Nsombelu mulenga​—Mu katupa kîpi emu!

FUANYIKIJA ne: malu madianjila kumanyisha kudi kamona-kamba kampanda wa muamueneka kuulu atu misangu yonso enzeka. Biadianjilaye kumanyisha mu ngumu ya dilolo ne: mvula nealoke dituku didi dilonda, kuena welakana bua kupatuka ne dikumbi diebe paudi umbuka ku nzubu dinda didi dilonda. Lumu luende lua kale ludiye mudiendeshile ndukupeteshe dieyemena. Udi wenza malu mu diumvuangana ne bidiye wamba.

Mpindieu, mmunyi mudi dilaya dia Yehowa dia nsombelu mulenga pa buloba bua mparadizu diakanyine dieyemena? Ee, ntshinyi tshidi lumu luende lua kale ludiye mudiendeshile luleja? Dikumbana dia milayi ya Bible didi dijadika patoke lumu lua Yehowa. Udi Nzambi wa bujalame ne bulelela bukena butupakana. (Yoshua 23:14; Yeshaya 55:11) Malaya a Yehowa mmatambe kuakanyina dieyemena; ke bua tshinyi imue misangu udi wakula bua malu malaya atshilualua anu bu mamane kukumbana. Tshilejilu, pa kutungunuka ne dilaya diende dia bulongolodi bupiabupia muikala lufu ne madilu kabitshiyimu kabidi, tudi tubala ne: “Akumbanyi [mabenesha malaya]!” Mu miaku mikuabu, “Alu bulelela!”​—Buakabuluibua 21:5, 6, NW, note kuinshi kua dibeji.

Eyowa, dikumbana dia malaya a Yehowa a kale didi ditupetesha dieyemena mu dikumbana dia dilaya diende dia nsombelu mulenga bua bukua-bantu. Kadi ntshikondo kayi tshialua nsombelu eu mulenga?

Nsombelu mulenga​—Tshikondo kayi?

Nsombelu mutambe bulenga nealue mu tshitupa tshîpi emu! Tudi mua kuikala ne dishindika pa bualu abu bualu Bible udi wamba ne: malu mavule mabi avua ne bua kuenzeka pa buloba kumpala kua diunzuludibua dia njila wa nsombelu mulenga mu Mparadizu. Malu mabi aa adi enda enzeka mpindieu.

Tshilejilu, Yezu Kristo wakadianjila kumanyisha ne: nekuikale mvita minene. Wakamba ne: “Ditunga dimue nediluishe dikuabu, bukalenge bumue nebuluishe bukuabu.” (Matayo 24:7, NW) Mulayi eu mmukumbane. Mu kupita kua bidimu bidi pankatshi pa 1914 ne 1945, kuvua mvita ibidi ya pa buloba bujima, ne yakalondibua kudi mvita mikuabu mivule mudi matunga maluishangane dimue ne dikuabu. “Muayene udi uleja ne: ku tshidimu bu tshionso, bungi bua bafue mu mvita mu tshikondo etshi [biangatshile ku dibudika dia Mvita II ya Buloba bujima] mbuvule misangu mipite pa ibidi bungi bua bafue mu siekele wa 19 ne misangu muanda-mutekete kupita mu siekele wa 18.”​—World Military and Social Expenditures 1993.

Ditangalaka dia masama ntshijadiki tshikuabu tshia disemena pabuipi dia nsombelu mulenga mu Mparadizu. Yezu wakadianjila kumanyisha ne: nekuikale ‘bipupu ku nseke ne ku nseke.’ (Luka 21:11) Mulayi eu mmukumbane anyi? Eyowa. Kunyima kua mvita ya kumpala ya pa buloba bujima, disama dia grippe espagnole diakashipa bantu bapite pa miliyo 20. Bituadijile ku tshikondo atshi, kansere, disama dia mutshima, malaria, SIDA, ne masama makuabu mbishipe miliyo ya bantu. Mu matunga adi enda ashidimuka, masama makebesha kudi mâyi manyanguke (adi akonga diupa munda ne mabedi a ku misanda ya mu mala) adi ashipa miliyo ya bantu tshidimu tshionso.

Yezu wakamba kabidi ne: “biyole bia nzala nebibuele.” (Matewuse 24:7, MMM) Anu bu mutuvua babimone mu tshiena-bualu tshishale, bapele ba pa buloba kabena ne biakudia bivule. Etshi ntshijadiki tshikuabu tshia se: nsombelu mutambe bulenga mu Mparadizu udi ne bua kulua mu katupa kîpi emu.

“Bikumina bikole nebienzeke,” ke muakamba Yezu. (Lukase 21:11, MMM) Muanda eu mmukumbane pawu mu tshikondo tshietu etshi. Biangatshile ku 1914 dinyanga dienza kudi bikumina bibutudi ndishipe nkama ya binunu ya bantu.

