Nshapita Wa Makumi Abidi Ne Umue
Dijinga dia Yehowa didi dikumbana mu mushindu wa dikema
1, 2. (a) Dijinga dia Yehowa didi tshinyi pa bidi bitangila bifukibua biende bia lungenyi? (b) Mbanganyi bavua babuele mu dîku dia Nzambi dia batendeledi bende didi mu buobumue?
YEHOWA udi ujinga bua bifukibua bia lungenyi bionso bikale mu buobumue, buonso buabi bitendelele Nzambi umuepele mulelela, ne bua bionso kuikalabi mu budikadidi bunene bua bana ba Nzambi. Ke tshidi kabidi bantu badi banange buakane bajinga ne muoyo mujima.
2 Yehowa wakatuadija kukumbaja dijinga diende dinene edi pakabangaye kufuka. Tshifukibua tshiende tshia kumpala tshivua Muanende udi muikale katshia ku dibika diende ku lufu ‘dinkenka dikole dia butumbi buende ne tshimfuanyi mene tshia bunzambi buende.’ (Ebelu 1:1-3) Muana eu amu yeye umuepele ke uvua Nzambi nkayende mufuke kakuyi diambuluisha dia mukuabu muntu. Pashishe, bifukibua bikuabu bionso biakalua kufukibua ku butuangaji bua Muana eu: kumpala bakafuka banjelu mu diulu, ne pashishe bantu pa buloba. (Yobo 38:7; Luka 3:38) Bifukibua bionso e kuenza dîku dimue. Yehowa uvua Nzambi, Mukalenge Mutambe Bunene ne Tatu wa dinanga wa bifukibua bionso.
3. (a) Ntshinyi tshitudi tuetu bonso bapiane kudi baledi betu ba kumpala? (b) Mbualu kayi buvua Yehowa mulongoluele ndelanganyi ya Adama ne dinanga dionso?
3 Pakafundila Nzambi baledi betu ba kumpala tshibawu tshia lufu bua mpekatu wakenzabu ku bukole, wakababenga ne kubipata mu Edene. Kabatshivua kabidi bababala bu bena mu dîku diende dia ba mu diulu ne pa buloba to. (Genese 3:22-24; Dutelonome 32:4, 5) Tuetu bonso tudi ndelanganyi yabu, nunku tudi baledibue ne meji a dienza mpekatu. Kadi Yehowa uvua mumanye bimpe ne: bamue ba ku ndelanganyi ya Adama ne Eva nebanange malu makane. Nunku Wakalongolola ne dinanga dionso bua mushindu uvua bantu abu mua kufika ku “budishikaminyi [anyi budikadidi] bua butumbi bua bana ba Nzambi.”—Lomo 8:20, 21.
Nzambi udi ulekela kuanyisha bena Isalele
4. Ndiakalenga kayi divua Yehowa mupeteshe bena Isalele ba kale?
4 Bidimu bu 2 500 bimane kupita kunyima kua difukibua dia Adama, Yehowa wakapetesha bantu bakuabu diakalenga dia kudiabu Nende malanda a pa buawu. Wakasungula bena Isalele ba kale bua kuikalabu tshisamba tshiende ne kubapeshaye Mikenji yende. (Genese 12:1, 2) Wakabavuija tshisamba tshimue ne kukuataye nabu mudimu mu diumvuangana ne dijinga diende. (Dutelonome 14:1, 2; Yeshaya 43:1) Kadi batshivua anu ku bupika bua mpekatu ne lufu, nunku kabakapeta budikadidi bua buena buvua nabu Adama ne Eva ku tshibangidilu to.
