Difundilangana mikanda
BANTU miliyo ne miliyo mbashintulule nsombelu ne bikadilu biabu anu bualu bavua babale mikanda ivuabu babafundile. Tshilejilu, mikanda ya bungi ya mu Mifundu ya tshiena-Greke ya Buena-Kristo ivua mikanda ivuabu bafundile bantu anyi bisumbu. Lelu’eu tudi mua kufunda mikanda bua kukolesha bena Kristo bapiabapia mu maboko, kuyikila ne balunda betu, kukankamija bana betu ba balume ne ba bakaji badi bapete midimu ya pa buayi, kukolesha mu mikolo bawetu badi bapete ntatu, ne kumanyisha malu adi tshisumbu nawu dijinga.—1 Tes. 1:1-7; 5:27; 2 Pet. 3:1, 2.
Difunda mikanda mmushindu muimpe wa kuyisha kabidi. Mu imue miaba, bamue bantu batu basombele mu misoko idi kule anyi mu bitupa bidibu bakandike bakuabu bantu bua kubuela. Peshi bitu bikole bua kupeta banga bantu ku mabu patutu tuyisha ku nzubu ne ku nzubu. Bakuabu batu kule menemene.
Imue misangu, bua disama, munya anyi mashika, peshi kuvrefe, kakutu mushindu wa kupatuka to. Udi mua kufundila mulanda webe peshi muntu uuvua muyishe mu mpukapuka mukanda bua kumuyisha anyi? Mulongi webe umue wa Bible mmumuangale anyi? Mukanda webe neumuambuluishe bua kutungukaye ne malu a Nzambi. Udi kabidi mua kufundila badi bafuishe, badi bafuma ku diselangana anyi ku dilela muana malu kampanda adi Bible wamba.
Mua kuyisha ne mikanda
Paudi ufundila muntu unutu kanuyi bamanyangane nende, wanji kudimanyisha. Udi mua kuamba ne: ndi ngenza mudimu utu bantu bavule benza pa buloba bujima ku budisuile. Pikalaku kakuyi bualu, wambe ne: ndi Ntemu wa Yehowa. Umvuije muntu tshiudi mumufundile mukanda pamutu pa wewe kulua kumutangila kuende. Funda anu bu udi wakula ne muntu mpala ne mpala. Kadi, bu mudi Yezu utulomba bua ‘tuikale ne budimu bu bua nyoka ne bu nyunyu ya nkutshi idi kayiyi iluishangana,’ ela meji bikole bua kumona malu adi akutangila audi mua kumumanyisha.—Mat. 10:16.
Funda malu auvua mua kuikala mumuambile bu wewe mumonangane nende. Udi mua kuakaja mbuelelu webe bilondeshile kakanda ka Mua kutuadija ne kutungunuka ne mayuki pa Bible (anyi mukanda wa Comment raisonner à partir des Écritures) anyi nimero wa Mudimu wetu wa Bukalenge mupiamupia. Udi mua kuela muntu lukonko ne kumulomba bua kuela meji. Bamue bamanyishi batu buobu bafunda ne: tudi balongolole bua kuandamuna nkonko ya malu a mu Bible kadi katuyi tufutshisha makuta to; pashishe udi mua kutela imue nshapita ya mu mikanda itutu tulonga nayi ne bantu. Mu dibeji dia 73, neusangane tshilejilu tshia mukanda wa nunku. Mukanda eu udiku anu bua kukupesha lungenyi patupu, kadi mbimpe kuikala kushintulula malu. Bua tshianana, bantu nebapete mikanda yamba malu anu amue amue.
Bamue bantu kabatu basue kubala mukanda wa muntu wa tshianana padiwu mule to; bitu bibatonda. Ke bualu kayi mbimpe mukanda wikale muipi. Udi mua kutuma kabidi: kabeji ka programe wenu wa bisangilu, trakte, broshire, peshi Tshibumba tshia Nsentedi anyi Réveillez-vous! ne kumuambila ne: udi mua kutuadija kupeta bibejibeji ebi pa tshibidilu. Udi kabidi mua kumuebeja ni kudi mushindu wa wewe kufika kuende bua kuyikila bia bungi.
