Dilongesha dia 15

Balunda ba Nzambi badi benza malu mimpe

Wewe muikale ne mulunda uutu wanyisha ne unemeka, neukebe bua kumuidikija. Bible udi wamba ne: “Yehowa udi muimpe ne muakane.” (Musambu 25:8) Bua tuetu kuikala balunda ba Nzambi, tudi ne bua kuikala tuenza malu mimpe ne makane. Bible udi wamba ne: ‘Nunku nuidikije kuenza mudi Nzambi wenza, bu bana bende bananga.’ (Efeso 5:1, 2) Mona imue mishindu ya kumuidikija:

Wikale wambuluisha bakuabu. ‘Tuenzelayi bantu bonso bimpe.’—Galatia 6:10.

Enza mudimu mukole. “Muntu uvua wiba, kibi kabidi, kadi aditatshishe bua kukuata mudimu ne bianza biende bua amone mua kuenzela bakuabo bimpe.”—Efeso 4:28, MMM.

Wepuke bukoya bua mubidi ne wikale ne bikadilu bilenga. ‘Tudilengeje ku manyanu onso a mubidi ne a nyuma, tukumbaje tshijila tshietu mu ditshina dia Nzambi.’—2 Kolinto 7:1.

Unange bena mu dîku diebe ne ubanemeke. ‘Mulume ne mulume anange mukaji wende bu mudiye udinanga; ne mukaji anemeke bayende. Bana, tumikilayi baledi benu.’—Efeso 5:33–6:1.

Unange bantu bakuabu. “Tunangangane, bualu dinanga didi difume kudi Nzambi.”—1 Yone 4:7.

Unemeke mikenji ya ditunga. “Muntu yonso atumikile bamfumu ba ditunga . . . Nupingajile muntu yonso tshidi tshimuakanyine: nufute tshitadi kudi balambuishi ba bitadi.”—Lomo 13:1, 7, MMM.