Nsombelu mulenga mmulaya

NEUSUEKU kuikala muepula ku ntatu idi ikolesha nsombelu anyi? Udiku musue kusombela mu bulongolodi mudi nsombelu mulenga mufuane eu udi mu tshimfuanyi tshileja pa bizubu pa mpala ne munyima mua tshibejibeji etshi anyi? Tangila biakane tshimfuanyi atshi. Bantu badi ne biakudia bivule. Nebalabule bulelela biakudia abi bishême. Muntu yonso udi ne disanka. Bantu bena bisa bishilangane mbasombe mu ditalala umue ne mukuabu. Nansha mene nyama idi misombe mu ditalala! Muntu nansha umue kêna uluangana mvita. Muntu nansha umue kêna mupele. Muntu nansha umue kêna usama. Kudi miaba milenga, mitshi mimpe, ne mâyi makezuke, a makenda. Mmuabapu kayi wa mpatshi!

Buloba ebu nebuikale dituku kampanda mushindu au anyi? Eyowa, nebuikale mparadizu. (Luka 23:43) Nzambi, wakafùka buloba, mmulongolole bua se: bantu balabule nsombelu mulenga pa buloba bua mparadizu. Ne udi pebe mua kuikala muaba au!

Nsombelu kayi uwasungula?

Mmushindu kayi wikala Mparadizu wa pa buloba utshilualua eu mushilangane ne bulongolodi ebu mutudi basombele mpindieu? Mu matuku adi panshi aa, bantu bapite pa muliyare mujima mbavuambula kudi nzala dituku dionso. Kadi mu Mparadizu udi Nzambi mulongolole bua buloba, muntu yonso neikale ne biakudia bivule. Bible udi ulaya ne: ‘Yehowa wa misumba nealongoluele bantu bonso bidia bia disanka bia manyi, bidia bia disanka bia mvinyo muladika ndala.’ (Yeshaya 25:6) Biakudia kabiakupangika, bualu Bible udi wamba ne: ‘Blé neyikale mivule pa buloba, tô ne pa mitu ya mikuna.’​—Musambu wa 72:16.

Lelu’eu, bavule mbasombele mu bizubuzubu, anyi badi baluangana bua kufutshila nzubu. Bakuabu kabena ne nzubu ne batu balala pambelu. Bilondeshile Organisation mondiale de la santé, pa buloba bujima kudi bana batue ku miliyo 100 bakena nzubu. Kadi mu Mparadizu utshilualua, muntu yonso neikale ne nzubu wabikidibua ne: nkuende. Dîyi dia Nzambi didi diamba ne: ‘Nebase nzubu, nebashikamemu; nebatentule mionji ya tumuma tua mvinyo mu madimi, nebadie tumuma tuayi.’​—Yeshaya 65:21.

Bavule badi batata bikole ku midimu idibu kabayi banange. Pa tshibidilu batu benza mudimu mukole munkatshi mua mêba mavule kadi bapeta anu bikese bu difutu. Pabuipi ne muntu 1 pa 5 pa buloba bujima udi udikuatshisha ne difutu dikepele ku dolare 500 ku tshidimu. Kadi, mu Mparadizu utshilualua, bantu nebapete masanka ku mudimu wabu ne nebamone bipeta bimpe biafuminaku. Nzambi udi ulaya ne: ‘Bantu bangakasungula nebasanke musangu mule mu mudimu wa bianza biabo. Kabena bakuata mudimu wabu patupu.’​—Yeshaya 65:22, 23.

Mpindieu bubedi ne masama bidi miaba yonso. Bavule badi bafofo. Bamue mbena mapàpà. Bakuabu kabena mua kuenda. Kadi mu Mparadizu, bantu nebikale bepula ku bubedi ne masama. Yehowa udi wamba ne: “Muena ditunga nansha umue kakuamba ne: ‘Ndi nsama.’” (Yeshaya 33:24, NW) Pa bidi bitangila aba bakâdi ne bulema, dilaya dìdì dilenga ku muoyo didi: ‘Mu dituku adi mesu a mufofo neatabale, matshi a badi ne mapàpà neajikuke. Mu diba adi muntu mulema neatupike bu ngulungu [mulume], ludimi lua kamama neluimbe misambu.’​—Yeshaya 35:5, 6.

Matuku adi panshi aa kudi makenga ne bisama, dibungama ne lufu. Kadi mu Mparadizu pa buloba, malu wonso au kaakuikalaku nansha. Eyowa, nansha lufu nelujimine! Bible udi wamba ne: “Nzambi yeye muine neikale nabu. Ne neakupule tshinsonji tshionso ku mêsu kuabo, ne lufu kaluakuikalaku kabidi, nansha madilu, nansha mbila, nansha bisama kabiakuikalaku kabidi. Bintu bia kale biajiminyi.”​—Buakabuluibua 21:3, 4, NW.

Nunku, mbimueneke patoke se: Mparadizu wa pa buloba mulaya kudi Yehowa neumvuije nsombelu mulenga bua bukua-bantu. Kadi mmunyi mutudi mua kuikala ne dishindika se: nealue? Ntshikondo kayi tshialuaye, ne mmunyi? Ntshinyi tshiudi ne bua kuenza bua kuikala muaba au?