Bible udi usakidila ne: “matuku a kunshikidilu” neikale masunguluja ku dishintuluka munkatshi mua bantu. Nebikale “badisui” ne “banangi ba biuma,” ne bana kabakuikala “batumikila mei a baledi babo.” Mu tshibungi bantu nebikale “banangi ba masanka kabai banangi ba Nzambi.” (2 Timote 3:1-5) Kuenaku witaba ne: bavule badi bakumbaja diumvuija edi anyi?

Bu mudi bantu bavulavulayi benza malu mabi, kudi divulangana dia dipetula dia mikenji. Nsombelu eu bakavua kabidi badianjile kumumanyisha. Bilondeshile Matayo 24:12 (NW), Yezu wakakula pa bidi bitangila “divula dia dipetula dia mikenji.” Pamu’apa newitabe ne: dibunda dia bibawu ndivule kupita muvuadi bidimu bishale. Bantu muaba kayi wonso badi batshina se: badi mua kulua kubiba, kubadinga, anyi kubenzela bibi mu mushindu kampanda.

Mvita, ditangalaka dia masama, biyole bia nzala, bikumina, divulangana dia dibunda dia bibawu, ne dishintuluka dibi dia malanda munkatshi mua bantu​—bionso ebi bidi bimueneka patoke matuku adi panshi aa, anu bu muakadianjila kumanyisha Bible. ‘Kadi malu aa kaena wonso menzeke mu kupita kua muyuki wa bantu anyi?’ ke mûdi pamu’apa mua kuebeja. ‘Ndishilangana kayi didiku ne matuku etu aa?’

Kudi imue ngikadilu ya pa buayi ya tshidi tshienzeka matuku aa. Bible kêna wamba ne: bualu kampanda, bu mudi biyole bia nzala, nebuikale pa nkayabu tshijadiki tshia se: tudi mu tshikondo tshia ku nshikidilu ne se: nsombelu mulenga ukadi pabuipi. Milayi ya mu Bible pa bidi bitangila tshikondo tshia ku nshikidilu ivua ne bua kukumbana pa tshipungu kampanda tshikena ne bulamatshi kudi Nzambi.​—Matayo 24:34-39; Luka 17:26, 27.

Kupita apu, bidi bikemesha bikole pa kumona se: amue malu a mu mulayi wa Yezu​—nangananga aa adi atangila biyole bia nzala ne dimuangalaka dia masama—​adi enda akumbana matuku adi panshi aa. Mbua tshinyi? Bualu majandula a sianse a lelu’eu mmatambe a kale bunene. Dimanya mu malu a luondapu ne mishindu ya ngondapilu bia lelu’eu mbitambe kulubuluka anyi kutangalaka kupita kale. Anu Nzambi ke uvua mua kudianjila kumanyisha mu Dîyi diende, Bible, ne: mu tshikondo tshia mushindu’eu, masama ne nzala nebivule, kabiakukepela to.

Bu mudi milayi yonso ya mu Bible idi itangila tshikondo etshi tshia ku nshikidilu, anyi “matuku a kunshikidilu,” yenda ikumbana, ntshinyi tshitudi mua kukomesha? Se: nsombelu mulenga ukadi pabuipi! Kadi mmunyi mualuaye?

Nsombelu mulenga​—Mushindu kayi?

Udiku wela meji ne: bantu badi mua kuenza bua ne Mparadizu alue anyi? Mu kupita kua miyuki ya bantu too ne ku lelu, kuvua ne kudi mishindu mivule ya mbulamatadi ya bantu. Imue mmienze madikolela mavule bua kukumbaja bidi bantu bakengela. Kadi, ntatu mivule idi yenda ikola. Mu matunga mabanji ne mu matunga mapele, mbulamatadi idi iluangana bua kujikija ditumika dibi ne bintu bia lulengu, bizubuzubu, bupele, dibunda dia bibawu, bulofua, ne mvita.

Nansha mudi mbulamatadi mua kujikija imue ya ku ntatu eyi, kayena nansha kakese mua kupetesha budikadidi bulelela ku masama; nansha kujikija bukulakaje ne lufu. Mbimueneke patoke se: nansha bia munyi bantu kabakulua kuvuija Mparadizu pa buloba ebu to.

Ne meji wonso Bible udi wamba ne: “Kanueyemenyi baminyampala, anyi muana wa muntu, unudi kanuyi mua kusangana dikuatshisha kudiye.” Nunku, nnganyi utudi ne bua kueyemena? Bible udi wandamuna se: ‘Disanka didi kudi muntu udi ne dikuatshisha diende kudi Nzambi wa Yakoba, udi ne ditekemena diende mu Yehowa Nzambi wende.’ (Musambu wa 146:3, 5) Bituateka ditekemena dietu mudi Yehowa Nzambi, katuakuedibua mâyi ku mikolo nansha kakese.

