Mukenji utudi ne bua kumanyisha

‘UTSHINE NZAMBI, UTUMIKILE MIKENJI YENDE’

MATUKU a bungi kumpala kua Buena-Kristo kutuadija, Yehowa wakambila Abalahama (muntu wa lulamatu) muvuaye mulongolole bua ‘bisamba bionso bia pa buloba’ kufika ku didibeneshabi nkayabi. (Gen. 22:18) Ne nyuma wende muimpe, Nzambi wakasaka kabidi Solomo bua kufunda bualu bunene bumue budi bantu bonso ne bua kuenza. Mbuobu ebu: ‘Utshine Nzambi [mulelela], utumikile mikenji yende; ebu mbualu budi muntu ne bua kuenza.’ (Muam. 12:13) Kadi mmunyi mudi bantu ba matunga onso mua kufika ku dilonga malu aa?

Nansha mutuku bantu batu bitabuja Nzambi, Bible udi wamba ne: bavua ne bua kuyisha bikole bia menemene bisamba bionso mu ‘dituku dia mukalenge.’ Dituku edi diakabanga mu tshidimu tshia 1914. (Buak. 1:10) Buakabuluibua 14:6, 7 udi wakula bua tshikondo etshi wamba ne: banjelu bavua ne bua kulombola diyisha dinene dia lumu luimpe ‘kudi ditunga dionso ne tshisamba tshionso ne muakulu wonso ne bantu bonso.’ Bavua ne bua kuambila bantu ne: ‘Nutshine Nzambi, numutumbishe, bualu bua dîba dia dilumbuluisha diende diakulua; nukukuile yeye wakafuka diulu ne buloba ne mâyi manene ne mishimi ya mâyi.’ Nzambi mmusue ne: bamanyishe mukenji eu. Nenku tudi ne diakalenga dia kuumanyisha.

“Nzambi mulelela.” Pakamba Yehowa ne: “Nudi bantemu banyi,” bivua pavuabu bakeba kumanya eu uvua menemene Nzambi mulelela. (Yesh. 43:10, NW) Mukenji wetu kawena anu wa kuambila bantu bua kuikala ne tshitendelelu anyi kuitabuja nzambi kampanda to. Kadi badi ne bua kulonga ne: Mufuki wa diulu ne buloba ke Nzambi mulelela. (Yesh. 45:5, 18, 21, 22; Yone 17:3) Anu Nzambi mulelela nkayende ke udi mua kuamba malu atshilualua kayi udishima. Tudi ne bua kuleja bantu ne: bu muvua malu avua Dîyi dia Yehowa diambe mu bikondo bia kale makumbane, nanku au malu onso adiye mutulaye bua matuku adi kumpala neakumbane pawu bulelela.​—Yosh. 23:14; Yesh. 55:10, 11.

Bushuwa, bantu ba bungi batutu tuyisha badi batendelela nzambi kampanda anyi kabena batendelela menemene nzambi nansha umue to. Nenku, pamu’apa bua bantu kututelejabu, bidi bikengela kubanga ne bualu budi bututangila tuetu nabu. Tudi mua kulongela tshia kuenza mu malu adi mu Bienzedi 17:22-31. Tudi tumonamu ne: nansha mudi Paulo wakula ne bukalanga, udi uleja patoke mudi bantu bonso bikale ne tshilumbu kumpala kua Nzambi, Mufuki wa diulu ne buloba.

Tumanyishayi dîna dia Nzambi. Katupangi kutela Nzambi mulelela mu dîna diende to. Yehowa mmusue dîna diende. (Ekes. 3:15; Yesh. 42:8) Mmusue bua ne: bantu bamanye dîna adi. Mmuenze ne: dîna diende dia butumbi edi dikale mu Bible misangu mipite pa 7 000. Nenku tudi ne dibanza dia kumanyisha bantu dîna edi.​—Dut. 4:35.

Bua bantu kuikala ne disanka mu matuku atshilualua, badi ne bua kumanya Yehowa ne kumubila mu dîna edi ne ditabuja dionso. (Yoe. 2:32; Mal. 3:16; 2 Tes. 1:8) Kadi bantu ba bungi ki mbamanye Yehowa to, nansha menemene aba badi bamba mudibu batendelela Nzambi wakafundisha Bible. Nansha mudibu ne Bible ne bamubala, pamu’apa kabena mua kuikala bamanye dîna dilelela dia Nzambi bualu mbadiumushe mu nkudimuinu ya Bible mivule ya matuku aa. Bamue mbamanye dîna edi, kadi mbabakandike kudi bampasata babu bua kuditela.

