TSHITUPA TSHIA 8

Patuka mu tshitendelelu tshia dishima, ubuele mu tshilelela!

1. Bua bidi bitangila ntendelelu, ntshinyi tshidi bantu ne bua kusungula lelu’eu?

YEZU wakamba dimue dituku ne: ‘Udi kayi nanyi udi umpidia.’ (Matayo 12:30) Tudi ne bua kuikala ku luseke lumue: lua Yehowa anyi lua Satana. Bantu ba bungi badi bela meji ne: badi basadila Nzambi mu mushindu udiye wanyisha, kadi Bible pende eku wamba ne: Satana udi ‘mudingi wa ba pa buloba.’ (Buakabuluibua 12:9) Bantu mbombo ne nsanzu badi bamba ne: badi batendelela Nzambi, kadi pabu udibu batendelela n’Satana Diabolo! Bantu lelu’eu badi ne bua kusungula: kusadila Yehowa “Nzambi wa bushuwa,” peshi Satana, ‘tatu wa mashimi.’—Musambu 31:5; Yone 8:44.

Patuka mu tshitendelelu tshia dishima

2. Ng’umue mushindu kayi udi Satana uteta bua kupangisha bantu bua kabatendeledi Yehowa?

² Kusungula bua kuenzela Yehowa mudimu ndipangadika dia meji, didi dienza bua Nzambi anyishe muntu udi udiangata. Kadi Satana kêna usanka bua kumona muntu utendelela Nzambi to; udi ukebela bonso badi basadila Nzambi ntatu. Tshilejilu, udi mua kuenza bua balela ne balunda betu anyi bakuabu bantu kuikalabu batuseka anyi batuluisha. Yezu wakatudimuisha ne: “Baluishi ba muntu nebikale anu bena diku diabu.”—Matayo 10:36, MMV.

3. Ntshinyi tshiwenza bikala bena dîku dienu anyi balunda bebe bakuluisha bua ntendelelu webe wa Nzambi?

³ Bu biobi mua kukufikila nenku, ntshinyi tshiwenza? Bantu ba bungi mbamanye bimpe ne: ntendelelu wabu ki mmuimpe to, kadi badi belakana bua kumulekela. Badi bela meji ne: kumulekela nkupanga lulamatu kudi bena dîku diabu. Kadi meji a nunku mmimpe anyi? Wewe mumvue ne: balela bebe kampanda badi banua diamba, kuakubalejaku njiwu ya dinua dia diamba anyi? Kuakuditua nabu mu dinua dia diamba to, ki mmuomu anyi?

4. Yoshua wakambila bena Isalele tshinyi bua bidi bitangila ntendelelu mu tshikondo tshiabu?

⁴ Yoshua wakalomba bena Isalele bua kulekela bienzedi bibi bia ntendelelu mubi ne bilele bia bankambua babu. Wakamba ne: ‘Nunku nutshine Yehowa, numukuatshile mudimu ne muoyo wonso udi kauyi ne lubombo, numushe nzambi yakakuatshila bankambua benu mudimu dishiya dia musulu wa Pelata ne mu Ejipitu; nukuatshile Yehowa mudimu.’ (Yoshua 24:14) Bu muvua Yoshua uvua mulamate Nzambi, Yehowa wakamubenesha. Tuetu bikale balamate Yehowa, neatubeneshe petu.—2 Samuele 22:26.

Amue malongesha a mu bitendelelu: malelela ne a dishima

Busatu Bunsantu: Bitendelelu bia bungi bidi bilongesha ne: Nzambi udi Busatu Bunsantu. Bidi biamba ne: “Tatu udi Nzambi, Muana [Yezu] udi Nzambi, ne Nyuma Muimpe udi Nzambi, kadi kakuena Nzambi isatu nansha, Nzambi udi anu umue.”

Mu Bible kamuena nansha muaku “Busatu Bunsantu” to, kabidi Bible katu ulongesha ne: Yehowa udi bantu basatu mu muntu umue to. Yehowa nkayende ke udi Nzambi. Kolinto wa kumudilu 8:6 udi wamba ne: “Buetu tuetu, kudi [Nzambi] anu umuepele, Tatu mufuki wa bintu bionso.” (MMV) Yehowa ke udi Mutambe Bunene. Yezu ki n’Nzambi to, kadi udi “Muana wa Nzambi.” (1 Yone 4:15) Bia muomumue, nyuma ta spiritu munsantu ki Nzambi to. Nyuma muimpe ki mmuntu nansha. Mbukole buenzeji bua Nzambi.—Bienzedi 1:8; Efeso 5:18.
Anyima: Bitendelelu bia bungi bidi bilongesha ne: anyima ntshintu tshitu katshiyi tshifua, tshidi munda mua muntu. Bible udi ulongesha ne: anyima ke muntu muine, ne tudi bamanye bimpe ne: muntu udi mua kufua.—Genese 2:7; Yehezekele 18:4.
Inferno wa kapia: Bitendelelu bia dishima bidi bilongesha ne: badi bakengesha anyima ya bantu babi kashidi ne tshiendelele mu inferno. Bible udi wamba ne: bafue “ki mbamanye bualu [nansha] bumue.” (Muambi 9:5) Bible udi kabidi ulongesha ne: “Nzambi udi dinanga.” (1 Yone 4:8) Yehowa, Nzambi wa dinanga, kêna mua kukengesha bantu mu kapia nansha.

