Mushindu wa kusankisha Nzambi

NTSHINYI tshitudi mua kuenza bua kusankisha Nzambi? Tudi mua kumupesha tshintu kampanda anyi?​— Yehowa udi wamba ne: “Nyama yonso wa muitu nguanyi.” Udi wamba kabidi ne: “Bintu bia argent bidi bianyi, bintu bia or bidi bianyi.” (Musambu 24:1; 50:10; Hagai 2:8) Nansha nanku, kudi tshintu tshitudi mua kupesha Nzambi. Ntshintu kayi atshi?​—

Yehowa mmutulekele bua tusungule ni tudi basue anyi katuena basue bua kumuenzela mudimu. Kêna utuenzeja tshidiye musue ku bukole to. Tuanji tumone bua tshinyi Nzambi uvua mutufuke ne budikadidi bua kudisunguila bua kumuenzela anyi kubenga kumuenzela mudimu.

Pamuapa udi mua kuikala mumanye tshiamu tshia robot. Ntshiamu tshitu tshienza tshionso tshidi mutshienji musue. Nunku tshiamu tshia robot katshitu tshidisunguila bualu bua kuenzatshi to. Yehowa uvua mua kuikala mutuenze tuetu bonso bua tuikale anu bu biamu ebi. Uvua mua kuikala mutuenze mu mushindu wa tuetu kuikala tuenza anu tshidiye musue ne: tuenze. Kadi Nzambi kakenza nanku to. Udi mumanye bua tshinyi kavua muenze nanku anyi?​— Bintu bikuabu bia kunaya nabi bitu anu bu biamu bia robot. Padibu batua mbote kampanda, bidi bienza anu tshivua muntu uvua mubienze mulongolole bua kuikalabi bienza. Utuku ukadi mumone tshintu kampanda tshia kunaya natshi tshia mushindu eu anyi?​— Misangu ya bungi bitu bitonda bantu bua kunaya ne tshintu tshidi tshienza anu malu adibu badianjile kulongolola bua tshikale tshienza. Nzambi ki mmusue bua tumutumikile bu biamu bia robot bimana kulongolola bua kumuenzela mudimu to. Yehowa mmusue bua tumuenzele mudimu anu bualu tudi bamunange ne kabidi bualu tudi basue kumutumikila.

Udi wela meji ne: Tatu wetu wa mu diulu utu umvua bishi patudi tumutumikila bualu tudi basue kumutumikila?​— Anji ngambilabi, baledi bebe batu bumvua munyi pa kumona mushindu uudi wenza malu?​— Bible udi wamba ne: muana udi ne meji ‘udi usankisha tatuende’ kadi muana mupote ‘udi unyingalaja mutshima wa mamuende.’ (Nsumuinu 10:1) Utuku ukadi mumone ne: pautu wenza tshidi tatuebe ne mamuebe bakulomba bua kuenza bitu bibenza disanka anyi?​— Kadi batu badiumvua bishi pautu kuyi ubatumikila?​—

Mpindieu tuanji kuela meji bua Tatu wetu wa mu diulu Yehowa. Udi utuleja mushindu utudi mua kumusankisha. Bululaku Bible mu Nsumuinu 27:11. Nzambi udi utuambila mu mvese eu ne: ‘Muananyi, wikale ne meji, usankishe mutshima wanyi, bua mmanye mua kuitaba kudi muntu udi umpenda.’ Udi mumanye mushindu udi muntu mua kupenda mukuabu peshi kumuyobola anyi?​— Muntu udi mua kukupenda anyi kukuyobola pa kukuseka ne kukuamba ne: kuena mumanye mua kuenza malu auvua muambe ne: udi mua kuenza to. Mmushindu kayi udi Satana upenda Yehowa anyi umuyobola?​— Tumonabi.

Vuluka ne: tuvua balonge mu nshapita wa 8 wa mukanda eu ne: Satana mmusue kuikala kumutu kua bionso ne mmusue bua bantu bonso bamutumikile. Satana udi wamba ne: bantu badi batendelela Yehowa anu bualu Yehowa neabapeshe muoyo wa tshiendelele. Pavua Satana musake Adama ne Eva bua kutombokela Yehowa, Satana wakela Nzambi mpata. Wakambila Nzambi ne: ‘Bantu badi bakukuatshila mudimu anu bua bintu biudi ubapesha. Mpesha anu mushindu neumone, nensake bantu bonso bua bumuke kuudi.’

Bulelela, mêyi aa kaena mafunda mushindu eu mu Bible to. Kadi patudi tubala muyuki wa Yobo, bidi bimueneka patoke ne: Satana wakambila Nzambi mêyi a buena aa. Dikala anyi dibenga kuikala ne lulamatu dia Yobo kudi Nzambi divua ne mushinga wa bungi kudi Satana anyi kudi Yehowa. Tubulule Bible yetu mu Yobo nshapita wa 1 ne 2 bua kumona tshivua tshienzeke.