Kadi mmunyi mutudi mua kumanyisha bantu dîna dia Nzambi edi? Kubalejadi mu Bible (pikalaku mushindu, mu Bible wabu nkayabu) nkuimpe menemene. Mu imue Bible, dîna edi didimu misangu binunu ne binunu. Mu mikuabu ditu anu mu mvese bu mudi: Musambu 83:18 anyi Ekesode 6:3-6, peshi mu diumvuija kuinshi kua dibeji mu Ekesode 3:14, 15 anyi 6:3. Mu Bible ya Tshiluba udi usangana mêna bu mudi: “Mfumu,” “Mukalenge,” “Maweja” anyi “Maweja-Nangila” pa muaba udi dîna dia Yehowa mu Tshiena-Ebelu. Padi muntu ne Bible udi kayi ne dîna dia Nzambi nansha muaba umue, udi mua kukeba Bible ukavuabu bapatule kale. Mu imue miaba, udi mua kuleja muntu dîna dia Nzambi mu misambu ya bena nzambi anyi mu miaku kampanda mifunde ku tshimanu tshia nzubu peshi tshintu kansanga tshimanyike.

Nansha bua badi batendelela nzambi mikuabu, Yelemiya 10:10-13 mu Bible wa Traduction du monde nouveau udi mua kubambuluisha. Mvese eu kêna anu utela dîna dia Nzambi to, kadi udi kabidi umvuija bimpe tshidi Nzambi.

Kusokoki dîna edi Yehowa bu mutu bena nzambi mikuabu benza pa kutela anu patupu ne: “Nzambi” peshi “Mukalenge.” Kadi kabiena bisua kumvuija ne: tudi ne bua kutela dîna dia Nzambi ku ntuadijilu kua diyuki ne diyuki dionso ne bantu to. Bualu bamue bantu badi mua kubenga diakamue bua kuyikila netu bua meji mabi kampanda. Kadi wewe mumane kuasa tshishimikidi, kuelakanyi bua kutela dîna dia Nzambi to.

Ki mbua tshianana padi Bible utela dîna dilelela dia Nzambi misangu ya bungi kupita mudiye utela “Mukalenge” ne “Nzambi” bisangisha pamue to. Kadi nansha nanku, bantu bavua bafunde Bible kabavua bakeba kufunda dîna dia Nzambi mu tshiambilu tshionso to. Bavua badifunda amu bu pa tshibidilu, bu muvua muoyo wabu ubasaka, kadi ne kanemu. Ke tshilejilu tshia kulonda etshi!

Muena dîna diende edi. Nansha mudi dikala ne dîna dia pa buadi didi nadi Nzambi dikale tshintu tshia mushinga mukole, dîna edi didi anu ntuadijilu wa malu.

Bua kunanga Yehowa ne kubila dîna diende ne ditabuja dionso, bidi bikengela kumumanya tshidiye. Pakambila Yehowa Mose dîna diende ku Mukuna wa Sinai, kavua mutele amu muaku “Yehowa” patupu to. Wakakula bua imue ngikadilu yende minene. (Ekes. 34:6, 7) Ke tshilejilu tshitudi ne tshia kuidikija etshi!

Nansha uyisha bantu mu buambi anyi wenza muyuki mu bisangilu, paudi wakula bua malu mimpe atuala Bukalenge bua Nzambi, uleje mudi malu aa aleja ngikadilu ya Yehowa. Paudi wakula bua mikenji ya Nzambi, ushindike mudiye mikale ileja dinanga ne meji ende. Leja patoke mudi malu adi Nzambi utulomba kaayi bujitu to, kadi mikale atukuatshisha. (Yesh. 48:17, 18; Mika 6:8) Leja mudi muanda onso udi Yehowa wenza bua kuleja bukole buende muikale uleja bualu kampanda pa bumuntu buende, malu adiye musue, ne malu adiye mulongolole. Leja mudi Yehowa ne nkatshinkatshi padiye uleja ngikadilu yende. Amba malu adi aleja muudi udiumvua bua Yehowa. Dinanga diudi nadi bua Yehowa didi mua kusaka bakuabu ku dimunanga pabu.

TMukenji munene wa mu matuku etu aa udi ulomba bantu bonso bua batshine Nzambi. Mêyi etu a mukana adi ne bua kusaka bantu bua kuikalabu batshina Nzambi. Ditshina edi mbuôwa budi buleja kanemu katudi naku bua Yehowa, mbuôwa buimpe, nkanemu kakole katudi naku kudiye. (Mus. 89:7) Ditshina edi didi dilomba kumanya mudi Yehowa muikale Mulumbuluishi Munene ne kumanya kabidi se: bua tuetu kuikala ne muoyo mu matuku atshilualua, tudi ne bua kuanji kuikala ne malanda mimpe ne Nzambi. (Luka 12:5; Lomo 14:12) Ditshina edi ndisambakaja ne dinanga dikole dia Nzambi; nenku ditshina edi ndijinga dikole ditudi nadi dia kumusankisha. (Dut. 10:12, 13) Ditshina edi didi ditusaka kabidi bua kukina malu mabi, bua kutumikila mikenji ya Nzambi, ne bua kumutendelela ne muoyo mujima. (Dut. 5:29; 1 Kul. 28:9; Nsu. 8:13) Didi ditupangisha mua kukeba bua kukuatshila Nzambi mudimu eku bikale banange malu a pa buloba.​—1 Yone 2:15-17.

