Mparadizu pa buloba

Bantu ba makoba mashilangane badia pamue mu Mparadizu

Yehowa neumushe bubi buonso buvua Satana muenze. Yehowa mmuvuije Yezu Mukalenge pa buloba bujima. Muinshi mua bukokeshi buende, buloba nebukudimunyibue mparadizu.—Danyele 7:13, 14; Luka 23:43.

Yehowa udi ulaya malu aa:

BIA KUDIA BIPITE BUNGI: “Buloba buine nkayabo nebupatule bintu biabo; Nzambi, Nzambi wetu, neatubeneshe.” “Ntete ya kudia neyivule pa buloba; ne pa nsongo ya mikuna nepikale biakudia bivule.”—Misambu 67:6; 72:16.
MVITA KAYAKUIKALAKU KABIDI: “Vuayi, numone midimu idi Yehowa muenze, mudiye muenze mianda ya dikema pa buloba. Mmukose mvita too ne ku ntengu ya buloba.”—Musambu wa 46:8, 9.
BANTU BABI KABAKUIKALAKU KABIDI: “Bua bantu babi, nebajimijibue . . . Ne mu tshikondo tshîpi, muntu mubi kena wikalaku kabidi; neukebe muaba wende, kena wikalaku kabidi.”—Musambu wa 37:9, 10.
MASAMA, TUNYINGANYINGA, ANYI LUFU KABIAKUIKALAKU KABIDI: “Mu tshikondo atshi, mesu a bafofo neabuluibue, ne matshi a bena mapapa neajikuke. Mu tshikondo atshi muntu mulema neatupike bu ngulungu, ne ludimi lua kamama neluele mbila ya disanka.”—Yeshayi 35:5, 6.

“Ne Nzambi yeye muine neikale nabo. Neakupule binsonji bionso ku mesu kuabo, ne lufu kaluena luikalaku kabidi, nansha madilu, nansha muadi, nansha kanyinganyinga kabiakuikalaku kabidi. Bintu bia kale biamanyi kujimina.”—Buakabuluibua 21:3, 4.

Bishilangane ne Satana ne bademon bende, Yehowa katu ushima nansha kakese. Tshintu tshionso tshidiye ulaya tshidi tshikumbana. (Luka 1:36, 37) Yehowa mmukunange ne udi ujinga bua wewe kuikala ne muoyo mu Mparadizu wenzaye mu matuku atshilualua. Nenku, keba mua kumonangana ne Bantemu ba Yehowa bua kulonga bia bungi pa malelela adi asanganyibua mu Dîyi dia Nzambi. Wewe mutumikile bulelela mu nsombelu webe, neupatuke mu bupika bua mashimi, bitabataba, ne dipanga. Pashishe, neupatuke mu bupika bua mpekatu ne lufu. Anu muvua Yezu muambe: “Nenumanye bulelela, ne bulelela nebunupikule.”—Yone 8:32.