5. Bena Isalele bavua bajimije diakalenga dia pa buadi divua Nzambi mubapeshe munyi?
5 Nansha nanku, Nzambi uvua anu muanyishe bena Isalele. Bavua kabidi ne dibanza dia kunemeka Yehowa bu Tatu wabu ne kuenza malu umvuangana ne dijinga diende. Yezu wakaleja bua tshinyi bidi bikengela kuenza nunku. (Matayo 5:43-48) Kadi bena Isalele bakapangila mua kukumbaja bualu ebu. Nansha muvuabu bamba ne: “tudi ne Tatu umue, Nzambi mene,” Yezu wakamba ne: bienzedi biabu ne lungenyi luvuabu nalu kabivua bipetangana ne tshivuabu bamba atshi to. (Yone 8:41, 44, 47) Mu tshidimu tshia 33 B.B., Nzambi wakashipa bua kashidi Mikenji ya Mose, malanda a pa buawu avua bena Isalele nawu ne Nzambi e kufua pawu. Kadi mbuena kuamba ne: bantu kabavua kabidi mua kushemeja bulunda ne Nzambi anyi?
Disangisha dia “bintu bidi mu diulu”
6. “Dikumbana” anyi bulongolodi budi Paulo mutele mu Efeso 1:9, 10 budi ne tshipatshila kayi?
6 Mupostolo Paulo wakaleja ne: bamue bantu bavua mua kudia malanda a pa buawu ne Nzambi. Tshilejilu, Paulo wakafunda bua bidi bitangila tshidi Yehowa mulongolole bua badi ne ditabuja bonso balue bena mu dîku Diende ne: ‘[Nzambi] wakatumanyisha bualu busokoka bua mu disua diende bu mudi disanka diende dimpe diakasunguleye munda muende, too ne palua tshikondo tshia dikumbana dia bipungu, bua kusangisha bintu bionso mu Kristo, ne bidi mu diulu ne bidi panshi pa buloba.’ (Efeso 1:9, 10) “Dikumbana” edi anyi bulongolodi ebu mbuimanyine padi Yezu Kristo. Bantu badi bafika ku dibanyisha kudi Nzambi ku butuangaji buende. Bakese ba kudibu badi ne ditekemena dia kuya mu diulu. Ba bungi nebasombe pa buloba tshiendelele.
7. Mbanganyi badi ‘bintu bidi mu diulu’?
7 Tshia kumpala, kubangila mu Pentekoste wa tshidimu tshia 33 B.B., bakatuma ntema ku ‘bintu bidi mu diulu,’ mmumue ne: bantu bavua ne bua kupiana Bukalenge bua mu diulu pamue ne Kristo. Bua ditabuja diabu dia mulambu wa Yezu, bakababala kudi Nzambi bu bantu bakane. (Lomo 5:1, 2) Pashishe, bakangata kabidi bena Yuda ne bena bisamba bia bende, bua ‘bintu bidi mu diulu’ kufika ku bungi bukumbane bu 144 000. (Galatia 3:26-29; Buakabuluibua 14:1) Anu bashadile ba kudibu ke batshidi pa buloba.
Disangisha dia ‘bintu bidi panshi pa buloba’
8. Mbanganyi badi ‘bintu bidi panshi pa buloba,’ ne badi ne malanda kayi ne Yehowa?
8 Bulongolodi bumue bumue ebu budi kabidi busangisha ‘bintu bidi panshi pa buloba.’ Mpindieu badi benda basangisha bantu miliyo mivule badi ne ditekemena dia kusomba tshiendelele pa buloba. Badi batumbisha dîna dia Yehowa ne banyisha ntendelelu wende, eku bikale mu buobumue ne bashadile ba ku bantu bapiana Bukalenge. (Yeshaya 2:2, 3; Sefanya 3:9) Badi kabidi bakula ne Yehowa bu “Tatu” wabu bualu mbajadike ne: yeye ke mpokolo wa muoyo. Yehowa udi kabidi ubanyisha bua ditabuja didibu nadi mu mashi a Yezu akapumunyibua. (Buakabuluibua 7:9, 14) Kadi bu mutshidibu bapange bupuangane, nebalue kubitaba menemene bu bana ba Nzambi mu matuku atshilualua.
