.’ Bana bavua ne bua kuikala ‘kabayi batumikila mêyi a baledi babu’ to. (2 Timote 3:1-5) Kuenaku mumone ne: bantu ba mushindu’eu badiku lelu’eu anyi? Kabena banemeka Nzambi to; badi bakengesha mene nansha bantu badi bajinga kumanya Nzambi.

Dibunda bilumbu. Kuvua ne bua kuikala kabidi “divulangana dia bubi.” (Matayo 24:12, MMM) Pamu’apa udi mujadike ne: bantu mbabunde bilumbu binene kupita muvuabi bidimu bishale. Miaba yonso bantu badi ne buôwa bua se: badi mua kubiba bintu, kubashima peshi kubenzela bibi.

Malu onso aa adi aleja ne: Bukalenge bua Nzambi bukadi pabuipi. Bible udi wamba ne: ‘Panuatangila malu aa alua, numanye bienu ne: Bukalenge bua Nzambi budi pabuipi.’ (Luka 21:31) Bukalenge bua Nzambi ntshinganyi? Mmbulamatadi wa Nzambi udi mu diulu walua kuvuija buloba ebu Mparadizu. Bukalenge bua Nzambi nebupingane pa muaba wa mbulamatadi ya bantu.—Danyele 2:44.