Malu adi akuatshisha bantu

BUA muyuki webe kukuatshishawu bantu, kuikala ne tshiena-bualu tshilenga nkayaku ki nkukumbane to. Udiebeje ne: ‘Bantu aba badi dijinga ne kuteleja tshiena-bualu etshi bua tshinyi? Nengambe tshinyi bua bateleji kumvua ne: muyuki mmubambuluishe bulelela?’

Padibu bakupesha mudimu wa kuenza mu Kalasa ka Mudimu wa Nzambi bua kuleja mua kuyisha muntu mu dinaya, mukuyukidishi ke muteleji webe. Bua mikuabu midimu bateleji mbantu bonso badi mu tshisangilu.

Tshidi bateleji bamanye. Udiebeje ne: ‘Bateleji mbamanye tshinyi pa tshiena-bualu etshi?’ Diandamuna dia lukonko elu ke nshindamenu wa muyuki webe. Pikala mu tshisumbu muikale bena Kristo bapie mu nyuma ba bungi, kuambuludi tshianana malongesha a nshindamenu to, bualu mbaamanye. Ibakila pa malongesha aa. Tshidibi, pikalaku bapiabapia ba bungi kabidi mu bateleji amu, kupu majinga abu pabu muoyo to.

Akaja lubilu lua diakula bilondeshile bidi bantu bamanye. Paudi ubueja tumue tu-malu tudi ba bungi ba kudibu bamanye, apu udi mua kukoleshaku ka lubilu. Kadi kuakudi lubilu paudi wamba malu adi ba bungi kabayi bamanye to; nenku nebamone mua kumvua bimpe biudi wamba.

Tshidi tshikuatshisha ntshinyi? Kuamba malu adi akuatshisha bantu kakuena misangu yonso kumvuija kuamba anu malu kampanda mapiamapia to. Bamue bangamba-malu batu bamba malu akadi bateleji bamanye, baamba mu mushindu mupepele udi ufikisha bateleji ku diumvua bimpe menemene malu aa bua musangu wa kumpala.

Tshilejilu, kuambila muntu tshianana mu buambi ne: bualu kampanda bua mu ngumu budi bujadika mutudi matuku a ndekelu ki nkumana muanda to. Kuata mudimu ne Bible bua kuleja diumvuija dia bualu abu. Nebikuatshishe muntu eu. Bia muomumue kabidi, paudi wakula bua mikenji idi mu bintu biakafuka Nzambi anyi bua bikunyibua peshi nyama, kipatshila kebe ki nka kuambila muntu bua malu a siyanse adiye kayi muanji kumvua katshia nansha. Kadi kipatshila kebe nka kuangata malu aa ne mêyi a mu Bible bua kumuleja ne: Kudi Mufuki udi mutunange. Muntu neamone malu mu mushindu mukuabu.

Kuambila bantu malu akadibu bumvumvue ki mbualu butekete to. Kadi bua kuikala mulongeshi mulenga, bidi bikengela kulonga mua kuambila bantu malu akadibu bumvumvue mu mushindu udi ubasankisha. Udi mua kuenza tshinyi?

Kebulula malu. Pamutu pa kuamba malu adi akuvuila lukasa mu mutu, kuata mudimu ne biamu bia kukebulula nabi malu bidibu batele mu dibeji dia 33 too ne ku dia 38. Ikala ne kipatshila kadibu bambamu. Bumue, mu dikebulula malu edi, udi mua kupeta kamue ka-bualu kadi kenzeka kadi bantu kabayi batambe kumanya, kadi kikale kumvuangana ne tshiena-bualu tshiebe. Anyi udi mua kupeta bualu kansanga bupiabupia bua mu ngumu budi bumvuangana ne tshiena-bualu tshia muyuki webe etshi.

