Nshapita Muitanu
Budikadidi budi batendeledi ba Yehowa bapeta
1, 2. (a) Mbudikadidi kayi buvua Nzambi mupeshe muntu mulume ne mukajende ba kumpala? (b) Tela imue mikenji ivua ilombola Adama ne Eva mu malu avuabu benza.
PAVUA Yehowa mufuke muntu mulume wa kumpala ne muntu mukaji wa kumpala, bavua ne budikadidi budi bupite budi nabu bantu lelu’eu kule ne kule. Bavua mu mparadizu, mu Budimi bulengele bua Edene. Kakuvua disama nansha dimue divua mua kunyanga nsombelu wabu, bualu lungenyi ne mibidi yabu bionso bivua bipuangane. Lufu kaluvua lubindile bu mudilu luindila bantu bonso mpindieu to. Kabavua bu biamu bia robo to, bualu bavua ne dipa dilenga, dia kuikala badisunguila malu, badiangatshila mapangadika. Kadi tshivuabu, bavua ne bua kunemeka mikenji ya Nzambi bua kuikalabu anu ne budikadidi bulenga ebu.
2 Tshilejilu, tangila mikenji ya ku tshifukilu idi Nzambi muele. Mikenji eyi kayivua mifunda mu miaku mimueneke to, kadi Adama ne Eva bavua bafukibue mu mushindu wa kuikala bayitumikila. Nzala ivua ibasuma ivua ibamanyisha ne: mpindieu bavua ne bua kudia; nyota ivua ibakuata ivua ibasaka bua kunua mâyi; dibuela dia dîba divua dibaleja ne: dîba dia kulala dikadi dikumbane. Yehowa wakabapesha kabidi mudimu wa kuenza. Mudimu au uvua muikale anu bu mukenji mubelela bualu uvua utangila bivuabu ne bua kuenza. Bavua ne bua kulela bana, kukokesha bifukibua bionso bia muoyo bia mishindu ne mishindu bivua pa buloba, ne kusemeja mikalu ya Mparadizu too ne ku ntengu ya buloba bujima. (Genese 1:28; 2:15) Tuanji tuamba, eyi kayivuaku mikenji milenga anyi? Yakabapetesha mudimu uvua ubasankisha, ne ubasaka bua kukuata menemene mudimu ne bipedi biabu mu mushindu muimpe. Bavua kabidi ne budikadidi bua kudiangatshila mapangadika a mushindu uvuabu mua kuenza mudimu wabu au. Ntshinyi tshikuabu tshivuabu mua kukeba?
3. Mmunyi muvua Adama ne Eva mua kumanya bua kukuata mudimu bimpe ne budikadidi buabu bua kudiangatshila mapangadika?
3 Bushuwa, pavuabu balekele Adama ne Eva bua kudiangatshila mapangadika, ki mbuena kuamba ne: dipangadika kayi dionso divuabu mua kuangata divua mua kubapatuila bipeta bimpe to. Budikadidi buabu bua kudiangatshila mapangadika kabuvua ne bua kusambuka mikenji ne mêyi a Nzambi to. Kadi ntshinyi tshivuabu mua kuenza bua kumanya mikenji ayi ne mêyi au? Bavua ne bua kuteleja Mufuki wabu ne kubandila midimu ya ku bianza biende. Nzambi wakapesha Adama ne Eva lungenyi lukumbane luvua mua kubambuluisha bua kutumikilabu malu avuabu bamanye. Bu muvuabu bafukibue bapuangane, meji abu avua ne bua kuikala abasaka anu kubasaka bua kuleja ngikadilu ya Nzambi mu mapangadika avuabu mua kuangata. Bulelela, ke muvuabi ne bua kuikala anu bu buobu mua kuikala ne dianyisha bua malu onso avua Nzambi mubenzele ne kabidi kujinga bua kumusankisha.—Genese 1:26, 27; Yone 8:29.
4. (a) Mukenji uvuabu belele Adama ne Eva wa ne: kabadi bimuma bia mutshi umue uvua ubapangisha budikadidi anyi? (b) Bua tshinyi mukenji au uvua muakanyine?