Kazubu: Ntshinyi tshidi Bible ulongesha pa bidi bitangila Busatu Bunsantu, anyima ne inferno wa kapia?

Umbusha bintu bidibu benza nabi mudimu mu ntendelelu wa dishima

5. Bua tshinyi tudi ne bua kuosha bintu bionso bia majimbu?

⁵ Kupatuka kashidi mu tshitendelelu tshia dishima kudi kabidi kumvuija kuosha bintu bionso bia majimbu bitudi mua kuikala nabi, bu mudi: manga, bijimba, mpete ne bikanu bia majimbu ne bikuabu. Kuenza nunku kudi ne mushinga bualu kudi kuleja ne: tudi tueyemena Yehowa ne muoyo wetu mujima.

6. Bena Kristo ba kumpala bakenza tshinyi ne mikanda yabu ya majimbu?

⁶ Mona tshiakenza bamue bena Kristo ba kumpala pakasungulabu bua kulonda ntendelelu mulelela. Bible udi wamba ne: “Bantu bavule bavua benza malu a majimbu, kufika ne mikanda yabu, kuyosha, bantu bonsu bamone.”—Bienzedi 19:19, MMV.

7. Ntshinyi tshitudi mua kuenza ba-demon buobu batutatshisha?

⁷ Bamue badi batuadije kusadila Yehowa ne bavua kumpala ku mupongo, bapakishi ta bapakidianganyi ba mitshi anyi benji ba majimbu badi mua kubatatshisha kudi ba-demon. Biobi mua kukufikila: sambila Yehowa ne dîyi dikole, tela dîna diende. Neakuambuluishe.—Nsumuinu 18:10; Yakobo 4:7.

8. Mmunyi mudi bena Kristo bangata mpingu ne bimfuanyi bidi bantu batendelela nabi?

⁸ Bantu badi basue kuenzela Yehowa mudimu kabena ne bua kuikala balame anyi bakukuila mpingu anyi bimfuanyi bia mu ntendelelu wa dishima to. Bena Kristo balelela ‘badi benda bua ditabuja, ki mbua bintu bidi bimueneka ku mêsu’ nansha. (2 Kolinto 5:7) Badi banemeka mukenji wa Nzambi udi ukandika ditendelela ne mpingu anyi bimfuanyi.—Ekesode 20:4, 5.

Udisangishe ne bantu ba Yehowa

9. Mmubelu kayi udi Bible ufila bua bidi bitangila mushindu utudi mua kulua bena meji?

⁹ Bible udi wamba ne: ‘Udi wenda ne bena meji udi ulua muena meji.’ (Nsumuinu 13:20) Tuetu basue kuikala bena meji, mbimpe tuende anyi tudisangishe ne Bantemu ba Yehowa. Bualu buobu mbantu badi bendela mu njila udi ufikisha ku muoyo.—Matayo 7:14.

10. Mmunyi mudi Bantemu ba Yehowa mua kukuambuluisha bua kukuatshila Nzambi mudimu?

¹⁰ Bantemu batu bushuwa baditatshisha bua bantu nabu. Mudimu wabu ng’wa kuambuluisha bantu badi banange malu mimpe bua bumvue bulelela bua mu Bible budi bufikisha ku muoyo wa tshiendelele. Badi mua kulonga nebe Bible bua kukuambuluisha kabayi bakulomba difutu. Nebandamune nkonko yebe ne nebakuleje mua kutumikila malongesha a mu Bible mu nsombelu webe.—Yone 17:3.

11. Mmunyi mudi bisangilu bia bena Kristo mua kukuambuluisha?

¹¹ Mu bisangilu biabu bitu pa tshibidilu bienzekela ku Nzubu wa Bukalenge, neulonge malu a bungi adi atangila njila ya Yehowa. Nebakoleshe dijinga diebe dia kuikala mu ntendelelu mulelela. Nebakulongeshe muudi pebe mua kuambuluisha bakuabu bua bamanye bulelela bua mu Bible.—Ebelu 10:24, 25.