Bushuwa Eu údí ne meji ne bukole bua kufuka buloba, dîba, ne mitoto udi kabidi mua kuvuija buloba mparadizu. Udi mua kupetesha bantu mushindu wa kulabula nsombelu mulenga. Tshionso tshidi Yehowa Nzambi ukana bua kuenza, udi mua kutshikumbaja ne neatshikumbaje. Dîyi diende didi diamba ne: “Kakuena dî dimue dia Nzambi didi kadî ne bukole.” (Luka 1:37) Kadi mmunyi mualua Nzambi kupetesha nsombelu mulenga?

Yehowa neatuadile bukua-bantu nsombelu mutambe bulenga ku diambuluisha dia Bukalenge buende. Ne Bukalenge bua Nzambi ntshinyi? Mmbulamatadi mulelela udi ne Mulombodi muteka kudi Nzambi, Yezu Kristo. Bukalenge bua Nzambi budi mu diulu, kadi mu katupa kîpi emu nebutuadile basombi ba mu Mparadizu wa pa buloba mabenesha a mpatshi ne nsombelu mutambe buimpe.​—Yeshaya 9:6, 7.

Ukadi pamu’apa mumane kuibidilangana ne disambila dia tshitembelu dia Yezu, didi disanganyibua mu Bible mu Matayo 6:9-13. Tshitupa tshia disambila adi kudi Nzambi tshidi tshiamba ne: ‘Bukalenge buebe bulue. Benze pa buloba mûdi musue bu mudibo benza mu diulu.’ Mu diumvuangana ne disambila adi, Bukalenge bua Nzambi “nebulue” bua kukumbaja dilongolola dia Yehowa Nzambi bua buloba. Ne dilongolola diende ndia se: buloba bulue mparadizu.

Lukonko lua ndekelu ludi lujuka: Ntshinyi tshiudi ne bua kuenza bua kulabula nsombelu mulenga mu Mparadizu utshilualua?

Tshiudi ne bua kuenza

Yehowa Nzambi udi ne dinanga dionso uteka kumpala kua yonso udi wenza disua diende ditekemena dia nsombelu mulenga mu Mparadizu. Bible udi utulondela ne: “Bantu bakane nebapiane buloba, ne nebasombepu tshiendelele.” (Musambu wa 37:29, NW) Kadi ntshinyi tshidi tshivuija muntu muakane ku mêsu kua Yehowa?

Bua kusankisha Yehowa tudi ne bua kumanya bivule pa bidi bitangila tshidiye musue bua tuenze. Bitualonga dimanya dia Nzambi ne kuditumikila mu nsombelu yetu, tudi mua kuikala ne muoyo wa kashidi. Mu disambila kampanda kudi Nzambi, Yezu wakamba ne: ‘Etshi tshidi tshiumvuija muoyo wa kashidi: bapete dimanya diebe, Nzambi umu’epele mulelela, ne eu uwudi mutume, Yezu Kristo.’​—Yone 17:3, NW.

Mukanda ùdì utulondela malu adi atangila Yehowa Nzambi ne Yezu Kristo n’Dîyi dia Nzambi, Bible. Udi dimue dia ku mapa a mushinga mutambe bukole a kudi Yehowa. Bible mmufuane mukanda mufumine kudi tatu wa dinanga mutumina bana bende. Udi utulondela malu adi atangila malaya a Nzambi bua kutuala nsombelu mulenga bua bukua-bantu ne utuleja mushindu utudi mua kumupeta. Bible udi utuleja tshidi Nzambi muenze mu tshikondo tshishale ne tshienzaye mu matuku atshilualua. Udi kabidi utupetesha mibelu mikuatshishi pa bidi bitangila mushindu wa kupita biakane ne ntatu yetu mpindieu. Bushuwa, Dîyi dia Nzambi didi ditulongesha mushindu wa kupeta ndambu wa disanka nansha mu bulongolodi ebu busaluke.​—2 Timote 3:16, 17.

Ne disanka dionso Bantemu ba Yehowa nebakulongoluele dilonga dia Bible dikena dilomba mfranga. Longa mûdi mua kuikala ne nsombelu wa disanka ditambe bunene mpindieu, ne ditekemena dia nsombelu mutambe bulenga mu matuku makese atshilualua.

[Tshimfuanyi mu dibeji 5]

Milayi ya mu Bible idi ileja ne: nsombelu mulenga ukadi pabuipi

[Tshimfuanyi mu dibeji 7]

Bukalenge bua Nzambi nebunzulule njila wa dibuela mu nsombelu mulenga bua bukua-bantu