4 Nunku, mu buakane buonso, Nzambi wakateta bua kumanya tshia bushuwa ni bavua bamulamate yeye Mubapeshi wa muoyo ne kumona ni bavua banyishe bua kuenza malu bilondeshile mikalu ivuaye mubelele. Yehowa wakelela Adama mukenji eu: “Udi mua kudia mamuma a mitshi yonso ya mu budimi, bu mûdi musue; kadi mamuma a mutshi wa lungenyi lua kujingulula malu mimpe ne malu mabi kuadi nansha; bualu bua mu dituku diudi wadia wewe neufue bulelela.” (Genese 2:16, 17) Pakafukibua Eva, bakamumanyisha pende mukenji eu. (Genese 3:2, 3) Mukandu eu uvua ubapangisha bua kuikala badikadile anyi? Tòo. Bavua ne biakudia bimpe bungibi bia mishindu ne mishindu bivuabu mua kudia kabayi bela meji ku bimuma bia mutshi umue au. (Genese 2:8, 9) Mukenji eu uvua muakanyine bualu Adama ne Eva bavua ne bua kumanya ne: buloba ebu mbua Nzambi, ne yeye ke wakabufuka. Ke bualu kayi Nzambi udi ne bukenji bua kuela mikenji idi yambuluisha bantu ne kabidi ipetangana ne malu adiye mulongolole.—Musambu 24:1, 10.
5. (a) Mmushindu kayi uvua Adama ne Eva bajimije budikadidi bulenga buvuabu nabu? (b) Ntshinyi tshiakapingana pa muaba wa budikadidi buvua nabu Adama ne Eva, ne mmunyi mudi bualu ebu bututangile petu?
5 Kadi tshiakenzeka ntshinyi? Dialakana diakasaka muanjelu mukuabu bua kukuata mudimu bibi ne tshipedi tshiende tshia budisunguidi e kuluaye Satana, mbuena kuamba ne: “Muluishi.” Wakashima Eva bua kuenza bualu buvua bubengangana ne disua dia Nzambi. (Genese 3:4, 5) Adama wakalonda tshiakenza Eva, kushipaye pende mukenji wa Nzambi. Bu muakangatabu tshintu tshivua katshiyi tshiabu, bakajimija budikadidi buabu bulenga. Mpekatu wakabanga kubakokesha, ne anu muvua Nzambi mubambile, lufu luakalonda. Bakashila ndelanganyi yabu bumpianyi bubi (bua mpekatu), budi bumuenekela ku dijinga didi muntu uledibua nadi dia kuikala kuenza malu anu mabi. Mpekatu wakafikisha kabidi ku butekete budi bulela masama, bukulakaje ne lufu. Dijinga dia kuikala kuenza malu mabi edi, dikolesha kudi bidi Satana usakangana bua kuenza, ndipatule lukuna mu bantu ne dibunda dia bilumbu, dikengeshangana ne mvita idi mishipeshe bantu miliyo mivule. Malu aa kaavuaku mashilangane ne budikadidi buvua Nzambi mupeshe bantu ku tshibangidilu anyi?—Dutelonome 32:4, 5; Yobo 14:1, 2; Lomo 5:12; Buakabuluibua 12:9.
Muaba utudi mua kupetela budikadidi
6. (a) Nkuepi kutudi mua kupetela budikadidi bulelela? (b) Mbudikadidi bua mushindu kayi buvua Yezu muambe?
6 Bua malu mabi adi enzeka miaba yonso lelu’eu, tudi tumvua bua tshinyi bantu badi bakeba ne muoyo mujima bua kuikala ne budikadidi bua bungi. Kadi nkuepi kutudi mua kupetela budikadidi bulelela? Yezu wakamba ne: “Binualamata ku dilongesha dianyi, nenuikale balongi banyi bulelela; nenumanye bulelela ne bulelela nebunupe budikadidi.” (Yone 8:31, 32, MML) Budikadidi ebu ki mbudi bantu bakeba padibu babenga mukalenge kampanda peshi mbulamatadi kansanga bitaba mukuabu to. Mbudikadidi budi bantu bakeba bua ntatu idibu nayi lelu. Yezu uvua wakula bua dipikudibua ku bupika bua mpekatu. (Yone 8:24, 34-36) Nunku, padi muntu ulua muyidi mulelela wa Yezu Kristo, udi ushintulula malu a bungi mu nsombelu wende, upeta budikadidi!