Paudi ubala malu a tshiena-bualu tshiebe, ikala udielesha meji ne nkonko bu mudi tshinyi? bua tshinyi? dîba kayi? penyi? nganyi? ne mushindu kayi? Tshilejilu: Bua tshinyi bualu ebu mbulelela? Ndi mua kubujadika munyi? Mbilele kayi bidi bipangisha bamue bantu bua kumvua bualu budi Bible wamba ebu? Bua tshinyi budi ne mushinga? Mmunyi mudibu mua kushintulula nsombelu wa muntu? Kudiku tshilejilu tshidi tshijadika bulenga bua kutumikila bualu ebu anyi? Nngikadilu kayi wa Yehowa udi bualu ebu buleja? Bilondeshile tshiena-bualu tshiebe, udi mua kudiebeja ne: Bualu ebu buakenzeka tshikondo kayi? Tudi mua kubutumikila mushindu kayi lelu’eu? Udi mene mua kulengeja muyuki webe pa kuela imue ya ku nkonko eyi ne kuyandamuna paudi wenda uwenza.

Bumue, muyuki webe udi mua kukulomba bua kuenza mudimu ne mvese itu bateleji bamanye. Udi mua kuenza tshinyi bua mvese ya nunku kukuatshishayi bantu? Kuyibadi patupu to; uyumvuije.

Mvese eyi idi mua kuambuluisha bantu biwayisunsulula mu katoba mu katoba, kulamuna tshitupa tshionso tshiayi tshidi tshiumvuangana ne tshiena-bualu tshiebe, bua kutshiumvuija. Angata tshilejilu Mika 6:8. “Buakane” ntshinyi? Buakane budibu bakula budi bulonda mêyi a nganyi? Mmunyi muudi mua kumvuija ne tshilejilu tshidi ‘kuenza malu makane’ anyi ‘kunanga kuleja bakuabu luse’? Bupuekele ntshinyi? Mmunyi muudi mua kutumikila malu aa paudi ne muntu mukulumpe? Tshiena-bualu, kipatshila, bateleji ne dîba diudi nadi ke bidi bijadika malu awamba.

Diumvuija dipepele dia miaku iudi wenza nayi mudimu ditu diambuluisha bantu bikole. Tshilejilu, bantu ba bungi batu babazuka patubu bamanya tshidi ‘bukalenge’ budibu batela mu Matayo 6:10 bumvuija. Diumvuija didi mua kuambuluisha nansha muena Kristo ukadi ne matuku mu bulelela bua kumvua bimpe menemene tshidi mvese wamba. Bidi bimueneka bimpe patudi tubala 2 Petelo 1:5-8 ne tumvuija mpindieu miaku mishilashilangane idimu: ditabuja, buimpe, lungenyi [dimanya], didikanda, didikankamika [dinanukila], buimpe bua Nzambi [dilamata Nzambi], dinangangana dia bana benu, ne luse [dinanga]. Wewe mumvuije miaku idi mienze bu idi ne diumvuija dimue idi mu mvese, bantu nebamone dishilangana didi pankatshi payi. Idi mua kuikala miaku bu mudi: meji, dimanya, dijingulula dia mianda, ne lungenyi idi mu Nsumuinu 2:1-6.

Bateleji badi mua kumvua bimpe biwelangane nabu meji pa mvese kampanda. Tshilejilu, ba bungi batu bapapuka patubu babaleja ne: 1 Kolinto 15:45 udi wamba ne: Adama uvua musûke peshi anyima udi ne muoyo ne mu Muambi 9:5 bafue ki mbamanye bualu nansha bumue. Umue musangu, Yezu wakakemesha Basadoke pakangataye Ekesode 3:6 (mvese uvuabu bamanye bimpe) bua kujadika ne: bafue nebabishibue.​—Luka 20:37, 38.