9. Lomo 8:21 udi ulaya bantu bualu kayi?
9 Bantu aba badi ne ditekemena dia kusomba pa buloba badi mpindieu bindila ne muoyo kuulukuulu tshikondo tshikala bantu mua ‘kupikudibua ku bupika bua dibola.’ (Lomo 8:21) Dipikudibua edi nedituadije kunyima kua Kristo ne biluilu biende bia mu diulu bimane kutuala dikenga dinene mu tshikondo tshia Armagedone. Nunku, bulongolodi bubi bua Satana buonso bujima nebubutudibue, ne pashishe nekulue mabenesha a mu Bukokeshi bua Bidimu Tshinunu bua Bukalenge bua Kristo.—Buakabuluibua 19:17-21; 20:6.
10. Basadidi ba Yehowa nebimbe musambu kayi bua kutumbisha Nzambi?
10 Nebikale disanka dia bungi be pikala basadidi ba Yehowa badi pa buloba mua kudisanga mu buobumue ne kuambulula mêyi a basadidi ba Nzambi ba mu diulu, badi bamanyisha ne disanka dionso ne: ‘Mukalenge Nzambi wa Bukole Buonso, midimu yebe idi minene ne ya dikema. Wewe, Mukalenge wa bikondo, njila yebe idi miakane ne ya bulelela. Mukalenge, nganyi udi kayi utshina, udi kayi utumbisha dîna diebe? Bualu bua wewe nkayebe udi wa tshijila; bualu bua ba mu bisamba bionso nebalue ne nebakukuile kumpala kuebe; bualu bua bienzedi biebe biakane biakumueneshibua.’ (Buakabuluibua 15:3, 4) Eyowa, basadidi ba Yehowa bonso nebadisange mu ntendelelu wa Nzambi umuepele mulelela. Too ne bafue nebabike, ne nebadisange pabu kudi bakuabu aba bua kutumbisha Yehowa.—Bienzedi 24:15.
Budikadidi bunene budi kumpala eku
11. Mbudikadidi kayi bunene buapeta bantu bapanduka ku dikenga dinene?
11 Panyima pa dikenga dinene ne Armagedone (ndekelu wa dikenga dinene edi) bimane kubutula malu mabi pa buloba, Satana Diabolo kakuikala kabidi “nzambi wa tshikondo etshi” to. Batendeledi ba Yehowa kabakuikala kabidi ku buenzeji bubi bua Satana to. (2 Kolinto 4:4; Buakabuluibua 20:1, 2) Bitendelelu bia dishima kabiakuikalaku kabidi bua kunyangila Yehowa lumu ne kusaka bantu ku ditapulukangana to. Basadidi ba Nzambi mulelela kabakukenga kabidi bua kansungasunga ne tshikisu bia bakokeshi ba panu to. Bushuwa, nekuikale budikadidi bunene!
12. Mmushindu kayi wikala bantu bonso mua kupikudibua ku mpekatu ne bipeta biayi?
12 Bu mudi Yezu muikale ‘Muan’a mukoko wa Nzambi udi umusha bubi bua ba pa buloba,’ neakuate mudimu ne mulambu wende bua kujimija mpekatu ya bantu. (Yone 1:29) Pavua Yezu pa buloba ne pakabuikidilaye muntu mukuabu mpekatu yende, wakamuondopa bua kujadika muanda eu. (Matayo 9:1-7; 15:30, 31) Bia muomumue, bu mudi Kristo Yezu muikale Mukalenge wa Bukalenge bua Nzambi mu diulu, neondape bampofo, tumama, ba-mpudi matshi, balema, badi ne masama a mutu ne bena masama makuabu kabukabu mu tshishima. (Buakabuluibua 21:3, 4) Nebumushile bena butumike bonso ‘mukenji wa bubi’ bua meji abu ne bienzedi biabu bikale bibasankisha ne bisankisha kabidi ne Nzambi. (Lomo 7:21-23) Ku ndekelu kua Bukokeshi bua Bidimu Tshinunu, nebalue bapuangane, mu ‘tshimfuanyi’ tshia Nzambi umuepele mulelela.—Genese 1:26.