7. (a) Mmu mushindu kayi mutudi mua kupikudibua ku mpekatu mpindieu? (b) Bua kupeta budikadidi abu, ntshinyi tshitudi ne bua kuenza?
7 Bualu ebu kabuena busua kumvuija ne: bua mpindieu, dijinga dia kuenza mpekatu didi muntu uledibua nadi edi kadiena kabidi ne tshididi mua kuenzela bena Kristo balelela to. Bu mudi bena Kristo balelela aba bapiane mpekatu, batshidi amu baluangana nende. (Lomo 7:21-25) Kadi muntu yeye ulonda malongesha a Yezu, kakuikala kabidi mupika wa mpekatu nansha. Mpekatu kakuikala kudiye bu mfumu wa tshikisu udi utuma dîyi bua bamutumikile kakuyi tshia kuamba to. Muntu wa nunku kakuikala mu nsombelu udi kayi ne tshipatshila kampanda, nsombelu udi mua kunyanga kuondo kende ka muoyo to. Kuondo kende ka muoyo nekikale katoke zezeze kumpala kua Nzambi bualu bakadi bamubuikidile mpekatu yende ivuaye muenze kumpala bualu udi ne ditabuja mu mulambu wa Kristo. Kakuyi mpata, dijinga dia kuenza mpekatu didi mua kumuluila, kadi padiye kayi ulonda dijinga edi (bualu udi uvuluka malongesha malenga a Kristo), udi uleja ne: mpekatu katshiena kabidi umukokesha to.—Lomo 6:12-17.
8. (a) Buena-Kristo bulelela budi butumbusha ku malu kayi? (b) Tudi ne bua kuikala ne ngikadilu kayi kudi bamfumu ba mbulamatadi?
8 Tangilabi budikadidi butudi nabu tuetu bena Kristo. Mbatumbushe ku bupika bua malongesha a dishima, ku bupika bua bitabataba ne bua mpekatu. Malongesha a dikema a bulelela adi atangila bafue ne dibishibua ku lufu mmatulekeshe ditshina dia lufu. Dimanya ditudi nadi dia se: Bukalenge buakane bua Nzambi nebupingane pa muaba wa mbulamatadi ya bantu idi kayiyi mipuangane eyi didi ditumbusha dishikila ne ditupetesha ditekemena. (Danyele 2:44; Matayo 6:10) Kadi budikadidi bua nunku eu ebu kabuena busua kumvuija ne: mpindieu tudi mua kupanga kanemu kudi bamfumu ba mbulamatadi ne kutupa ku mikenji yabu to.—Tito 3:1, 2; 1 Petelo 2:16, 17.
9. (a) Mmunyi mudi Yehowa utuambuluisha ne dinanga bua kuikala ne budikadidi bupite budi bantu mua kupeta mpindieu? (b) Mmunyi mutudi mua kuangata mapangadika a meji?
9 Yehowa ki mmusue bua tudimanyine nsombelu muimpe utudi ne bua kuikala nende to. Mmumanye mushindu utudi bafukibue, mmumanye tshidi mua kutupesha disanka dilelela ne kabidi tshidi mua kutuambuluisha bua kashidi. Yehowa mmumanye bimpe ngenyi ne bikadilu bidi mua kunyanga malanda adi muntu nawu nende Yeye ne adiye nawu ne bantu nende, peshi kupangisha muntu eu bua kubuela mu bukua-panu bupiabupia. Yehowa udi utumanyisha ne dinanga malu onso aa ku diambuluisha dia Bible ne dia bulongolodi buende budi bumueneka. (Mâko 13:10; Galatia 5:19-23; 1 Timote 1:12, 13) Nunku, tuetu nkayetu ke badi ne bujitu bua kukuata mudimu ne tshipedi tshia budisunguidi tshidi Nzambi mutupeshe etshi bua kuangata dipangadika dia tshituikala mua kuenza. Tuetu batumikile malu adi Bible utulongesha, katuakufuana Adama to, netuangate mapangadika a meji. Netuleje ne: tudi ne dijinga dikole dia kuikala ne malanda mimpe ne Yehowa mu nsombelu wetu.