Mushindu udi mukanda mua kuikala
Tangila mpindieu mukanda wa tshilejilu udi mu dibeji dia 73. Udi nenku: (1) Malu onso mmateka bimpe. (2) Nansha bu amvelope mua kujimina, dîna ne nimero ya kashete ka mikanda bia mufundi bidiku. (3) Kafundila ka mukanda nkaleja bimpe mu tshikoso tshia kumpala. (4) Lungenyi lunene luonso ludi mu tshialu tshikoso. (5) Mukanda kawena menemene bu mufundila mulunda wetu ne kawena bu mufundila mfumu wa mudimu.
Mu mikanda ya malu a midimu bu mudi udi sekretere wa tshisumbu ufundila biro bia filiale wetu, mudi dîna dia tshisumbu, dia sekretere nkayende, nimero ya kashete kende ka mikanda, ne matuku a ngondo. Mudi mua kuikala kabidi adrese ne dîna dia muntu anyi dia kumpanyi utudi tutumina mukanda. Muoyo udi ulonda. Ku ndekelu kua mukanda udi usangana mêyi bu mudi: “Muoyo. Ndi webe” ne “Angataku muoyo . . . wa kanemu” bilua kulonda kudi dîna diebe ne tshiala anyi sinyantire webe. Udi utua tshiala amu ne tshianza tshiebe nkayatshi.
Ufunde miaku bimpe, ulonde bimpe gramere anyi mikenji ya muakulu, wele tukoselu ne bitudilu pa muaba wabi, ne malu onso ikale malondangane biakane. Wewe mufunde nunku, nebakutue mushinga wewe ne mukanda webe.
Kupu muoyo nansha musangu umue bua kufunda adrese webe pa amvelope, nangananga wa ku poste. Wewe kuyi musue kupesha muntu uudi kuyi mumanye eu adrese webe, udi mua kuanji kulomba bakulu bua bakuitabile ufunde adrese wa tshisumbu peshi wa umue wa kudibu utu upeta mikanda. Wewe mudidinga mufunde adrese wa biro bietu, muntu udi mua kuela meji ne: mukanda au mmufumine ku biro bietu; nanku ki mbimpe kufunda adrese wa biro bietu to. Kabidi paudi utumina muntu mikanda yetu kadi kuyi mufunde adrese webe, muntu au udi mua kuela meji ne: biro bia Bantemu ba Yehowa ke bidi bimutumine mukanda; ki mbimpe nanku to.
Pawikale mumutumine nangananga mikanda yetu, usumbe ntembele ya ku poste mikumbane bilondeshile bujitu bua mikanda ayi. Bua tshianana poste neafutshishe muntu eu uudi utumina bintu ebi makuta. Bualu bukuabu: mu matunga a bungi, paudi utuma mukanda ne broshire anyi tshibejibeji, udi usumba ntembele ya mushinga mukuabu.
Mfundilu muakane
Ubalulule mukanda paudi uujikija. Udi umvuika bishi? Mmufunda ne bulenga ne bukalanga buonso anyi? Mbimpe mu mikanda muikale mumueneka ngikadilu bu mudi dinanga ne bulenga. (Gal. 5:22, 23) Paudi wangulamu tshintu tshibi, utshilongolole.
Mukanda udi mua kufika muaba uudi wewe kuyi mua kudiata to. Nanku mpindieu udi umvua bua tshinyi ntshia-mudimu tshinene tshia kuyisha natshi mu buambi. Ela meji bimpe bua malu audi ufunda, mudiwu umvuika ne amueneka, bualu mukanda udi uleja tshiudi ne malu audi munange. Mukanda udi mua kufila anu tshintu tshivua muntu natshi dijinga bua kubuela mu njila wa muoyo.