13. Ku ndekelu kua Bukokeshi bua Bidimu Tshinunu, Kristo neenze tshinyi, abi nebifikishe ku tshinyi?
13 Yezu pafikishaye bantu ku bupuangane, neapingajile Tatuende bukenji buvuaye mumupeshe bua kuenza mudimu eu; Bible udi wamba ne: ‘Pafilaye bukalenge kudi Nzambi, Tatu mene, pajimijeye makalenge onso makuabu ne bukokeshi buonso ne bukole. Budiye nabu mbua kukokesha too ne patekaye bena lukuna nende bonso muinshi mua makasa ende.’ (1 Kolinto 15:24, 25) Dîba adi Bukokeshi bua Bidimu Tshinunu bua Bukalenge nebuikale bukumbaje tshishiki tshipatshila tshiabu; nanku kabiakukengela kabidi bua bukalenge ebu kuikalabu pankatshi pa Yehowa ne bantu nansha. Bu muikala mpekatu ne lufu bimana kumbusha bionso, ne bantu bapikula, kabiakukengela kabidi bua Yezu kukuataye mudimu wa Mupikudi to. Bible udi umvuija ne: ‘Muana muine kabidi neatekibue muinshi mua Tatu wakateka bintu bionso muinshi muende, bua Nzambi kuikala ku mutu kua bionso ne mu bintu bionso.’—1 Kolinto 15:28.
14. Nebapitshishe bantu bonso bapuangane mu tshinyi, ne mbua tshinyi?
14 Pashishe, nebapeshe bantu mushindu wa buobu kulejabu se: mbasungule bua kukuatshila Nzambi umuepele mulelela mudimu kashidi ne tshiendelele. Nunku, bangabanga ne Yehowa kuangataye bantu bonso aba bu bana bende, neanji kubapitshisha mu diteta dia ndekelu. Nebapatule Satana ne ba-demon bende mu dijimba muvuabu babele. Ebi kabiakutamba kutatshisha badi banange Yehowa bushuwa to. Kadi bantu bonso badilekelela babasaka ku dibenga kutumikila Yehowa, nebababutule bua kashidi, buobu bonso pamue ne ntomboji eu wa ku tshibangidilu ne ba-demon bende.—Buakabuluibua 20:7-10.
15. Nnsombelu kayi wikalaku tshiakabidi munkatshi mua bifukibua bionso bia lungenyi bia Yehowa?
15 Nunku, Yehowa neangate bantu bonso bapuangane batua bumfumu buende nyama ku mikolo mu diteta dia ndekelu adi bu bana bende. Kubangila ku tshikondo atshi, nebasanke tshishiki mu budikadidi bunene bua bana ba Nzambi bikale bena mu dîku dia Nzambi dia bifukibua bionso. Bifukibua bionso bia lungenyi bia mu diulu ne bia pa buloba nebitendelele kabidi Nzambi umuepele mulelela mu buobumue. Dîba adi, dijinga dia Yehowa nedikale dikumbane bimpe menemene! Udiku musue kuikala mu dîku adi dia badi mu diulu ne badi panshi pa buloba, dîku dia disanka ne diashala kashidi ne tshiendelele anyi? Biwikale musue kuikalamu, tudi tukulomba bua kutumikila tshidi Bible wamba mu 1 Yone 2:17 ne: “Buloba budi bujimina ne lukuka luabu kabidi; kadi yeye udi wenza mudi disua dia Nzambi udi ushalaku tshiendelele.”
Diambulula
• Bangabanga ne buntomboji bua mu Edene kuenzekabu, batendeledi ba Yehowa bonso bavua nende malanda kayi?
• Bantu bonso badi bikale basadidi ba Nzambi badi ne bujitu kayi?
• Bikala mua kulua bana ba Nzambi mbanganyi, ne muanda eu udi upetangana munyi ne dijinga dia Yehowa pa bidi bitangila buobumue bua ntendelelu?
[Tshimfuanyi mu dibeji 190]
Bantu ba butumike nebapete muoyo wa disanka mu mparadizu pa buloba bujima