TSHITUPA TSHIA 6
Nzambi mmusue kuenza tshinyi ne buloba?
NZAMBI wakafuka buloba bua buikale muaba muimpe wa bantu kusombela. Dîyi diende didi diamba ne: ‘Diulu ne diulu mbia Yehowa; kadi wakupa bana ba bantu buloba.’—Musambu 115:16.
Kumpala kua Nzambi kufukaye muntu wa kumpala Adama, wakasungula katupa kakese ka buloba kavuabu babikila ne: Edene, kuenzamu budimi buimpe bua mitshi ne bilongo. Mifundu minsantu idi yamba ne: musulu wa Pelata ne wa Tigre (Hidekela) ivua ifumina mu Edene.a Badi bela meji ne: budimi bua Edene buvua muaba udi ditunga dia Turquie lelu, ku Est kuadi. Eyowa, budimi bua Edene buvua pa buloba apa.
Nzambi wakafuka Adama, kumutekaye mu budimi bua Edene ‘bua kubuipilaye ne bua kubulama.’ (Genese 2:15) Pashishe Nzambi wakalua kufukila Adama mukaji. Dîna diende divua Eva. Nzambi wakambila mulume eu ne mukajende ne: ‘Nulelangane, nukumbane ba bungi, nuwuje buloba tente; nubukokeshe.’ (Genese 1:28) Nunku, Nzambi ‘kakafuka buloba bu tshintu tshia patupu, wakabufuka bua bantu bashikamapu.’—Yeshaya 45:18.
Kadi Adama ne Eva bakatombokela Nzambi, kushipabu mukenji wende ku bukole. Nunku Nzambi wakabipata mu budimi bua Edene. Mparadizu wakajimina. Malu mabi makebesha kudi bubi bua Adama kaakashikila apu to. Mifundu minsantu idi yamba ne: “Bu muakalua bubi pa buloba bua muntu umue, ne lufu lulue bua bubi abu, nunku lufu luakakuata bantu bonso, bualu bantu bonso bakenza bubi.”—Lomo 5:12.
Yehowa uvuaku mulekele tshivuaye mulongolole ku ntuadijilu, bua buloba bujima buikale mparadizu musombela kudi bantu bavua mua kuikala ne disanka anyi? Tòo! Nzambi udi wamba ne: ‘Dîyi didi dipatuka mukana muanyi nedikale muomumue; kadiena dipingana kundi patupu, kadiyi dianji kuenza muanda undi musue dienze, kadiyi dianji kujikija muanda ungakaditumina.’ (Yeshaya 55:11) Nebapingaje mparadizu pa buloba apa!
Nsombelu neikale mushindu kayi mu mparadizu? Tangila malu adi Mifundu minsantu ilaya adi maleja mu mabeji abidi adi alonda aa.
[Mêyi adi kuinshi]
a Genese 2:10-14 udi wamba ne: ‘Musulu wa mâyi wakalopoka mu Edene bua kumiamina midioko mâyi; wakapanduluka maboko anayi. Dîna dia diboko dia kumudilu didi Pishona. Dîna dia diboko dibidi didi Gihona. Dîna dia diboko disatu didi Hidekela (anyi Tigre), didi dinyunguluka ku esete kua buloba bua Ashû. Dîna dia diboko dinayi didi Pelata.’ Muaba ne mêna a misulu ibidi ya kumpala ki mbimanyike to.
[Kazubu mu dibeji 15]
Mmunyi muwandamuna?
• Ntshinyi tshivua Nzambi mulongolole ku ntuadijilu bua buloba ne bua muntu?
• Mmunyi mutudi bamanye ne: Nzambi neakumbaje tshivuaye mulongolole atshi?
[Kazubu mu dibeji 16, 17]
Mparadizu walua pa buloba
Bafue nebabishibue: ‘Bonso badi mu nkita nebumvue dîyi diende nebapatuke.’—Yone 5:28, 29.
Kakuakuikala bukulakaja, masama anyi lufu: ‘Muena musoko kena wamba ne: Ndi ne disama.’ (Yeshaya 33:24) Nzambi “neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha miadi, nansha bisama kabiakuikalaku kabidi.”—Buakabuluibua 21:4.
Nekuikale biakudia bimpe bia bungi: ‘Buloba buakukuamisha bintu biabu bivule; Nzambi, Nzambi wetu mene, neatuvudijile disanka.’—Musambu 67:6.
Nekuikale nzubu ne midimu mimpe: ‘Nebase nzubu, nebashikamemu; bantu bangakusungula nebasanke musangu mule mu mudimu wa bianza biabu.’ —Yeshaya 65:21, 22.
Kakuakuikala mvita, buenzavi anyi tshikisu: Yehowa ‘udi ulekesha mvita bua ijike too ne kumfudilu kua buloba.’ (Musambu 46:9) ‘Nebajimije bantu babi pa buloba.’—Nsumuinu 2:22.