Dîna dia Nzambi ‘ntshibumba tshikole.’ Yehowa utu ukuba bikole bantu batu bafika ku dimumanya bimpe menemene. Dimumanya diabu edi kadiena diumvuija ne: badi batela dîna diende anyi imue ngikadilu yende patupu to. Kadi bitu bualu batu beyemena amu Yehowa nkayende. Nsumuinu 18:10 udi wakula bua bantu aba nenku: ‘Dîna dia Yehowa didi tshibumba tshikole; muntu muakane udi unyemenaku, udi upanda.’

Padi mpunga upeteka diakamue, kankamija bantu bua beyemene Yehowa. (Mus. 37:3; Nsu. 3:5, 6) Dieyemena edi didi dileja mutudi tuitabuja Yehowa ne malu adiye mulaye. (Eb. 11:6) Padi bantu ‘babila dîna dia Yehowa’ bua padibu bamanye mudiye Mukalenge Mutambe Bunene, padibu banange njila yende, ne bua padibu bitaba ne muoyo mujima ne: lupandu ludi lufumina anu kudiye, Dîyi dia Nzambi didi ditujadikila ne: nebasungidibue. (Lomo 10:13, 14, NW) Paudi ulongesha bakuabu, bambuluisha bua bikale ne ditabuja dia mushindu eu mu nsombelu wabu mujima.

Bantu ba bungi batu ne malu mabapite mutu. Imue misangu kabatu bamanye mua kuajikija to. Ubalombe bua balonge tshidi Yehowa musue, bamueyemene, ne batumikile bidibu balonga. (Mus. 25:5) Ubakankamije bua kusambila Nzambi ne muoyo mujima ne bua kumuela tuasakidila bua malu malenga adiye ubenzela. (Filip. 4:6, 7) Padibu bamanya Yehowa, kabiyi anu ku malu adibu babala mu Bible, kadi kabidi ku didimuenena dia malu adi Nzambi ubenzela anu bu mudiye mulaye, nebapete bupole bualu badi bafika ku diumvua bilenga tshidi dîna dia Yehowa dileja.​—Mus. 34:8; Yel. 17:7, 8.

Babidila mpunga yonso udi umueneka bua kuambuluisha bantu bua bamone mudibi bikale bimpe bua kutshina Nzambi mulelela Yehowa, ne kulama mikenji yende.

‘KUMANYISHA YEZU’

KUNYIMA kua dibika diende ku lufu ne kumpala kua kupinganaye mu diulu, Yezu Kristo wakambila bayidi bende ne: ‘Panupuekela nyuma muimpe pambidi penu, nenuikale bamanyi [peshi bantemu] banyi ne ku mfudilu kua buloba.’ (Bien. 1:8) Bible udi wamba ne: basadidi ba lulamatu ba Nzambi badi ne mudimu wa ‘kumanyisha Yezu.’ (Buak. 12:17) Utu pebe umanyisha Yezu ne disuminyina dionso anyi?

Bualu bua dikema, bantu ba bungi batu bamba mu bulelela mudibu bitaba Yezu, kabatu bamanye tshintu nansha tshimue pa nsombelu wende kumpala kua kuledibuaye pa buloba to. Kabatu bamanye ne: uvua muntu wetu wa bushuwa eu pavuaye pa buloba to. Kabena bumvua mudiye muikale Muana wa Nzambi nansha. Mbamanye anu malu makese pa mudimu udiye nawu mu malu adi Nzambi mulongolole bua kuenza. Ki mbamanye tshidiye wenza mpindieu, ne ki mbamanye tshiabenzekela bua tshienzaye mu matuku adi kumpala eku to. Bamue mene batu bela meji (pabi kabiyi bia bushuwa) ne: Bantemu ba Yehowa kabatu bitaba Yezu to. Ke bualu kayi tudi ne bua kuditatshisha muetu muonso bua kubamanyisha bulelela pa malu aa.

Kadi bakuabu bantu buobu kabatu bitaba ne: muntu bu Yezu udibu batela mu Bible au uvuaku to. Bamue badi bamona Yezu anu bu muntu munene tshianana. Bavule kabena bitaba ne: udi Muana wa Nzambi. Nanku ‘kumanyisha Yezu’ kudi bantu ba nunku kudi kulomba didienzeja bikole, kulomba lutulu ne budimu.