12. Mmunyi mudi disambila mua kukuambuluisha bua kuenzela Nzambi mudimu?

¹² Paudi wenda umanya malu a bungi adi atangila Yehowa ne majinga ende, neulue kunanga njila yende bikole. Neukoleshe kabidi dijinga diebe dia kuenza malu adi amusankisha ne kuepuka adi kaayi amusankisha. Wavuluka ne: udi mua kulomba Yehowa bua akuambuluishe wenze malu makane ne wepuke malu mabi.—1 Kolinto 6:9, 10; Filipoi 4:6.

13. Mmunyi muudi mua kusankisha mutshima wa Yehowa?

¹³ Mu kupita kua matuku, paudi wenda ukola mu nyuma, kakuyi mpata neulue kumona mudibi bikengela bua wewe kudilambula ne pashishe kutambula bua kulua Ntemu wa Yehowa. Paudi ubuela mu mulongo wa bena mudimu ba Yehowa, udi usankisha mutshima wa Yehowa. (Nsumuinu 27:11) Newikale munkatshi mua bantu ba disanka badi Nzambi wamba bua bualu buabu ne: ‘Nengikale munda muabu; nengikale Nzambi wabu ne buobu nebikale bantu banyi.’—2 Kolinto 6:16.

Ngakadiapuka mu bianza bia ba-demon

Dimue edi butuku, meme mulale tulu mu bulalu pamue ne bayanyi, meme kumvua dîyi dia muntu dimbikila misangu isatu mijima. Pashishe, meme kumona mulu mu malata mupanduluka bipese bibidi, tshintu tshivungamane bu ndundu tshiteme kapia tshimmatshila tshimbuela munda. Bayanyi kavua yeye mumone tshintu nansha tshimue to. Kadi, munkatshi mua ngondo ya bungi, munda muakashala mumpepe kapia.

Kunyima kua ngondo isambombo, ngakumvua dîyi adi dimbikila kabidi. Diakamue, meme kumona nzubu mujima muenze bu uvua munkatshi mua mâyi male menemene. Nyoka munene wa moma wakapatuka mu mâyi amu ne kudijingila ku tshianza tshianyi. Meme kutata bua kumumbusha e kupanga. Mvua ne buôwa wa ba buôwa. Katupa aka, mâyi au ne nyoka au e kujiminabi, ne kunyima kunkululabu panshi bibi be. Ngakashala mufue tshipuka munkatshi mua mêba a bungi. Pashishe, meme kumvua dîyi adi dingambila bua kuya ku tshitanda kampanda tshia nzambi tshia mu musoko amu kutubu buondapangana mu tshishima. Pangakebeja nyuma ta mukishi au dîna diende, wakangambila dîna kampanda divua diumvuija ne: “mubanji wa kayi muana.” Wakandaya bua kumvuija mubanji ku diambuluisha dia bukole bua diondopangana buvuaye mua kumpesha.

Babedi bavua pamue netu ne ba kule bakatuadija kulua kuntangila. Bangabanga ne kufikabu kuanyi, mvua ndianjila kubamuena mu lumuenu luanyi luvua lua pa bualu. Pashishe, pavua mubedi ufika, mvua ndaba tshianza tshianyi munda mua tshiende, ne diakamue mvua mmanya tshivuaye usama ne buanga bua kumuondopa nabu. Mukishi uvua kabidi ungambila bungi bua makuta avua babedi ne bua kufuta.

Bua mushindu umvua ngondapa bantu bilenga, ngakabueja makuta ne bintu bungi tshianana. Meme kulua “mubanji,” kadi meme kujingulula kabidi tshivua wa “kayi muana” umvuija. Musangu wonso pamvua ngimita difu ndela, muana uvua muledibue kumpala kua eu uvua ufua. Bivua binnyingalaja bikole. Mu bidimu 12 bingakakuatshila nyuma au mudimu, ngakafuisha bana basambombo.

Ngakatuadija kusambila Nzambi bua angambuluishe. Ngakasambila ne muoyo umue. Dimue edi Bantemu ba Yehowa e kukokola ku tshibi tshianyi. Nansha mumvua ne tshibidilu tshia kubipata, dituku adi ngakitaba bua kubateleja. Mu diyikila nabu misangu yakalonda, ngakalua kumanya se: mvua ngenzela ba-demon mudimu! Ngakangata dipangadika dia kulekela malu a bakishi aa.

Pangakambila mukishi au bualu abu, wakankanyina bikole. Kadi ngakamuambila ne: “Wewe ne meme kuajiki!”

Ngakuosha bintu bionso bimvua ngenza nabi mudimu wa mbuku. Ngakalonga Bible ne Bantemu, meme kulua muena mudimu wa Yehowa ne kutambula mu tshidimu tshia 1973. Mpindieu ndi ne bana batanu bonso bikale ne mubidi tumatuma. Bayanyi wakalua kutambula, e kuluaye pende Ntemu wa Yehowa.—Muyuki mulonda kudi Josephine Ikezu.

Kazubu: Muntu mukaji mukuabu wakafika ku dishipa malanda ende ne ba-demon mushindu kayi?