Dilongesha dia 16

Leja ne: udi munange Nzambi

Bua kulama bulunda ne muntu, udi ne bua kuikala uyikila nende. Udi umuteleja ne yeye pende ukuteleja. Udi kabidi wambila bantu bakuabu malu mimpe a mulunda webe eu. Ke mudibi bua muntu udi bulunda ne Nzambi. Mona mudi Bible wamba:

Ikala uyikila ne Yehowa pa tshibidilu mu masambila. “Nunanukile mu disambila.”—Lomo 12:12, MMM.

Ikala ubala Dîyi dia Nzambi (Bible). ‘Dîyi dionso dia mu Mukanda wa Nzambi didi difume munda mua Nzambi bu mupuya wende, ne didi ne mudimu muimpe wa kuyisha bantu, ne wa kubabela, ne wa kubalongesha.’—2 Timote 3:16.

Longesha bakuabu malu a Nzambi. ‘Yayi bienu, nuvuije ba bisamba bionso bayidi, nubayishe mua kuenza malu onso angakanuambila.’—Matayo 28:19, 20.

Ikala mulunda wa balunda ba Nzambi. “Udi wenda ne bena meji udi ulua muena meji.”—Nsumuinu 13:20.

Ikala ubuela mu bisangilu ku Nzubu wa Bukalenge. “Tuvulukanganayi bua kukoleshangana mitshima bua kutamba kunanga ne kuenza malu mimpe. Katulekedi mua kubuela mu bisangilu bietu; . . . tukoleshanganayi mitshima.”—Ebelu 10:24, 25, MML.

Tufilayi mapa bua mudimu wa Bukalenge uya kumpala. ‘Muntu ne muntu afile bintu bu muakadisunguilaye mu mutshima wende; kafidi ne kanyinganyinga, anyi bu muenzeja ku bukole; bualu bua Nzambi udi musue muena kupa udi ufila ne disanka.’—2 Kolinto 9:7.