Nkomenu mulenga

IMUE misangu ukadi mukebulule ne mulongolole malu a mubidi wa muyuki webe. Ukadi pamu’apa mulongolole mbuelelu udi ujula bantu nzala ya kukeba bua kumanya malu a bungi. Kadi kutshidi tshintu tshikuabu tshidi tshishale: tshintu atshi ke nkomenu mulenga. Kumulenguludi to. Malu audi wamba ku ndekelu, adi ashala muntatshi mule mu mitu ya bantu. Bikala nkomenu kayi mulenga, nansha biukavua muambe bikuabu bidi bikepela mushinga.

Tangila malu adi alonda aa: Yoshua wakenzela bakulu ba tshisamba tshia Isalele muyuki muimpe wa dikema matuku makese kumpala kua kufuaye. Yoshua wakambila bantu mu tshikoso anu malu manene avua Yehowa muenzele bena Isalele katshia ku tshikondo tshia Abalahama anyi? Tòo. Wakakankamija bantu ne muoyo mujima ne mêyi aa: ‘Nutshine Yehowa, numukuatshile mudimu ne muoyo wonso udi kauyi ne lubombo.’ Udi mua kudibadila nkomenu wa Yoshua mu Yoshua 24:14, 15.

Munga muyuki muimpe ng’uvua Petelo muenzele musumba wa bantu mu Yelushalema mu tshikondo tshia Difesto dia Pentekoste wa mu 33 bikondo bietu ebi. Muyuki eu udi mu Bienzedi 2:14-36. Tshia kumpala wakanji kubambila ne: bavua badimuenene ne abu abidi dikumbana dia mulayi wa Yoele udi wakula bua diela bantu nyuma wa Nzambi. Panyima wakaleja muvuawu umvuangana ne milayi idi itangila Masiya idi mu Misambu ne idi yakula bua dibishibua dia Yezu Kristo ne ditekibua diende ku diboko dia balume dia Nzambi. Mpindieu mu nkomenu, Petelo e kuleja patoke tshivua muntu yonso ne bua kuenza. Wakamba ne: “Nanku, nzubu wa Israele mujima amanye, ashindike ne: Yezu unuvua bapopele pa mutshi wa tshibawu awu, [Nzambi] mmumuteke Mfumu ne Mupandishi.” (MMM) Bantu bavuapu abu kukonka ne: “Bana betu, tuenze tshinyi?” Petelo e kubandamuna ne: “Nukudimune mioyo yenu; wonso wa kunudi [bamutambuishe] mu dina dia Yezu Kristo.” (Bien. 2:37, 38, MMM) Muyuki eu wakalenga bantu batue ku 3 000 dituku adi ku muoyo bikole, buobu kuitaba bulelela budi butangila Yezu Kristo.

Malu a kuvuluka. Malu audi wamba mu nkomenu adi ne bua kuikala umvuangana buludiludi ne tshiena-bualu tshia muyuki webe. Adi ne bua kufumina ku malu manene a muyuki. Ki mbambe ne: udi muenzejibue bua kutela mutu wa bualu muaku ku muaku to, kadi bumue, udi mua kutela anu miaku idi yenza mutu wa bualu idi ne mushinga wa bungi.

Pa tshibidilu, kipatshila kebe paudi wenza muyuki nka kukankamija bakuabu bua kuenza tshintu kampanda bilondeshile biudi ubambila. Kamue kipatshila kanene ka nkomenu nka kuleja bantu tshidibu mua kuenza. Pauvua usungula tshiena-bualu tshia muyuki ne malu manene, uvua mukebe kumanya kumanyinamu bua tshinyi muyuki uvua ne mushinga kudi bateleji ne uvua uwenza ne kipatshila kampanda anyi? Pikalabi nanku, udi mumanye tshiudi ukeba bua benze. Mpindieu udi ne bua kumvuija tshidi bualu abu buudi ukeba bua benze ne imue misangu kubaleja mudibu mua kubuenza.

Pa kumusha dileja bantu tshia kuenza, nkomenu webe udi ne bua kusaka bantu ku dienza malu. Nkomenu udi ne bua kufila tubingila tuimpe tudi bantu ne bua kuenzela bualu abu ne pamu’apa kuleja masanka adibu mua kupeta pa kubuenza. Biwikala wewe muelele tshiambilu tshiebe tshia ndekelu meji ne muoyo mujima ne mutshilunge biakane, netshipeshe muyuki webe mujima bukole.