Bamue bantu batu bakeba budikadidi bua mushindu mukuabu
10. Mbudikadidi bua mushindu kayi budi bamue Bantemu ba Yehowa bakebe?
10 Imue misangu nansha bamue Bantemu ba Yehowa batshidi bansonga ne aba bakadi bantu bakole badi mua kukeba budikadidi bua munga mushindu. Malu a panu adi mua kumueneka abasankisha, ne padibu batamba kuela meji, dijinga dia kuenza malu adi matangalake panu aa didi ditamba kukola munda muabu. Bantu ba nunku kabakumvua anu muoyo wa kunua diamba, kukuatshika maluvu ta kuenda buendenda nkayaku to. Badi batuadija kusomba ne bamue bantu badi kabayi nansha bena Kristo, bakeba bua ne: bantu aba babanyishe. Badi mene mua kutuadija kuidikija ngakuilu ne ngikadilu wa bantu abu.—3 Yone 11.
11. Dikokangana bua kuenza malu mabi ditu imue misangu difumina penyi?
11 Imue misangu muntu udi udiamba mudiye wenzela Yehowa mudimu ke udi mua kukoka bakuabu bua kudituabu mu malu adi kaayi a bena Kristo. Ke tshiakenzekela bamue bena Kristo ba kumpala, ne bualu ebu budi kabidi mua kuenzeka nunku mu tshikondo tshietu etshi. Bantu ba nunku aba batu misangu yonso bajinga bua kuenza malu adibu bela meji ne: neabasankishe, pawu mikale abengangana ne mikenji ya Nzambi. Badi bambila bakuabu bua “kusankishaku mubidi.” Badi “babalaya budikadidi, kadi bobo bine bikale bapika ba bubi.”—2 Petelo 2:19, MMM.
12. Mbipeta bibi kayi bidi bifumina ku ngikadilu udi ubengangana ne mikenji ne mêyi a Nzambi?
12 Bipeta bia tshidibu babikila ne: budikadidi etshi bitu misangu mivule bibi, bualu bitu bilua bua dipanga kutumikila mikenji ya Nzambi. Tshilejilu, tshiendenda tshidi mua kulubakaja mutshima wa muntu, kufila masama, lufu, mafu a panshi ne pamu’apa ku dishipa dia mabaka. (1 Kolinto 6:18; 1 Tesalonike 4:3-8) Kunua kua diamba kudi mua kufikisha muntu ku bumfika-munda, dipanga kujikula miaku bimpe padiye wakula, dimona lubuitshibuitshi, tshinyingunyingu, dipanga kueyela bimpe, dilotakana ne lufu. Kudi mua kuvuija muntu munu wa diamba wa kalanda musenga, ne kumufikisha ku dibunda bilumbu. Dikuatshika maluvu didi padi ne bipeta bibi bia muomumue. (Nsumuinu 23:29-35) Bantu badi badifile mu buenzavi bua nunku badi mua kuela meji ne: badi ne budikadidi, kadi kunyima badi balua kujingulula ne: mbalue bapika ba mpekatu. Mpekatu ki mmulombodi wa tshikisu anyi? Kuelangana meji bua bualu ebu bituadijile ku mpindieu kudi mua kutuepula ku dikala ku bulombodi bua mpekatu.—Galatia 6:7, 8.
Kudi ntatu ituadijila
13. (a) Mmushindu kayi utu majinga adi afikisha ku ntatu atamba kujuka? (b) Bua kumanya tshidi “malunda mabi,” mmuenenu wa nganyi utudi ne bua kulonda? (c) Paudi wenda wandamuna nkonko idibu bele mu tshikoso tshia 13, keba bua kumanya mmuenenu wa Yehowa.
