Kudienji muivi nansha!

BAKADIKU bakuibe tshintu anyi?​— Uvua mumvue munyi?​— Muntu uvua muibe au mmuivi, ne muntu nansha umue katu musue muivi to. Udi wela meji ne: muntu utu ulua muivi munyi? Batu bamulele nanku anyi?​—

Tudi tufuma ku dilonga ne: bantu badi baledibua ne mpekatu. Nunku tuetu bonso tudi bapange bupuangane. Kadi muntu nansha umue ki mmuledibue muivi to. Muivi udi mua kufumina mu dîku dia bantu ba bikadilu bilenga. Baledi bende ne bana babu badi mua kuikala bantu ba malu mimpe. Kadi dijinga dia muntu nkayende dia bintu bu mudi makuta ne bidi makuta mua kusumba didi mua kumufikisha ku dilua muivi.

Nnganyi uudi mua kuamba ne: uvua muivi wa kumpala?​— Tuanji tuele meji pa bualu ebu. Mulongeshi Munene uvua mumanye muntu au pavuaye mu diulu. Muivi au uvua muanjelu. Kadi bu muvua Nzambi mufuke banjelu bonso bapuangane, mmushindu kayi uvua muanjelu au mulue muivi?​— Bulelela, anu mutuvua balonge mu nshapita wa 8, muanjelu au wakajinga tshintu tshivua katshiyi tshiende to. Utshidi muvuluke tshintu atshi anyi?​—

Kunyima kua Nzambi mumane kufuka mulume ne mukaji ba kumpala, muanjelu au wakajinga bua bikale bamutendelele yeye. Kavua ne bukenji bua kumutendelelabu to. Bavua ne bua kuikala batendelela anu Nzambi. Kadi yeye wakamuiba! Pakakokaye Adama ne Eva bua bamutendelele, muanjelu au wakalua muivi. Wakalua Satana Diabolo.

Ntshinyi tshidi tshisaka muntu bua kuluaye muivi?​— Ndijinga dia kupeta tshintu tshidi katshiyi tshiende. Dijinga adi didi mua kukola menemene kufikisha too ne bantu bimpe ku dienza malu mabi. Misangu mikuabu, bantu badi balua bivi kabatu nansha banyingalala ne benza kabidi malu mimpe to. Umue wa kudibu uvua mupostolo wa Yezu. Dîna diende divua Yudasa Isakaliote.

Yudasa uvua mumanye ne: kuiba kuvua kubi, bualu bavua bamulongeshe Mikenji ya Nzambi katshia anu ku buana buende. Uvua mumanye ne: Nzambi uvua muakule dituku dikuabu mu diulu wambila bantu bende ne: ‘Kanuibi.’ (Ekesode 20:15) Pakakolaye, Yudasa wakapetangana ne Mulongeshi Munene, yeye kulua muyidi wende. Pashishe, Yezu wakamusungula bua kuluaye umue wa ku bapostolo bende 12.

Yezu ne bapostolo bende bavua benza ngendu pamue. Bavua badia biakudia biabu pamue. Ne makuta onso avua tshisumbu tshiabu atshi tshipeta bavua baalama mu kashete. Yezu wakapesha Yudasa kashete aku bua akalame. Bushuwa, makuta kaavua a Yudasa to. Kadi udi mumanye tshivua Yudasa muenze kunyima kua matuku anyi?​—

Yudasa wakatuadija kuangata makuta mu kashete dîba divuaye kayi ne bua kualenga. Uvua wangata makuta bakuabu kabayi bamanya, ne wakakeba too ne mua kuapeta a bungi mu mishindu mikuabu kabidi. Wakabangisha kutuma meji ku makuta dîba dionso. Tumone mpindieu kuvua dijinga dibi edi dimufikishe matuku makese kumpala kua kushipabu Mulongeshi Munene.

Mariya, muanabu ne Lazalo mulunda wa Yezu, wakangata manyi a mushinga mukole ne kuapongololaye pa makasa a Yezu. Kadi Yudasa wakadiabakena. Udi mumanye bua tshinyi uvua mudiabakene anyi?​— Wakamba ne: bavua mua kupanyisha manyi au ne kupesha bapele makuta. Kadi uvua musue anu bua makuta ikale mu kashete bua amone mua kuiba bimpe.​—Yone 12:1-6.

Yezu wakambila Yudasa bua alekele kutatshisha Mariya uvua muleje muoyo muimpe. Yudasa kakanyisha tshiakamuambila Yezu atshi to, nunku wakaya kudi bakuidi banene bavua baluishi ba Yezu. Bavua bakeba kukuata Yezu, kadi bavua basue kumukuata butuku bua muntu kabamonyi to.

Yudasa wakambila bakuidi ne: ‘Nennuambile mushindu unudi mua kukuata Yezu nuenu bampeshe makuta. Nenumpeshe makuta bungi munyi?’