Muntu yonso udi musue kupeta muoyo wa tshiendelele, udi ne bua kumanya Yezu. (Yone 17:3) Nzambi mmusue ne: bantu badi ne muoyo ‘bambe patoke ne: Yezu udi Mukalenge,’ kabidi badi ne bua kutumikila bumfumu buende. (Filip. 2:9-11) Nanku katuena ne bua kuepuka bua kuyikila ne bantu pa tshilumbu tshia Yezu, nansha buobu balamate bikole mmuenenu yabu mibi anyi bikale batuelela meji mabi to. Kadi nansha mutudi mua kuakula bua Yezu ne bamue bantu kakuyi lutatu (nansha patudi tumonangana nabu bua musangu wa kumpala), bua bakuabu bitu bikengela kuakula kakese ne budimu bua kupetabu mmuenenu mulenga pa bidi bitangila Yezu. Mpindieu tudi mua kukeba mushindu wa kuakula makuabu malu a Yezu misangu idi ilonda. Kadi tudi mua kuakula bua makuabu malu adi amutangila anu patuabanga kulonga Bible ne muntu.​—1 Tim. 2:3-7.

Mudimu munene udi nawu Yezu mu malu adi Nzambi mulongolole bua kuenza. Tudi ne bua kumvuija bantu ne: bu mudi Yezu muikale ‘njila’ ne ‘kakuyi muntu udi kayi mua kuya kudi Tatu kayi muanji kuya diambedi kudi Yezu,’ kakuena mushindu wa kubuela mu malanda ne Nzambi tuetu katuyi bitabuje Yezu to. (Yone 14:6) Bua muntu kumvua Bible, bidi bikengela anji kumanya mudimu munene udi Yehowa mupeshe Muanende wa kumpala mu malu adiye mulongolole bua kuenza. Bua tshinyi? Bualu Yehowa mmuvuije Muanende Yezu tshiamu tshinene mu dikumbana dia malu adiye mulongolole bua kuenza. (Kolos. 1:17-20) Milayi ya mu Bible idi inyungulukila anu pa bualu ebu. (Buak. 19:10) Ku diambuluisha dia Yezu Kristo nkayende ke kuajika ntatu idi buntomboji bua Satana ne mpekatu wa Adama bijule.​—Eb. 2:5-9, 14, 15.

Bua kumvua mudimu udi nawu Kristo bimpe, bidi bikengela muntu anji kumanya ne: bantu badi mu nsombelu mubi wa kanyawu udibu kabayi mua kudijikijila nkayabu nansha. Tuetu bonso tudi baledibue ne mpekatu. Mpekatu eu utu ututatshisha mu mishindu ya bungi. Kadi ku tototo nansha ku ndandanda, mpekatu neatufikishe anu ku lufu. (Lomo 3:23; 5:12) Elesha bantu baudi uyisha pa muanda eu meji. Mpindieu leja ne: ku diambuluisha dia mulambu udi utupikula wa Yezu Kristo, Yehowa mmuenze bua bantu badi bitabuja mulambu eu bapikudibue ku mpekatu ne ku lufu. (Mâko 10:45; Eb. 2:9) Ditabuja edi didi dibafikisha ku dipeta muoyo wa kashidi mu bupuangane buonso. (Yone 3:16, 36) Kakuena mukuabu njila utudi mua kupetela muoyo eu nansha. (Bien. 4:12) Patudi tulongesha bantu pa nkayabu anyi mu tshisumbu, katulengi bualu ebu anu pa mutu pa mutu to; tuye nabu ne mu kandondo. Tuenzayi ne bulenga ne lutulu luonso bua bantu bikale ne dianyisha bua mudi Kristo muikale Mupikudi wetu. Dianyisha didi muntu upeta bua mulambu eu wa Yezu didi mua kumusaka bua kushintulula ngikadilu, nsombelu ne bipatshila biende.​—2 Kol. 5:14, 15.

Eyowa, Yezu wakafua e kulambula muoyo wende anu musangu umu’epele. (Eb. 9:28) Kadi udi ne mudimu mpindieu wa Muakuidi Munene. Tuambuluishayi bantu bua bumvue tshidi bualu ebu bumvuija. Bantu aba badi ne kanyinganyinga kakole, batekete ku muoyo, anyi bikale ne ntatu mikuabu anu bualu bantu badibu nabu muaba au kabena ne muoyo mulenga anyi? Pavua Yezu pa buloba, uvua pende ne ntatu eyi. Mmumanye bimpe mutudi tumvua. Bu mutudi bapange bupuangane, tutu tumona bikengela bua Nzambi atufue luse anyi? Tuetu basambile Nzambi bua atufuile luse ku diambuluisha dia mulambu wa Yezu, Yezu neenze malu bu “Muakuidi kudi Tatu.” Udi uditeka pa muaba wetu, bushuwa udi “utuakuila.” (1 Yone 2:1, 2; Lomo 8:34) Ku diambuluisha dia mulambu wa Yezu ne midimu idiye ukuata ya Muakuidi Munene ke kutudi tupetela mushindu wa ‘kusemena ne dikima pepi ne nkuasa wa butumbi wa ngasa’ wa Yehowa bua kutuambuluishaye mu tshikondo tshiakanyine. (Eb. 4:15, 16) Nansha mutudi bapange bupuangane, tudi mua kuenzela Nzambi mudimu ne kuondo ka muoyo kalenga anu bua mudimu udi Yezu wenza wa Muakuidi Munene.​—Eb. 9:13, 14.

