NSHAPITA WA 8
Bakuabu mbatupite
NDI mujadike se: newitabe bua ne: bakuabu mbatupite meme ne wewe ku bukole anyi ku bunene. Nnganyi uudi mua kuamba ne: mmutupite?— Yehowa Nzambi mmutupite. Kadi tudi mua kuamba tshinyi bua Muanende, Mulongeshi Munene? Mmutupite tuetu bonso anyi?— Eyowa mmutupite.
Yezu uvua musombe ne Nzambi mu diulu. Uvua Muana wa mu nyuma anyi muanjelu. Nzambi wakafukaku banjelu bakuabu ta bana ba mu nyuma anyi?— Eyowa, wakabafuka miliyo ne miliyo mivule. Banjelu aba kabidi mbatupite ne badi ne bukole bua bungi kukupita kumpita ne meme.— Musambu 104:4; Danyele 7:10.
Udi muvuluke dîna dia muanjelu wakayikila ne Mariya anyi?— Dîna diende divua Gabriele. Wakambila Mariya ne: muana walelaye au neikale Muana wa Nzambi. Nzambi wakela muoyo wa Muanende wa mu nyuma au munda mua Mariya bua Yezu aledibue bu muana wa mu maboko panu pa buloba.—Luka 1:26, 27.
Mariya ne Yosefe bavua mua kuikala bambile Yezu tshinyi?
Udi witaba tshishima atshi tshivua tshienzeke anyi? Udi witaba ne: Yezu uvua musombe pamue ne Nzambi mu diulu anyi?— Yezu wakamba ne: uvua musombe ne Nzambi mu diulu. Kadi mmunyi muvua Yezu mumanye malu au? Patshivuaye kansongalume, Mariya uvua mua kuikala mumuambile malu avua muanjelu Gabriele muambe. Kabidi Yosefe uvua pamuapa mua kuikala muambile Yezu ne: Nzambi ke uvua Tatuende mulelela.
Tshikondo tshiakatambuishabu Yezu, Nzambi wakakula dîyi difumina mu diulu wamba ne: “Eu udi Muana wanyi.” (Matayo 3:17) Kabidi butuku bua kumpala kua kufuaye, Yezu wakasambila ne: “Tatu, mpindiewu untumbishe wewe, umpeshe lumu lumvua mupete kuudi, bia panu kabiyi bianji kuikalaku.” (Yone 17:5, MMM) Bushuwa, Yezu uvua ulomba bua bamupingaje mu diulu bua kusomba kabidi pamue ne Nzambi. Mmunyi muvuaye mua kuya kusomba mu diulu?— Bivua mua kuenzeka nanku anu bu Yehowa Nzambi mumuvuije kabidi muanjelu anyi muntu wa nyuma udi kayi umueneka.
Mpindieu ndi musue kukuela lukonko lunene. Banjelu bonso mbimpe anyi? Udi wela meji kayi?— Bulelela, mu tshikondo kampanda tshia pa kale, banjelu bonso bavua bimpe. Bivua nanku bualu Yehowa ke wakabafuka, ne tshintu tshionso tshidiye wenza tshitu anu tshimpe. Kadi pashishe umue wa ku banjelu aba wakalua mubi. Biakenzeka nanku munyi bua kuluaye muanjelu mubi?
Bua kupeta diandamuna, tudi ne bua kuanji kupingaja ngenyi yetu ku tshikondo tshivua Nzambi mufuke muntu mulume ne muntu mukaji ba kumpala, Adama ne Eva. Bamue bantu badi bamba ne: muyuki wa Adama ne Eva ki mbualu bulelela to, udi anu muanu patupu. Kadi Mulongeshi Munene yeye uvua mumanye ne: muyuki au uvua mulelela.
Pavua Nzambi mufuke Adama ne Eva, wakabateka mu budimi bulenga bua dikema muaba udibu babikila ne: Edene. Muaba au uvua bu lupangu kampanda, mbuena kuamba ne: mparadizu. Adama ne Eva bavua mua kulela bana ba bungi, dîku diabu kulua dinene ne kusombela mu Mparadizu bua kashidi. Kadi kuvua dilongesha dinene divuabu ne bua kumanya. Tukadi bamane kuakula bua dilongesha dinene edi. Tuanji kumonabi ni tutshidi badivuluke.
Ntshinyi tshivua mua kuenza ne: Adama ne Eva basombe tshiendelela mu Mparadizu?
Yehowa wakambila Adama ne Eva ne: bavua mua kudia bimuma bionso bivua mu budimi abu mushindu uvua muoyo wabu musue. Kadi kuvua mutshi umue uvuabu kabayi ne bua kudia bimuma biawu to. Nzambi wakabambila bualu buvua mua kubenzekela buobu badie bimuma bia mutshi uvuabu babakandike au. Wakamba ne: “Neufue bulelela.” (Genese 2:17) Ndilongesha kayi divua Adama ne Eva ne bua kumanya?—
Ndilongesha dia butumike. Bushuwa, bua tuetu kuikala ne muoyo, tudi ne bua kutumikila Yehowa Nzambi! Kabivua bikumbane bua Adama ne Eva bambe patupu amu ne: nebamutumikile to. Bavua ne bua kuleja butumike ku malu avuabu benza. Bu buobu batumikile Nzambi, bavua mua kuleja ne: mbamunange ne kabidi mbasue bua ikale Mubalombodi. Nanku bavua mua kusomba kashidi mu Mparadizu. Kadi bivua mua kuleja tshinyi buobu badidinge badie bimuma bia ku mutshi mukandika au?—
Bivua mua kuleja ne: kabavua bamanye menemene bua kuela Nzambi tuasakidila bua bivuaye mubapeshe to. Wewe uvua mua kuikala mutumikile Yehowa bu wewe muikaleku tshikondo atshi anyi?— Kumpala, Adama ne Eva bakatumikila Nzambi. Kadi pashishe muntu mukuabu uvua mubapite bukole wakashima Eva. Wakamufikisha ku dibenga kutumikila Yehowa. Uvua nganyi au?—
Nnganyi uvua muenze bua nyoka akule ne Eva?