Tangila mu Yobo nshapita wa 1. Satana udi munkatshi mua banjelu mu diulu padibu balua kumona Yehowa. Yehowa udi webeja Satana ne: ‘Udi ufuma kuepi?’ Satana udi umuandamuna ne: uvua wenda utambakana pa buloba. Yehowa udi umukonka ne: ‘Udi mumone ne: Yobo udi ungenzela mudimu ne kêna wenza bualu bubi anyi?’​—Yobo 1:6-8.

Diakamue Satana udi utuadija kuamba mêyi a kudibingisha nawu. ‘Yobo udi ukutendelela anu bualu kêna ne lutatu nansha lumue. Wewe kuyi mumukube ne mumubeneshe, neakuele mulawu.’ Nunku Yehowa kumuandamuna ne: ‘Bimpe, Satana, udi mua kumuenzela tshintu tshionso tshiudi musue, kadi kuenzedi Yobo muine bibi to.’​—Yobo 1:9-12.

Ntshinyi tshidi Satana wenza mpindieu?​— Udi wenza bua bantu bibe ngombe ne nyama ya mpunda ya Yobo ne bashipe badi bayilama. Pashishe dikubakuba didi dituta, dishipa mikoko ne bantu badi bayilame. Bantu badi balua kabidi kuiba tumelo ne bashipa aba bavua batulama. Ndekelu wa bionso, Satana udi ukebesha tshipepele tshikole tshidi tshiupula nzubu udi bana ba Yobo dikumi basombele ne buonso buabu badi bafua. Nansha nanku, Yobo udi utungunuka ne kuenzela Yehowa mudimu.​—Yobo 1:13-22.

Padi Yehowa umona kabidi Satana, udi umuleja ne: Yobo utshidi anu ne lulamatu. Satana udi wandamuna kabidi ne: ‘Wewe mulekele bua ndenge mubidi wende, yeye neakuele mulawu.’ Nunku Yehowa udi ulekela bua Satana akengeshe mubidi wa Yobo kadi udi umudimuija bua kamushipi to.

Mpindieu Satana udi wasa Yobo disama, mubidi wende mujima udi utuadija kupatuka biuji. Biuji ebi bidi bipatula mupuya mubi udi upangisha bantu bua kusemena pabuipi nende. Too ne mukaji wa Yobo udi umuambila ne: ‘Diula Nzambi ne ufue!’ Aba badi badiamba ne: mbalunda ba Yobo badi balua kumutangila ne badi bamusamisha kabidi mutshima bikole padibu bamuamba ne: wewe udi ne bua kuikala muenze bualu kampanda bubi menemene ke bualu kayi udi upeta lutatu lua nunku. Kadi nansha mudi Satana mujudile Yobo lutatu lukole ne disama, Yobo udi utungunuka ne kuenzela Yehowa mudimu ne lulamatu.​—Yobo 2:1-13; 7:5; 19:13-20.

Udi wela meji ne: Yehowa uvua ne bua kuikala mudiumvue munyi bua lulamatu lua Yobo?​— Uvua mumvue disanka bualu uvua mua kuambila Satana ne: ‘Tangila Yobo! Udi ungenzela mudimu bualu mmusue.’ Newikale bu Yobo, muntu udi Yehowa mua kuamba ne: udi tshilejilu tshidi tshijadika ne: Satana mmuena dishima anyi?​— Bulelela, mbualu bua disanka bua kuleja Satana ne: mmuena dishima pakambaye ne: udi mua kusaka muntu yonso bua kakuatshidi Yehowa mudimu to. Dienza nunku diakasankisha Yezu.

Mulongeshi Munene kavuaku mulekele Satana umuenzeja bualu bubi nansha bumue to. Elabi meji muvua tshilejilu tshiende tshisankishe Tatuende! Yehowa uvua mua kufunkuna Yezu ne kuambila Satana ne: ‘Tangila Muananyi! Mmushale ne lulamatu luonso kundi bualu mmunange!’ Ela kabidi meji bua disanka didi Yezu umvua padiye usankisha mutshima wa Tatuende! Bua bualu bua disanka adi, Yezu wakashala ne lulamatu too ne ku lufu lua pa mutshi wa tshinyongopelu.​—Ebelu 12:2.

Udi musue kuikala bu Mulongeshi wetu Munene ne kusankisha Yehowa anyi?​— Nanku tungunuka ne kulonga malu adi Yehowa musue ne: wenze, ne umusankishe pa kuenza malu aa!