Yezu udi kabidi ne bukokeshi bua bungi bualu yeye ke udi Nzambi muteke Mfumu wa tshisumbu tshia bena Kristo. (Mat. 28:18; Ef. 1:22, 23) Bu mudiye Mfumu wa tshisumbu, udi utshilombola bilondeshile disua dia Nzambi. Paudi ulongesha bantu, bambuluisha bua bumvue ne: Yezu ke Mfumu wa Tshisumbu, kadi ki mmuntu wetu wa mashi ne mâyi eu udi Mfumu wa tshisumbu to. (Mat. 23:10) Anu musangu wa kumpala uudi upetangana ne bantu badi basankidila bulelela, udi mua kubalomba bua kuluabu mu bisangilu bia tshisumbu tshidi nabu pabuipi (mututu tulonga Bible ku diambuluisha dia bintu bienza kudi “mupika wa lulamatu ne wa budimu”). Ubumvuije tshidi “mupika” ne kabidi tshidi Mfumu bua bamanye bimpe bukokeshi budi nabu Yezu mu tshisumbu. (Mat. 24:45-47, NW) Uye nabu kudi bakulu, ubumvuije malu malomba a mu Bible adi muntu ne bua kukumbaja bua kuluaye mukulu. (Ef. 4:16; 1 Tim. 3:1-7; Tito 1:5-9) Ubumvuije ne: bakulu ki mbamfumu ba tshisumbu to, kadi badi bambuluisha bantu bua kulonda dikasa dia Yezu Kristo. (Bien. 20:28; 1 Pet. 5:2, 3) Ubambuluishe bua kumanyabu ne: pa buloba bujima kudi bantu badi ku bumfumu bua Kristo.

Mikanda ya Evanjeliyo idi ileja ne: pakabuela Yezu mu Yelushalema matuku makese kumpala kua lufu luende, bayidi bende bakela mbila ya disanka bamubikila ne: ‘Mukalenge udi ulua mu dîna dia Nzambi.’ (Luka 19:38) Padi bantu baditua bikole mu dilonga dia Bible, badi balua kumanya ne: Yezu udi mpindieu ne bukokeshi ku mutu kua bantu bonso ba pa buloba. (Dan. 7:13, 14) Paudi wenza muyuki anyi ulonga Bible ne bantu, ambuluisha bantu bua bumvue ne bikale ne dianyisha bua tshidi bumfumu bua Yezu butuenzela.

Ushindike ne: bikadilu bietu ke bidi bileja bituikala tuitaba anyi katuyi tuitaba bushuwa ne: Yezu Kristo udi Mukalenge, bileja kabidi bituikala anyi katuyi basue kumukokela ku budisuile. Utambe kuakula bua mudimu udi Yezu mupeshe bayidi bende kunyima kua yeye mumane kuedibua manyi bua kulua Mukalenge. (Mat. 24:14; 28:18-20) Akula pa tshidi Yezu (Mubedianganyi wa Dilambu) wamba bua malu atudi ne bua kuteka kumpala kua makuabu mu nsombelu wetu. (Yesh. 9:6, 7; Mat. 6:19-34) Leja bantu ngikadilu udi Mukalenge wa Ditalala muambe ne: ke udi bayidi bende ne bua kuikala nende. (Mat. 20:25-27; Yone 13:35) Kadi wadimuka, kulumbuluishi bakuabu pa bungi bua malu adibu benza to, kadi ubakankamije bua kuenza malu adi aleja menemene ne: bulelela badi bakokela bumfumu bua Yezu Kristo. Paudi ubabela mushindu eu, kupu muoyo bua ne: wewe pebe udi ne bua kuenza bia muomumue.

Kristo ikale tshishimikidi. Bible udi ufuanyikija mudimu wa kuvuija bantu bena Kristo ne dibakila nzubu pa Yezu Kristo bu tshishimikidi. (1 Kol. 3:10-15) Bua kuenza nunku, fikisha bantu ku dimanya Yezu anu bu mudibu bamuleja mu Bible. Tshidibi wadimuka, wenze bua ne: kabalu bu bayidi bebe wewe to. (1 Kol. 3:4-7) Ubambile balonde Yezu Kristo, bikale bayidi bende.