Kupu muoyo ne: muyuki ukadi ujika. Malu audi wamba adi ne bua kujadika muanda eu. Lubilu lua diakula ludi palu ne bua kuikala luakanyine. Kuakudi lubilu lubilu bua kulua kukosa diakula mu tshiputuku nansha. Kadi kukepeshi bikole dîyi to. Dîyi dikale dikumbane kadi kadiyi dikole menemene to. Biambilu biebe bia ndekelu bidi ne bua kumvuika ne: ukadi ku ndekelu. Diakula diebe didi ne bua kuleja ne: udi wakula ne muoyo mujima, ne udi mutuishibue ne biudi wamba. Paudi udibidija bua kuenza muyuki, kupu muoyo bua kuambulula nkomenu pende nansha.

Kadi nkomenu udi ne bua kuikala bule kayi? Kakuena dîba dimana kukosa to. Tshidibi kêna ne bua kuikala wa milunguluku nansha. Tudi mua kujadika ne: bule bua nkomenu wetu mbukumbane ku tshidiye wenza kudi bateleji. Nkomenu muipi, wa buludi, ne udi ukankamija bantu utu mulenga pa tshibidilu. Nkomenu muenze mule muikale ne mufuanu munda udi mua kuikala pende muimpe biwamulongolole ne lungenyi luonso. Fuanyikijabi nkomenu muipi wa mukanda mujima wa Muambi (mu Muambi 12:13, 14) ne nkomenu wa Muyuki wa pa Mukuna (muyuki udi muipi menemene kudi mukanda wa Muambi) udi mu Matayo 7:24-27.

Mu mudimu wa budimi. Mu buambi ke mututu dijinga menemene ne nkomenu. Malu adi mua kuenda bimpe wewe kupatula bipeta bimpe biwadilongolola ne biwikala ne bantu ku muoyo. Mibelu mifila mu bikoso bikuabu bia mu dilonga edi idi mua kutuambuluisha kabidi tuetu bayakaje patudi tuyikila ne muntu umue pa nkayende.

Diyuki didi mua kuikala dîpi menemene. Muntu udi mua kuikala mumonangane ne mudimu kampanda. Muntu wa nunku udi mua kuenza nende anu munite umue tshianana. Pikalabi biakanyine, udi mua kuamba nansha ne: “Ndi mmona ne: kuena ne dîba to. Kadi ndekelaku nkuambile tshianana bualu bumue buakukankamija. Bible udi uleja ne: Nzambi wakatufuka mmulongolole malu a dikema: mmusue kuenza buloba ebu mparadizu bua tuikalepu ne muoyo tshiendelele. Tudi mua kubuela mu Mparadizu au, kadi tudi ne bua kulonga tshidi Nzambi utulomba bua kuenza.” Peshi udi mua kumulomba bua wewe kumualukidila dîba didiye kayi ne mudimu to.

Pikala muntu mukoseshe muyuki anyi mene mufike munda, ki mbuena kuamba ne: biajikidi anu apu to. Uvuluke mibelu idi mu Matayo 10:12, 13 ne mu Lomo 12:17, 18. Diandamuna diebe dia lutulu didi mua kumushintulula meji adiye nawu bua Bantemu ba Yehowa. Netshikale bualu buimpe bua menemene.

Ku lukuabu luseke, biwikala muyikile bimpe ne muntu, bua tshinyi kubengaku kuambulula bualu bunene buudi musue ne: akuate? Umuleje bulenga bua kuenza tshiudi umulomba atshi.

Pawamona ne: bidi bikengela kumupinganyina, mujule dijinga dia kukuindilaye ne muoyo kuulu kuulu. Ela lukonko (bumue luangatshila mu mukanda wa Commment raisonner à partir des Écritures anyi mu mukanda utu utuambuluisha bua kulonga Bible ne bantu). Kupu kipatshila kebe muoyo to; kipatshila kadi Yezu utela mu Matayo 28:19, 20.

Nuajikiji kulonga Bible ne muntu anyi? Wewe muambulule mutu wa bualu, mulongi neavuluke binudi balonge. Kuenza mudimu ne nkonko bua kuambulula binuvua balonge nekuambuluishe mulongi bua kulama malu mu mutu, nangananga nuenu kanuyi nuya lubilu lubilu to. Wewe mumuebeje bua ambe bulenga bua malu anudi balonge anyi mudiye mua kuambila bakuabu, nebimuambuluishe bua kuela meji mushindu udiye mua kukuata mudimu ne malu au.​—Nsu. 4:7.

Wavuluka bualu ebu: nkomenu pende udi ulengeja muyuki webe wonso.