Dilongesha dia 17

Bua kulama bulunda ne muntu, ikala pebe mulunda

Dinanga didi dikolesha bulunda. Paudi umanya malu a Yehowa a bungi, udi ufika ku dimunanga bikole. Padi dinanga diebe dia Nzambi dikola, dijinga diebe dia kumuenzela mudimu nedikole padi. Dijinga edi nedikusake bua kulua muyidi wa Yezu Kristo. (Matayo 28:19) Wewe mulamate dîku dia disanka dia Bantemu ba Yehowa, neushale mulunda wa Nzambi tshiendelele. Kadi ntshintu kayi tshiudi ne bua kuenza?

Utumikile mikenji ya Nzambi bua kumuleja ne: udi mumunange. ‘Bua edi ndinanga dia Nzambi, bua tuetu tutumikile mikenji yende; ne mikenji yende kayena itunemena bujitu.’—1 Yone 5:3.

Utumikile malu audi ulonga. Yezu wakalonda muyuki udi umvuija bualu ebu. Muena meji wakibakila nzubu wende pa dibue. Mubule lungenyi yeye wakibakila wende nzubu mu lusenga. Pakalua mvula wa tshipepele tshikole, nzubu uvuabu bibakile pa dibue kakupuka to, kadi eu uvuabu bibakile mu lusenga wakupuka ne mukuma mukole menemene. Yezu wakamba ne: bantu badi bateleja malongesha ende ne baatumikila mbafuane muena meji uvua muibakile nzubu wende pa dibue. Kadi bantu badi bateleja malongesha ende ne kabayi baalonda mbafuane muntu mubule lungenyi wakibakila nzubu wende mu lusenga. Mmuntu kayi uudi musue kufuana?—Matayo 7:24-27.

Didilambula. Mbuena kuamba ne: udi wambila Yehowa mu disambila ne: udi musue kuenza malu adiye munange amu pa wowu. Paudi wenza disua dia Nzambi udi uleja muudi muyidi wa Yezu Kristo.—Matayo 11:29.

Batismo. ‘Bika, ubatijibue, uvuibue ku mibi yebe, ubikila dîna diende.’—Bienzedi 22:16.

Udifile mu mudimu wa Nzambi ne muoyo mujima. ‘Malu onso anudi nuenza, nuenze ne mitshima yenu bu munudi nuenzela Mukalenge; ke mbu munudi nuenzela bantu’ to.—Kolosai 3:23.