Bible udi wamba ne: nyoka wakakula ne Eva. Kadi wewe si udi mumanye ne: nyoka katu mua kuakula to. Nunku mmunyi muvua nyoka mufike ku diakula?— Muanjelu mukuabu wakenza bua bimueneke amu bu se: nyoka ke uvua wakula. Pine apu muanjelu au ke uvua wakula. Muanjelu au ukavua mutuadije kuela meji mabi. Uvua musue bua Adama ne Eva bamutendelele. Uvua musue bua benze malu avuaye muambe. Uvua musue kuangata muaba wa Nzambi.
Nunku muanjelu mubi au wakabueja mu lungenyi lua Eva ngenyi mibi. Wakambila Eva ku butuangaji bua nyoka ne: ‘Nzambi ki mmukuambile bulelela to. Kanuakufua to nansha nuenu badie bimuma bia mutshi mukandika au. Nenulue ne meji anu bu Nzambi.’ Wewe uvua mua kuitaba tshivua dîyi adi diamba anyi?—
Eva wakatuadija kujinga tshintu tshivua Nzambi kayi mumupeshe. Wakadia tshimuma tshia ku mutshi uvuabu babakandike bua kudia. Pashishe wakangata tshimuma atshi e kutshipesha Adama pende. Adama kavua muitabe tshivua nyoka muambe. Kadi dijinga diende dia kuikala ne Eva divua dikole kupita too ne dinanga divuaye munange Nzambi. Nanku yeye pende e kudiaye tshimuma tshia ku mutshi au.—Genese 3:1-6; 1 Timote 2:14.
Biakafikisha ku tshinyi?— Adama ne Eva bakajimija bupuangane, bakakulakaja ne pashishe kufuabu. Bu muvuabu bapange bupuangane, bana bakalelabu bonso bavua pabu bapange bupuangane ne bakakulakaja ne kufuabu pabu. Nzambi kavua mushime to! Bua kuikala ne muoyo bidi bikengela kumutumikila. (Lomo 5:12) Bible udi wamba ne: muanjelu wakashima Eva au dîna diende n’Satana Diabolo, ne banjelo bakuabu bakalua pabu babi badi bababikila ne: bademon.—Yakobo 2:19; Buakabuluibua 12:9.
Ntshinyi tshiakafikila Adama ne Eva kunyima kua bamane kubenga kutumikila Nzambi?
Udi mumvue mpindieu bua tshinyi muanjelu muimpe uvua Nzambi mufuke wakafika ku dilua muanjelu mubi anyi?— Bualu uvua mutuadije kuela meji a malu mabi. Uvua musue bua kuikala ku mutu kua bonso. Uvua mumanye bimpe ne: Nzambi uvua muambile Adama ne Eva bua kulelabu bana, nanku uvua ukeba bua bantu bonso abu bikale bamutendelela. Diabolo uvua musue kufikisha bantu bonso ku dibenga kutumikila Yehowa. Nunku udi uteta bua kubueja ngenyi mibi mu mitu yetu.—Yakobo 1:13-15.
Diabolo udi wamba ne: kakuena muntu nansha umue udi bushuwa munange Yehowa to. Udi wamba ne: meme ne wewe katuena banange Nzambi to ne katuena basue menemene kuenza tshidi Nzambi wamba to. Udi wamba ne: tutu tutumikila Yehowa anu padi malu onso enda bimpe mutudi tuetu basue. Diabolo udi wamba bulelela anyi? Tutu nanku au anyi?
Mulongeshi Munene wakamba ne: Diabolo mmuena dishima! Yezu wakatumikila Yehowa bua kuleja ne: mmunange Yehowa bushuwa. Kabidi Yezu kavua utumikila Nzambi anu pavua malu enda bimpe to. Wakamutumikila misangu yonso, nansha pavua bantu bakuabu bamutatshisha. Wakaleja lulamatu luende kudi Yehowa too ne ku lufu luende. Ke bua tshinyi Nzambi wakamubisha ku lufu bua kuikalaye ne muoyo tshiendelele.
Nunku nnganyi uudi mua kuamba ne: udi muluishi wetu munene?— Satana Diabolo. Udi mua kumumona anyi?— Tòo! Kadi tudi bamanye ne: udiku ne mmututambe ne mmutupite ku bukole. Kadi, nnganyi udi mupite Diabolo?— Yehowa Nzambi. Nunku tudi bamanye ne: Nzambi udi mua kutukuba.
Bala malu adi atangila Eu utudi ne bua kutendelela: mu Dutelonome 30:19, 20; mu Yoshua 24:14, 15; mu Nsumuinu 27:11 ne mu Matayo 4:10.