Bakuidi bakamuandamuna ne: ‘Netukupeshe mpalata makumi asatu.’​—Matayo 26:14-16.

Yudasa wakangata makuta. Bivua anu bu uvua upanyisha Mulongeshi Munene kudi bantu abu! Udi mua kuela meji ne: muntu udi mua kuenza bualu bubi bua mushindu eu anyi?​— Bia dibungama, ke bualu butu buenzeka patu muntu ulua muivi ne wiba makuta a bende. Utu unanga makuta kupita mudiye munange bantu bakuabu, nansha Nzambi muine.

Pamuapa udi mua kuamba ne: ‘tshiena mua kunanga tshintu tshikuabu kupita mundi munange Yehowa Nzambi to.’ Mbimpe wewe umvua nanku. Pavua Yezu musungule Yudasa bua kulua mupostolo wende, ke muvua Yudasa wamba pende imue misangu. Bakuabu batu balue bivi bavua mua kuikala bambe pabu nanku. Tuanji kuakula bua bamue ba kudibu.

Umue uvua musadidi wa Nzambi dîna diende Akana, uvua muikale ne muoyo bidimu bia bungi kumpala kua kulelabu Mulongeshi Munene. Akana wakamona tshilamba tshimpe tshia dikema, ne tshiamu tshia or ne makuta. Kabivua biende to. Bible udi wamba ne: bivua bia Yehowa bualu bavua babiangate kudi baluishi ba bantu ba Nzambi. Kadi Akana wakabijinga bikole, kufikaye too ne ku dibiba.​—Yoshua 6:19; 7:11, 20-22.

Tangila tshilejilu tshikuabu. Ku kale menemene, Yehowa wakasungula Davidi bua kuikalaye mukalenge wa tshisamba tshia Isalele. Dimue dituku, Davidi wakatuadija kutangila Beta-sheba uvua mukaji mulenga be. Wakatungunuka ne kutangila Beta-sheba ne kupeta meji a kumuangata bu mukajende ne kumuteka ku nzubu. Kadi Beta-sheba uvua mukaji wa Uliya. Ntshinyi tshivua Davidi ne bua kuikala muenze?​—

Davidi uvua ne bua kumusha lungenyi lua kulala ne Beta-sheba mu mutu muende. Kadi kakenza nanku to. Wakamuangata e kumuteka kumbelu. Pashishe wakashipesha Uliya. Bua tshinyi Davidi wakenza malu mabi aa?​— Bualu wakatungunuka ne kujinga mukaji uvua muikale mukaji wa muntu mukuabu.​—2 Samuele 11:2-27.

Bu muvua Davidi munyingalale, Yehowa wakamulekela ne muoyo. Kadi kutuadijila ku tshikondo atshi, Davidi wakapeta ntatu ya bungi. Muanende Abashaloma wakajinga kuangata nkuasa wa bukalenge wa Davidi. Nenku pavua bantu balua kumona Davidi, Abashaloma uvua ubela mu tshitupa ne ubatua mishiku. Bible udi wamba ne: ‘Abashaloma wakiba mitshima ya bena Isalele.’ Wakasaka bantu bua kumunangabu yeye bua alue mukalenge pamutu pa Davidi.​—2 Samuele 15:1-12.

Ukadiku mujinge tshintu kampanda bikole bu Akana, Davidi ne Abashaloma anyi?​— Tshintu atshi tshiotshi tshikale tshia muntu mukuabu, kutshiangata kabayi bakuanyishile nkutshiba. Utshidi muvuluke tshivua Satana, muivi wa kumpala musue anyi?​— Uvua musue bua bantu bamutendelele yeye pamutu pa buobu kutendelela Nzambi. Nunku Satana wakiba pakasakaye Adama ne Eva bua kumutumikila.

Padi muntu ne tshintu tshiende, udi ne bukenji bua kusungula muntu udi mua kuenza natshi mudimu. Tshilejilu udi mua kuya ne bana bakuabu kuabu bua kunaya nabu. Nebikale bimpe bua wewe kuangata tshintu kampanda kuine aku ne kulua natshi kuenu anyi?​— Tòo, anu tatuabu anyi mamuabu mukuambile ne: udi mua kuya natshi. Wewe muangate tshintu kuyi mubalombe, umanye ne: udi muibe.

Bua tshinyi muoyo udi mua kukusaka bua kuiba?​— Bualu udi musue tshintu tshidi katshiyi tshiebe to. Nansha muntu mukuabu kayi mukumone paudi utshiangata, nganyi udi ukumona?​— Yehowa Nzambi udi ukumona. Nenku tudi ne bua kuvuluka ne: Nzambi mmukine buivi. Nunku dinanga diudi munange Nzambi ne muntu nebe nedikuambuluishe bua kudienji muivi nansha.