Kuakula kuyi wenda ubala

UDI mua kuikala muenze mudimu bikole bua kulongolola muyuki webe. Udi mua kuikala ne malu a nsongo. Ngenyi idi mua kuikala ilondangana bimpe. Udi mua kuenza muyuki webe kuyi ukukumina. Kadi pikala lungenyi lua bantu luonso kaluyi kuudi (bateleja amu ndambu bualu meji abu adi anji kuya kua tshianana), udi wela meji ne: muyuki webe neubambuluishe anyi? Pikalabi bibakolele bua kukuteleja, udi umona ne: muyuki webe eu neubatue ku muoyo anyi?

Tshilumbu tshidi mua kuikala penyi muaba eu? Kudi malu a bungi. Misangu mivule, bitu bua ditamba kutangila ne kujinga kubala malu atudi bafunde, peshi diakula malu mumakane. Malu aa atu afumina ku mushindu utudi balongolole muyuki.

Wewe muanji kufunda malu onso, pashishe kulua kuakepesha anyi kuavuija bu plan, bidi mua kukukolela bua kuakula mudilekelele kuyi wenda ubala. Bua tshinyi? Bualu ukadi musungule miaku ya kuakula nayi. Nansha wewe ne plan, newikale anu ukeba bua kuvuluka miaku ivua mu dibeji diebe dia ntuadijilu adi diuvua mufundile malu onso a kuamba. Malu mafunda onso kaatu mushindu umue ne a mututu tuakula matuku onso to. Ngakuilu webe neuleje bualu ebu bimpe.

Pamutu pa kufunda malu onso, utete kuenza mushindu udi ulonda eu: (1) Sungula tshiena-bualu ne malu anyi nseke minene yatshi bua kutshialabaja. Bua muyuki muîpi, malu manene abidi mmakumbane. Bua muyuki wa mule, anayi nansha atanu mmakumbane. (2) Muinshi mua bualu bunene buonso, funda mvese ya mushinga iwenza nayi mudimu; buejamu kabidi mifuanu ne bijadiki binene. (3) Ela meji muwabanga muyuki. Udi nansha mua kufunda mêyi a mbangilu mu tshiambilu tshimue anyi bibidi. Keba kabidi mua kulongolola nkomenu wa muyuki webe.

Kudilongolola kudi ne mushinga wa bungi. Kadi kulongolodi muyuki muaku ku muaku bua kuukuata mu mutu nansha. Bua kufika ku diakula kuyi ubala malu, mbimpe kulongolola ngenyi pamutu pa miaku. Pinganuna pa ngenyi eyi too ne paumvua ilondangana biakane mu lungenyi luebe. Pikala malu a mu muyuki webe malondangane bimpe ne malongolola bilenga, ngenyi neyidiluile nkayayi pawikala uwenza.

Tangila bipeta bimpe. Bulenga bua diakula mudilekelele kuyi wenda ubala budi ne: newakule mu mushindu mupepele udi bantu bumvua kakuyi lutatu. Muyuki webe newikale ne musangelu, neusankishe bantu.

Paudi wenza muyuki mushindu eu, udi utangilangana ne bantu bimpe, bikuambuluisha bua kumona mudibu badiumvua. Bu muudi kuyi utangila note yebe bua kuamba tshiambilu ku tshiambilu, bantu badi bamona ne: udi mumanye malu audi wamba ne udi uitaba bushuwa. Nunku, muyuki muenza mushindu eu mmulenga, uwenza bienza bu udi wakula ne bantu, ne udi ubalenga ku muoyo bikole.

Udi kabidi mua kushintulula malu. Tuambe tshilejilu ne: mu dinda dia dituku dia muyuki webe, bualu bunene kampanda budi buenzeka bumvuangana ne tshiena-bualu tshiebe. Bua tshinyi kubenga kububuejaku mu muyuki webe? Peshi paudi wenda wakula, udi umona se: mu bateleji amu mudi bana balongi ba bungi. Nebikale bilenga bia dikema bu wewe mua kuenza bua ne: bana aba bamone se: mifuanu ne malu audi wamba bidi bibatangila.

Bulenga bukuabu budi ne: lungenyi luebe ludi lukola. Bateleji buobu bikale ne dianyisha ne basanka, neupete musangelu ne newakule mutantshi pa amue malu anyi neuambulule mene. Paudi umona ne: bantu kabatshiena bakulonda, keba mushindu wa kuakaja malu pamutu pa kutungunuka anu ne kuakula mu lupepele.