Bikala tshishimikidi tshiela bimpe, balongi nebumvue ne: Kristo utu mutushile tshilejilu bua tuetu ‘kulonda dikasa diende.’ (1 Pet. 2:21, MMM) Bua kufika ku dienza nanku, ulombe balongi bua kubala Evanjeliyo bu malu a kulonda, kadi ki mbu malu malelela a kubala tshianana to. Ubambuluishe bavuluke ne balonde mmuenenu ne ngikadilu ya Yezu. Ubalombe bua kutangila muvua Yezu umvua bua Tatuende, muakapitaye ne mateta ne ntatu bimpe, muakatumikilaye Nzambi, ne muvuaye wenza malu ne bantu mu nsombelu mishilashilangane. Utambe kuakula bua mudimu uvua Yezu muditue ne kasuki mu diwenza. Nenku pikala mulongi wa Bible ne mapangadika a kuangata anyi papetaye ntatu, neadiebeje ne: ‘Yezu uvua mua kuikala muenze tshinyi mu nsombelu eu? Tshindi nsua kuenza netshileje ne: ndi ne dianyisha bua bionso bidiye mungenzele anyi?’

Paudi ne muyuki mu bisangilu, kuedi meji ne: bu mukadi bena Kristo nebe bitabuje Yezu, nanku kabena dijinga ne kubambila kabidi bikole malu ende to. Malu audi wamba neikale ne mushinga bikalawu mashila pa ditabuja Yezu. Paudi wakula bua bisangilu, uleje mudi Yezu muikale Mfumu wa tshisumbu. Paudi wakula bua mudimu wa buambi, leja muvua Yezu wangata mudimu wende, ne leja tshidi Yezu wenza bu Mukalenge bua kusangisha bantu bua bamone mua kupanduka ne kubuela mu ndongoluelu wa malu mupiamupia.

Mbimueneke patoke ne: kulonga malu a nshindamenu adi atangila Yezu nkayaku ki nkukumbane to. Kadi bua bantu kuluabu bena Kristo balelela, badi ne bua kumunanga bushuwa ne kabidi kuenza malu adi aleja ne: mbamuitabuje. Dinanga dia nunku didi disaka muntu bua kutumikila Yezu ne muoyo umue. (Yone 14:15, 21) Didi diambuluisha bantu bua kushala ne lulamatu padi ntatu imueneka, bua kutungunuka ne kulonda dikasa dia Yezu mu matuku abu onso a muoyo, bua kuleja mudibu bena Kristo bapie mu nyuma badi ‘bele miji ne bashibue mu dinanga’ bikole. (Ef. 3:17) Nsombelu wa mushindu eu neasankishe ne neatumbishe Yehowa, Nzambi Tatuende wa Yezu Kristo.

‘LUMU LUIMPE ELU LUA BUKALENGE’

PAVUA Yezu ufila tshimanyinu tshia dikalaku diende ne tshia nshikidilu wa ndongoluelu wa malu eu, wakamba ne: ‘Nebambile bantu bonso ba pa buloba lumu luimpe elu lua bukalenge buanyi, neluikale tshimanyishilu ku bisamba bionso; pashishe, nshikidilu nealue.’​—Mat. 24:14.

Mukenji udibu ne bua kutangalaja pa buloba bujima nunku mmukenji kayi au menemene? Mmukenji udi utangila Bukalenge buvua Yezu muambile bayidi bende bua kusambila ne: ‘Bukalenge buebe bulue.’ (Mat. 6:10) Buakabuluibua 11:15 udi ubikila bukalenge ebu ne: ‘Bukalenge bua Mukalenge wetu [Yehowa], ne bua Kristo wende’ bualu bumfumu budi bufumina kudi Yehowa ne yeye ke udi uteka Kristo mu nkuasa wa Bukalenge. Tshidibi tumanyayi ne: mukenji utudi tuyisha lelu mmualabale kupita too ne uvuabu bayishe kudi bayidi ba kumpala ba Yezu. Bavua bambila bantu ne: “Bukalenge bua [Nzambi] bukadi pabuipi nenu.” (Luka 10:9, MMM) Yezu (uvuabu bela manyi bua kulua Mukalenge) uvua munkatshi muabu. Kadi anu bu mudi Matayo 24:14 wamba, Yezu udi wakula bua diyisha mukenji eu pa buloba bujima bua kukumbaja tshintu tshia mushinga mukole tshidi tshitangila malu adi Nzambi mulongolole bua kuenza.