Bitu kabidi biambuluisha bantu patudi tuakula bua mvese mikuabu idi kumpala ne kunyima kua eu utudi nende bualu, malu avua enzeka tshikondo tshiakamufundabu, ne kuleja muntu udi wakula anyi udibu bambila malu mu mvese eu. Tshilejilu, Bafalese bavua bamanye Musambu wa 110 bimpe. Kadi Yezu wakakoka ntema yabu ku bualu kampanda bua mushinga budi mu Musambu eu. Wakabebeja ne: ‘Nudi nuamba munda muenu ne: Kristo udi nganyi? Yeye udi muana wa nganyi? Bakamuambila ne: Yeye udi muana wa Davidi. Yezu wakabakonka kabidi ne: Davidi udi umubikila mu nyuma muimpe ne: Mukalenge munyi? Wakamba ne: Mukalenge wakambila mukalenge wanyi ne: Shikama ku tshianza tshianyi tshia balume too ne pangateka badi nebe lukuna muinshi mua makasa ebe. Biamubikila Davidi ne: Mukalenge, yeye udi muanende munyi?’ (Mat. 22:41-45) Wewe welangana meji ne bantu pa Bible bu muvua Yezu wenza, newambuluishe bantu bua kubala Dîyi dia Nzambi ne lubatshi luonso.

Padi ngamba-malu wamba tshikondo tshivuabu bafunde mukanda kampanda wa mu Bible anyi tshikondo tshiakenzeka bualu kansanga, bidi bikengela aleje nsombelu uvuaku tshikondo atshi. Nunku bantu nebumvue bimpe mushinga wa mukanda anyi bualu abu.

Difuanyikija bintu didi mua kuleja kabidi dikuatshisha didi nadi muyuki webe. Udi mua kuleja dishilangana pankatshi pa tshitu bantu bamba ne tshidi Bible wamba pa bualu kampanda. Anyi udi mua kufuanyikija miyuki ibidi mifuanangane ya mu Bible. Mmishilangane anyi? Bua tshinyi? Tshitudi mua kulongela ku miyuki eyi ntshinyi? Kuenza nunku kudi mua kufikisha bateleji ku dimona tshiena-bualu mushindu mukuabu.

Paudi ne bua kuakula pa tshimue tshitupa tshia mudimu wetu, wewe muanji kuamba mu tshikoso malu adi mu tshiena-bualu tshiebe, neulengeje muyuki. Akula bua tshitudi ne bua kuenza, bua tshinyi tudi ne bua kutshienza, ne mushindu uditshi tshiumvuangana ne bipatshila bia Bantemu ba Yehowa mu ka-bujima kabi. Amba pashishe muaba, dîba, ne mushindu wa kuenza mudimu eu.

Kadi newenze tshinyi biwikala ne bua kuakula pa amue “malu male a Nzambi”? (1 Kol. 2:10) Wewe mutuadije kuleja ne kumvuija malu manene a tshiena-bualu, bantu nebumvue malu makuabu bipepele. Ku ndekelu wewe muambe muyuki mu tshikoso, bantu nebumvue ne disanka dionso ne: tudi balonge bualu kampanda.

Mibelu idi itangila ngikadilu wa bena Kristo. Malu neambuluishe bantu nangananga biwabaleje mudiwu atangila nsombelu wabu. Dîba diudi ukonkonona mvese idi mu muyuki webe, ikala udiebeja ne: ‘Bua tshinyi mbalame bualu ebu mu Mifundu too ne lelu’eu?’ (Lomo 15:4; 1 Kol. 10:11) Ela meji ku malu adi bantu badi bakuteleja bapetangana nawu. Tangila tshidi mibelu ne mêyi a mu Bible biamba pa nsombelu yabu ayi. Welangane meji ne bantu, ubaleje mudi mvese wamba bua kupita bilenga ne nsombelu ayi. Lekela kuakula bua nsombelu mu ka-bujima kayi. Akula bua ngikadilu ne bienzedi kampanda bisunguluke.

Bangabanga, anji keba mua kutumikila mubelu umue anyi ibidi ya mu dilonga edi mu muyuki anyi mudimu udibu bakupeshe. Paudi wenda umanya malu upiluka, utumikile ya bungi ya ku mibelu eyi. Neumone ne: mu kupita kua matuku, bantu nebikale bindila miyuki yebe ne muoyo kuulu kuulu, batekemene se: muyuki webe neubambuluishe.