13 Ntatu eyi itu itamba kutuadijila penyi? Bible udi umvuija ne: ‘Muntu yonso udi uteyibua kudi lukuka luende pamukokalu ne pamulobeshalu. Pashishe lukuka, pimitalu, ludi lulela bubi: ne bubi, pakolabu, budi bulela lufu.’ (Yakobo 1:14, 15) Mmunyi mudi lukuka lujuka? Nku malu adi abuela mu lungenyi lua muntu. Bitu bitamba kuenzeka nunku padi muntu mutute tshibanza anyi wendakana ne bantu badi kabayi batumikila mêyi a mu Bible. Bushuwa, tuetu bonso tudi bamanye se: tudi ne bua kuepuka “malunda mabi.” (1 Kolinto 15:33) Kadi mmalunda kayi adi mabi? Mmunyi mudi Yehowa umona bualu ebu? Kuelangana meji bua nkonko idi ilonda eyi ne kubala mvese idibu batele nekutuambuluishe bua kufika ku nkomenu muakane.
Padi bamue bantu bikale bamueneka ba kunemeka bidi bileja ne: mbalunda bimpe anyi? (Genese 34:1, 2, 18, 19)
Miyuki yabu, pamu’apa ne bilele bidibu batuela bidiku bileja ni tudi anyi katuena balunda babu ba pa muoyo anyi? (Efeso 5:3, 4)
Mmunyi mudi Yehowa umvua patudi tushemeja bulunda ne bantu badi kabayi bamunange? (2 Kulondolola 19:1, 2)
Nansha bituikala tuya mu kalasa anyi tuenza mudimu pamue ne bantu badi kabayi bena Kristo netu, bua tshinyi tudi ne bua kuikala ne budimu? (1 Petelo 4:3, 4)
Kutangila televizion ne filme, kutangila malu a ku Internet ne kubala mikanda, bibejibeji ne bikandakanda mmishindu ya kutantshila bakuabu. Mbintu kayi bidimu bitudi ne bua kuepuka? (Nsumuinu 3:31; Yeshaya 8:19; Efeso 4:17-19)
Bilondeshile bantu batudi tusungula bua kuikalabu balunda betu, tudi tuleja ne: tudi bantu ba mushindu kayi kumpala kua Yehowa? (Musambu 26:1, 4, 5; 97:10)
14. Mbudikadidi bunene kayi budi buindile aba badi batumikila ne lulamatu mibelu ya mu Dîyi dia Nzambi?
14 Bukua-panu bupiabupia bua Nzambi bukadi pabuipi. Ku diambuluisha dia Bukalenge bua Nzambi bua mu diulu, bukua-bantu nebumbushibue ku buenzavi bua Satana ne bua bulongolodi buende bujima. Ku kakese ku kakese, nebumbushile bantu bena butumike bipeta bibi bionso bidi mpekatu mukebeshe, mubidi wabu ne lungenyi luabu nebilue bipuangane, nunku nebapete muoyo wa kashidi mu mparadizu. Bifukibua bionso nebipete budikadidi budi bupetangana menemene ne ‘nyuma wa [Yehowa].’ (2 Kolinto 3:17) Udi mua kubenga mpindieu bua kutumikila mibelu idi mu Dîyi dia Nzambi ne kuanyisha bua kujimija bintu bionso ebi anyi? Tukuatayi mudimu bimpe ne budikadidi buetu bua bena Kristo butudi nabu lelu’eu ne tulejayi bonso patoke ne: tudi basue kupeta menemene “[budikadidi] bua butumbi bua bana ba Nzambi.”—Lomo 8:21.
Diambulula
• Mbudikadidi bua mushindu kayi buvua nabu mulume ne mukajende ba kumpala? Mmunyi mudi budikadidi abu bushilangane ne nsombelu udi nende bantu lelu’eu?
• Mbudikadidi kayi budi nabu bena Kristo balelela? Mmunyi mudibi bishilangane ne tshidi bena panu bangata lelu’eu bu budikadidi?
• Bua tshinyi kuepuka malunda mabi kudi ne mushinga wa bungi? Bishilangane ne Adama, mmapangadika a nganyi pa bidi bitangila tshidi tshibi atudi tuitaba?
[Bimfuanyi mu dibeji 46]
Dîyi dia Nzambi didi ditudimuija ne: “Kanudingibu; malunda mabi adi anyanga malu makane a bantu”