Muprofete Danyele uvua mupete tshikena-kumona pa bualu ebu. Wakamona “Wa Kale wa Matuku a Bungi” (Yehowa Nzambi) upesha muntu kampanda “mufuane muana wa muntu” (Yezu Kristo) ‘bukokeshi, butumbi ne bukalenge, bua bantu bonso, ba bisamba bionso ne ba miakulu yonso bamukuatshile mudimu.’ (Dan. 7:13, 14) Muanda udi utangila bantu bonso eu wakenzeka mu diulu mu tshidimu tshia 1914. Panyima pa muanda eu, bakela Diabolo ne ba-demon bende pa buloba. (Buak. 12:7-10) Ndongoluelu mukulukulu wa malu eu wakafika mu matuku ende a ndekelu. Kadi kumpala kua kubutukaye bububutu, badi bamanyisha bantu pa buloba buonso ne: mpindieu Masiya Mukalenge muteka kudi Yehowa ukadi ukokeshila mu diulu. Bantu badi bumvua lumu elu miaba yonso idibu. Tshidi bantu benza tshidi tshileja mudibu bangata Mutambe Bunene, bamuangata bu Mfumu mu ‘bukalenge bua bantu.’​—Dan. 4:32.

Bushuwa, kutshidi malu mavule makuabu adi kumpala eku, a bungi be! Tutshidi anu tusambila ne: ‘Bukalenge buebe bulue,’ kadi ki mbua ne: Bukalenge bua Nzambi nebubange kukokesha matuku adi kumpala to. Tudi tusambila nenku batuishibue ne: Bukalenge bua Nzambi nebulue kuenza malu manene, bulua kukumbaja milayi bu mudi eyi idi mu Danyele 2:44 ne mu Buakabuluibua 21:2-4. Bukalenge ebu nebukudimune buloba bulua mparadizu uula tente ne bantu badi banange Nzambi ne binabu kabidi. Patudi tuyisha ‘lumu luimpe elu lua bukalenge,’ tudi tuambila bantu bua malu mimpe aa. Kadi tudi tubambila kabidi ne muoyo mujima ne: Yehowa ukadi mupeshe Muanende bumfumu buonso. Utuku wakula ushindika menemene bua lumu luimpe elu pautu uyisha Bukalenge anyi?

Tumvuijayi tshidi Bukalenge. Mmunyi mutudi mua kukumbaja mudimu udibu batupeshe wa kuyisha Bukalenge bua Nzambi? Tudi mua kujula ntema ya bantu pa kuakula pa biena-bualu bivule, kadi tulua kuleja katupa kunyima mudi mukenji wetu utangila Bukalenge bua Nzambi.

Tshitupa tshinene tshia mudimu eu tshitu tshilomba bua kubala anyi kutela mvese idi yakula bua Bukalenge. Paudi wakula bua Bukalenge, wikale mujadike ne: bantu baudi wambila mbamanye menemene tshidi Bukalenge abu. Kuamba tshianana ne: Bukalenge mbulamatadi, ki nkujikija tshilumbu to. Bamue bantu kabena bumvua mudi tshintu tshidi katshiyi tshimueneka mua kuikala mbulamatadi to. Ke bua tshinyi udi mua kuelangana nabu meji mishindu ya bungi. Tshilejilu, lupepele kalutu lumueneka to, kadi tudi tumona mudilu lutuenzeja malu bikole. Katuena mua kumona Eu udi ulombola lupepele to, kadi bidi bimueneka patoke se: Udi muenze lupepele udi ne bukole bua bungi be! Bible udi umubikila ne: ‘Mukalenge wa kashidi.’ (1 Tim. 1:17) Udi kabidi mua kuamba nenku: mu ditunga dinene, bantu bavule kabatu ne mushindu wa kuya mu tshimenga tshikulu anyi mene kumona mfumu wa ditunga diabu to. Bantu batu bamanyina tshimenga etshi ne mfumu wa ditunga anu mu ngumu. Bia muomumue, Bible (udibu bapatule mu miakulu mipite pa 2 200) udi utuambila bualu bua Bukalenge bua Nzambi; udi utuleja mfumu wabu, ne tshidi Bukalenge ebu buenza. Tshibumba tshia Nsentedi (tshipatula mu miakulu mivule kupita bibejibeji bionso bikuabu) “Tshidi tshimanyisha Bukalenge bua Yehowa” bu mudibi bifunda pa tshizubu tshiatshi.

Bua kuambuluisha bantu bua kumvua tshidi Bukalenge, udi mua kutela amue malu adibu basue ne: mbulamatadi ijikije, bu mudi: malu a makuta, ditalala, dibunda bibawu, dinemeka bena bisa bikuabu, dilongesha bantu malu, ne malu a makanda a mubidi. Uleje ne: anu Bukalenge bua Nzambi ke buakumbaja malu aa ne makuabu kabidi mu mushindu udi ukengela.​—Mus. 145:16.

Uditatshishe muebe muonso bua bantu bapete dijinga dia kubuela mu Bukalenge bua Nzambi, muikala Yezu Kristo Mukalenge. Uleje mudi bishima biakenza Yezu bikale bu ka-diosha ka malu aluaye kuenza bu Mukalenge wa mu diulu. Ikala wakula misangu ya bungi bua ngikalu milenga ivua nayi Yezu. (Mat. 8:2, 3; 11:28-30) Umvuije kabidi ne: Yezu wakafua bua bualu buetu, pashishe Nzambi wakamujula ku lufu ne kumupesha muoyo udi kauyi kufua mu diulu; ne mu diulu amu ke mudiye ukokeshila mpindieu.​—Bien. 2:29-35.

