Mua kusomba mu buloba bupiabupia bua Nzambi bua ditalala

NZAMBI wakateka Adama ne Eva mu budimi bua Edene. Nansha muakabengabu kumutumikila ne buobu kufua, Nzambi mmulongolole bua bana babu ne tuetu petu lelu kusomba bua kashidi mu Mparadizu. Bible udi ulaya ne: ‘Bantu bakane nebapiane buloba, nebashikamemu tshiendelele.’​—Musambu 37:29.

Bible udi wakula bua ‘diulu dipiadipia’ ne ‘buloba bupiabupia.’ (Yeshaya 65:17; 2 Petelo 3:13) “Diulu” dia mpindieu ndienza ne mbulamatadi ya bantu idiku lelu, kadi Yezu Kristo ne aba badi bakokesha nende mu diulu nebenze ‘diulu dipiadipia.’ Nsombelu neikale muimpe be pikala diulu dipiadipia edi didi dikale mbulamatadi muakane wa Nzambi wa ditalala mua kukokesha buloba bujima!

Kadi ‘buloba bupiabupia’ ntshinyi?​— Buloba bupiabupia nebuikale bantu bimpe badi banange Yehowa. Udi umona, padi Bible wakula bua “buloba,” butu misangu mikuabu bumvuija bantu badi basombe pa buloba, ki mbuloba buetu buena dîna ebu to. (Genese 11:1; Musambu 66:4; 96:1) Nunku bantu bikala mua kuenza buloba bupiabupia nebikale mua kusomba anu pa buloba apa.

Bukua-panu bua mpindieu buenza ne bantu babi nebujimine. Vuluka, Mvula wa kabutu wa mu matuku a Noa wakashipa bantu babi bavua pa buloba. Nenku anu mutudi balonge, bukua-panu ebu bubi nebuikale mua kubutuka ku Armagedone. Tumone mpindieu nsombelu wikala mu bukua-panu bupiabupia bua Nzambi kunyima kua Armagedone.

Udi musue kusomba bua kashidi mu Mparadizu mu bukua-panu bupiabupia bua ditalala bua Nzambi anyi?​— Munganga nansha umue kêna mua kuenza bua tuikale ne muoyo kashidi to. Kakuena buanga budi mua kuenza bua tushale ne muoyo kashidi katuyi tufua to. Mushindu umuepele utudi mua kuikala ne muoyo kashidi mpatudi tusemena pabuipi ne Nzambi. Ne Mulongeshi Munene udi utuambila tshitudi mua kuenza.

Tuangate Bible yetu ne tuyibulule mu Yone nshapita wa 17, mvese 3. Emu tudi tusangana mêyi aa a Mulongeshi Munene a ne: ‘Eu udi muoyo wa tshiendelele, bua bobu bakumanye wewe, Nzambi umuepele mulelela, ne yeye uwakatuma, Yezu Kristo mene.’

Nunku ntshinyi tshivua Yezu muambe tshitudi ne bua kuenza bua kuikala ne muoyo wa tshiendelele?​— Kumpala, tudi ne bua kulonga mua kumanya Tatu wetu wa mu diulu, Yehowa, ne Muanende uvua mufile muoyo wende buetu tuetu. Bidi biumvuija ne: bidi bikengela tulonge Bible. Mukanda eu wa Longa malu kudi Mulongeshi Munene udi utuambuluisha bua kulonga Bible.

Kadi mmushindu kayi udi dilonga malu a Yehowa bua kuikala ne muoyo tshiendelele mua kutuambuluisha?​— Bulelela, anu mutudi dijinga ne biakudia matuku onso, bidi bikengela tulonge malu a Yehowa matuku onso. Bible udi wamba ne: ‘Muntu kikadi ne muoyo anu bua biakudia nkayabi, kadi ikale nawu bua mêyi onso adi apatuka mukana mua Nzambi.’​—Matayo 4:4.

Tudi kabidi ne bua kumanya Yezu Kristo bualu Nzambi wakatuma Muanende eu bua kujimija mpekatu yetu. Bible udi wamba ne: ‘Mu munga muntu yonso kamuena lupandu.’ Ne Bible udi wamba kabidi ne: ‘Udi witabuja Muana udi ne muoyo wa tshiendelele.’ (Bienzedi 4:12; Yone 3:36) Mpindieu, ‘kuitabuja’ Yezu kudi kumvuija tshinyi?​— Kudi kumvuija ne: tudi tuitaba bushuwa Yezu ne bamanye ne: katuena mua kuikala ne muoyo wa tshiendelele kabuyi buende yeye to. Tudi tuitabuja bualu abu anyi?​— Tuetu bikale tubuitabuja, netutungunuke ne kulongela malu kudi Mulongeshi Munene matuku onso, ne netuenze tshidiye wamba.

Mushindu umue muimpe wa kulongela malu kudi Mulongeshi Munene nkuikala kubala mukanda eu misangu ne misangu ne kutangila bimfuanyi bionso ne kuelelapu meji. Teta mua kuandamuna nkonko idi milamakaja ku bimfuanyi ebi. Kabidi, ubale mukanda eu ne mama webe anyi papa webe. Bikala baledi bebe kabayiku, uubale ne bantu bakole bakuabu anyi ne bana bakuabu. Kabiakuikalaku bualu bua disanka bua wewe kuambuluisha bakuabu bua kulongelabu malu adibu ne bua kuenza bua kuikala ne muoyo kashidi mu bukua-panu bupiabupia kudi Mulongeshi Munene anyi?​—

Bible udi utuambila ne: “Buloba budi bujimina.” Kadi pashishe Bible udi umvuija tshitudi mua kuenza bua kuikala ne muoyo tshiendelele mu bukua-panu bupiabupia. Udi wamba ne: “Yeye udi wenza mudi disua dia Nzambi udi ushalaku tshiendelele.” (1 Yone 2:17) Kadi mmushindu kayi utudi mua kusomba tshiendelele mu bukua-panu bupiabupia bua Nzambi?​— Bua kusombamu tshiendelele, bidi bikengela tuetu kulonga mua kumanya Yehowa ne Muanende munanga Yezu. Kadi tudi kabidi ne bua kutumikila bitudi tulonga. Nanku bitudi balonge mu mukanda eu bikuambuluishe bua kuenza malu aa.