Dilongesha dia 1

Nzambi mmusue bua ulue mulunda wende

Nzambi mmusue bua wikale mulunda wende. Ukadiku muele meji ne: dimue dituku udi mua kulua mulunda wa Muntu mutambe bunene mu diulu ne pa buloba anyi? Bakabikila Abalahama (muntu wa kalekale) ne: mulunda wa Nzambi. (Yakobo 2:23) Bantu bakuabu badibu batele mu Bible bavua pabu balunda ba Nzambi ne bakapeta mabenesha a bungi. Lelu’eu kabidi, bantu ba miaba yonso ya pa buloba mbalue balunda ba Nzambi. Ne wewe pebe udi mua kulua mulunda wa Nzambi.

Bulunda ne Nzambi mbupite bulunda ne muntu. Nzambi katu ufuisha balunda bende ba lulamatu bundu to. (Musambu 18:25) Kuikala mulunda wa Nzambi nkupite kuikala ne biuma. Padi mubanji ufua, bubanji buende budi buya kudi bantu bakuabu. Kadi, bantu badi badie bulunda ne Nzambi badi ne biuma bidi muntu mukuabu kayi mua kubanyenga to.—Matayo 6:19.

Bamue bantu badi mua kukeba bua kukulekesha dilonga malu a Nzambi. Nansha bamue balunda ne balela bebe badi mua kukeba mua kukupumbisha. (Matayo 10:36, 37) Bikala bantu bakuabu bakuseka anyi bakukanyina, mbimpe udiebeje ne: ‘Nnganyi undi musue kusankisha: mbantu anyi? peshi n’Nzambi?’ Anji teta kuelabi meji: Biakuambila muntu bua kulekela didia biakudia, udi mua kuitaba anyi? Tòo, kuakuitaba to! Bualu, bua wewe kuikala ne muoyo, bidi bikengela kudia. Kadi Nzambi yeye udi mua kukupesha muoyo wa tshiendelele. Nanku, kuitabi bua muntu nansha umue akupangishe mua kulonga bua kumanya mushindu uudi mua kulua mulunda wa Nzambi!—Yone 17:3.