Ushindike ne: Bukalenge bua Nzambi bukadi bumane kutuadija kukokesha mu diulu. Kadi wavuluka ne: bantu bavule kabena bamona malu adi aleja ne: Bukalenge ebu bukadi bukokesha to. Wewe mumanye bualu ebu, mpindieu udi mua kuebeja muntu bikalaye mumanye tshivua Yezu Kristo nkayende mufile bu tshimanyinu tshia dituadija kukokesha diende. Akula bua amue malu a mu tshimanyinu adi mu Matayo nshapita wa 24, Mâko nshapita wa 13 ne Luka nshapita wa 21. Pashishe udi mua kumuebeja bua tshinyi padibu bateka Yezu mu nkuasa mu diulu, malu a nunku avua ne bua kuenzeka pa buloba. Balayi nende mpindieu Buakabuluibua 12:7-10, 12.

Bu tshijadiki tshinene tshidi tshileja patoke tshidi Bukalenge bua Nzambi munkatshi mua dienza mpindieu, balayi Matayo 24:14, ne uleje mudi programe wa dilongesha bantu wenzeka pa buloba bujima lelu’eu. (Yesh. 54:13) Akula bua tulasa tushilashilangane tudi tuambuluisha Bantemu ba Yehowa (tushindamene pa Bible ne bantu kabayi bafuta makuta bua kubuelamu). Umvuija ne: pa kumbusha diyisha dietu dia ku nzubu ne ku nzubu, tutu tulonga Bible ne mêku anyi ne bantu pa nkayabu mu matunga mapite pa 230. Mmbulamatadi kayi wa bantu udi mua kuenza programe wa dilongesha bantu mulenga nenku, ne kabidi kumuenzeja pa buloba bujima? Bua bantu kumonabu mudi programe eu ushintulula bikadilu bia bantu, ubambile balue ku Nzubu wa Bukalenge, balue mu mpuilu ne mu mpungilu ya Bantemu ba Yehowa.​—Yesh. 2:2-4; 32:1, 17; Yone 13:35.

Kadi muntu unudi nuyukila nende neumone mudi malu aa amutangila anyi? Udi mua kumuleja ne budimu ne: kavuidila kebe nka kuakula bua mpunga udi bantu bonso nende wa kulua bantu balua Bukalenge bua Nzambi kukokesha. Mpa kuenza tshinyi? Mpa kulonga malu adi Nzambi utulomba bua kuenza ne kuatumikila lelu’eu.​—Dut. 30:19, 20; Buak. 22:17.

Tuambuluishayi bantu bua kuteka Bukalenge pa muaba wa kumpala. Nansha panyima pa muntu mumane kuitaba mukenji wa Bukalenge, kutshidi mapangadika adiye ne bua kuangata. Neateke Bukalenge bua Nzambi muaba kayi mu nsombelu wende? Yezu wakambila bayidi bende bua kutungunuka ne ‘kukeba diambedi bukalenge.’ (Mat. 6:33) Kadi tudi mua kuambuluisha bena Kristo netu bua kukeba bangabanga Bukalenge mushindu kayi? Mpa kufila tuetu nkayetu tshilejilu tshimpe ne kubaleja tshidibu pabu mua kuenza. Imue misangu, mpa kuebeja muntu bua kumanya ni ukadiku mukonkonone mpunga idiye nayi anyi pa kumulondela miyuki ya bakuabu badi bafika ku diteka Bukalenge pa muaba wa kumpala. Mpa kukonkonona miyuki ya mu Bible mu mushindu udiyi mua kukolesha dinanga diabu dia Yehowa. Mpa kuleja mudi Bukalenge buikale tshintu tshilelela. Pa kuleja patoke mushinga mukole udi nawu diyisha Bukalenge. Tshintu tshitambe buimpe tshia kuenza, nkujula bantu nzala ya kuenza malu pamutu pa kubambila tshidibu ne bua kuenza.

Kakuyi mpata, mukenji wa mushinga utudi tuetu bonso ne bua kumanyisha udi utangila bangabanga Yehowa Nzambi, utangila Yezu Kristo, utangila ne Bukalenge. Tudi ne bua kushindika mushinga menemene wa malu atudi tulonga pa bidi bitangila Yehowa, Yezu ne Bukalenge mu buambi, mu bisumbu bietu, ne mu nsombelu wetu nkayetu. Tuetu benze nanku, tudi tuleja ne: Kalasa ka Mudimu wa Nzambi kadi katuambuluisha bulelela.