Epuka mateyi. Tshidibi umanye se: kuakula nunku kutu paku ne aku mateyi. Bumue ndipitshisha dia dîba. Wewe mubueje ngenyi mipiamipia mipitepite bungi mu muyuki, dîba nedilue dikese. Bua kuenza bimpe, ufunde muntatshi udi tshitupa ne tshitupa tshia muyuki ne bua kunenga. Mpindieu unemeke muntatshi wa tshitupa ne tshitupa tshionso au.

Bukuabu buteyi (nangananga bua badi bapiluke mu dienza dia miyuki), ndidieyemena dia bungi. Bamue bakadi benzenze miyuki, badi bamona ne: badi mua kusangisha ngenyi lukasa lukasa ne kukumbaja minite mibakosela. Kadi didipuekesha ne divuluka ne: tudi mu ndongamu wa dilongesha bantu, ndongamu udi Yehowa muikale Mulongeshi Munene, nebitusake bua kulongolola mudimu wonso udibu batupesha bimpe, ne muoyo umue ne masambila.​—Yesh. 30:20; Lomo 12:6-8.

Ku lukuabu luseke, bapiabapia badi kabayi banji kuenzenza miyuki ya nunku badi batshina ne: netulue kupua malu atudi balongolole muoyo. Nansha nanku, kulekedi buôwa ebu bukupangisha mua kuela tshidia tshimpe etshi mu dienza miyuki to. Udilongolole biakane, ulombe Yehowa bua akuambuluishe ne nyuma wende.​—Yone 14:26.

Padi bakuabu baditatshisha bikole bua miaku, badi bapanga mua kuakula bilenga buobu kabayi benda babala bidibu bafunde. Eyowa, mu muyuki utubi bikengela kubala patupu, miaku mmisungula bimpe ne udi ulonda bimpe mikenji ya muakulu bishilangane ne wa kuakula kuyi wenda ubala bidi pa mabeji; kadi tshidibi, paudi kuyi wenda ubala mbimpe bitambe bualu udi ulenga mitshima ya bantu paudi wenda wakula bienze bu udi uyikila nabu. Bantu batu bumvua bimpe malu adibu babambila mu miaku idibu bamanye ne mu biambilu bipepele. Wewe mudilongolole bimpe, miaku ne biambilu nebidiluile bualu udi mutangilulule ngenyi yebe misangu ne misangu, kadi ki mbua ne: udi mubikuate mu mutu to. Ne kabidi, wewe wakula bimpe dituku dionso, newakule bimpe kabidi paudi wenza muyuki.

Malu a kufunda mu dibeji. Mu bungi bua matuku ne didibidija kabidi, newikale ufunda miaku mikese tshianana mu bualu bunene buonso bua muyuki webe. Udi mua kufunda miaku eyi ne mvese ya kuenza nayi mudimu mu kabeji kakese anyi mu dibeji dinene. Mudimu wa budimi utu ulomba kukuata plan mukese patupu mu mutu. Biwikala mukebulule malu bua kulua kuandamuna muntu, udi mua kufunda tu-malu mu kabeji ne kukela mu Bible. Anyi udi mua kuenza plan muashila pa kakanda ka Biena-bualu bia mu Bible bua kuyikila ne bantu peshi pa mukanda wa Comment raisonner à partir des Écritures.

Kadi wewe muikale ne midimu mivule (ne muyuki wa patoke kabidi) ya kuenza mu mbingu mikese tshianana, bidi mua kukulomba bua kuvudija malu audi ufunda. Bua tshinyi? Bua kuanji kuteka lungenyi mu malu ebe kumpala kua kuenza mudimu wonso. Nansha nanku, wewe weyemena bikole note yudi mufunde bua kumona miaku (uyitangila pa kuamba tshiambilu tshionso), neupangile bualu. Paudi ufunda bintu bia bungi, wenze tumanyinu bua kuela dîsu anu ku mvese ne ku miaku idi mienza bimanyinu ayi.

Nansha mudi bana betu bakadi bapiluke mu diela miyuki mua kutamba kuyenza kabayi benda babala bidi pa mabeji, kushintululaku ngakuilu pa imue miaba nkuimpe. Tshilejilu, bu mudi mbangilu ne nkomenu bilomba ditangila bantu ne ngakuilu mulenga, kudianjila kukuata biambilu bikese ebi mu mutu nkuimpe. Bitu bimpe kabidi kubala bijadiki, bishiferi, mêyi a bantu atudi tutela, peshi mvese bualu bidi bishindika, bifila bukole ku bitudi tuamba.

Padi bantu batulomba diumvuija. Imue misangu batu batulomba bua kumvuija malongesha etu kabayi batupeshe dîba dia kudianjila kudilongolola to. Bitu mua kutufikila padi muntu utudi tuyisha utuela lukonko lukole. Bidi kabidi mua kuikala nanku padi balela, bena mudimu ne balongi netu mua kutuela nkonko. Bena mbulamatadi badi pabu mua kutulomba bua kubumvuija malongesha ne nsombelu wetu. Bible udi utulomba ne: “Diba dionso nuikale ne muoyi wa kuandamuna bonso badi banukonka ne: nutumvuije ditekemena didi munda muenu. Kadi nubandamune ne lutuulu, kabidi ne kanemu.”​—1 Pet. 3:15, 16, MMV.

Tangila kabidi mudi Petelo ne Yone bandamuna ku Kabadi ka Sanedren mu Bienzedi 4:19, 20. Badi baleja patoke dipangadika diabu mu biambilu bibidi tshianana. Bakandamuna biakanyine bantu bavuabu nabu (baleja ne: tshilumbu tshivua tshikuate bapostolo, tshivua tshikuate kabadi ka bena Yuda aku). Panyima, bakashiminyina Stefano malu e kuyabu nende pende ku tshilumbuluidi tshia Sanedren aku. Bala diandamuna diende dilenga dia mu tshimpitshimpi divuaye kayi nansha mudianjile kulongolola (mu Bienzedi 7:2-53). Wakakungija malu ende au munyi? Wakamba malu malondangane bilondeshile muvuawu menzeke. Mpindieu pakafikaye pa muaba muakanyine, wakabanga kuleja patoke lungenyi lua buntomboji luvua nalu tshisamba tshia Isalele. Ke mu nkomenu kuluaye kuleja muvua bena tshilumbuluidi tshia Sanedren bikale ne lungenyi lua muomumue lua buntomboji pakashipabu Muana wa Nzambi.

Ntshinyi tshidi mua kukuambuluisha bua kuandamuna bimpe padibu bakuebeja diumvuija dia malongesha etu eku pebe kuyi mudilongolole? Ulonde tshilejilu tshia Nehemiya; wakasambila mundamunda kumpala kua kuandamuna lukonko lua Mukalenge Atashasete. (Neh. 2:4) Pashishe, longolola plan wa malu kampanda a kuamba mu mutu ne lukasa. Malu manene asatu a kuenza ng’wowo aa: (1) Sungula bualu bumue nansha abidi a kuela mu diandamuna (udi mua kuangatshila malu aa mu Comment raisonner à partir des Écritures anyi mu kakanda ka “Biena-bualu bia kuyukidilangana bia mu Bible”). (2) Keba mvese ya kujadika nayi malu aa. (3) Keba mushindu wa kubanga kuandamuna ne bukalanga bua muntu asanke bua kukuteleja. Tuadija kuakula mpindieu.

Kadi neuvuluke tshia kuenza pikalabu bakutatshisha anyi? Yezu wakambila bayidi bende ne: ‘Kanutambi kuelangana meji ne: Netuambe munyi? Netuambe tshinyi? Nebanupe bua kuamba pa dîba adi. Bualu bua nuenu kanuena nuamba, nyuma wa Tatu wenu udi wamba munda muenu.’ (Mat. 10:19, 20) Tshidibi kabiena bisua kuamba ne: neupete ‘dipa dia kuakula ne meji’ bu bena Kristo ba kumpala to. (1 Kol. 12:8, MMV) Kadi wewe muikale ulonda dilongesha didi Yehowa ufila mu tshisumbu tshia bena Kristo, nyuma wende neakuvuluije malu audi nawu dijinga pa dîba diawu.​—Yesh. 50:4.

Kakuyi mpata, kuakula kuyi wenda ubala kudi kuimpe menemene. Wewe udibidija bua kuenza midimu idibu bakupesha mu tshisumbu mushindu eu, kuandamuna nansha kuyi mudilongolole nekulue bualu bupepele, bualu mushindu wa kuenza malu mmufuanangane. Kushadidi kunyima nansha. Kuakula nunku kabiyi bikengela kuanji kubala nekukuambuluishe bikole mu buambi. Wewe muikale wenza miyuki mu bisangilu, neufike ku dimanya mua kuikala ulama ntema ya bantu ne malu audi wamba abatuila ku muoyo.