TSHITUPA TSHIA 5

Tuanyishe ngikadilu milenga ya Nzambi

MIFUNDU minsantu idi ileja ngikadilu mimpe ya Nzambi ya bungi, ne idi ituambuluisha bua kumumanya. Tshilejilu, Mifundu minsantu idi ituleja ngikadilu inayi minene ya Nzambi: bukole, buakane, meji ne dinanga. Tuyikonkonone umue ku umue.

Udi ne bukole bua kuenza bualu buonso

Yehowa wakambila Abalahama ne: “Ndi Nzambi wa Bukole Buonso.” (Genese 17:⁠1) Kakuena muntu udi ne bukole bu bua Nzambi. Nzambi udi ne bukole bua kuenza bualu buonso, ne bukole buende kabuena mua kushikila. Nzambi wakafuka diulu ne buloba ne bionso bidimu ku bukole buende.

Nzambi katu wenza mudimu bibi ne bukole buende to. Misangu yonso, udi wenza nabu mudimu ne tshipatshila kampanda ne ubuludika mu mushindu muimpe. Udi wenza mudimu ne bukole buende mu mushindu muakanangane bimpe ne buakane, ne meji, ne dinanga.

Yehowa udi wenza mudimu bikole ne bukole buende bua kuambuluisha batendeledi bende ba lulamatu. ‘Mêsu a Yehowa adi akenzekana ku nseke yonso ya buloba bua kuleja bukole buende kudi bantu badi ne mitshima miakane kudiye.’ (2 Kulondolola 16:⁠9) Nzambi udi ne bukole bua nunku, kadi muikale uditatshisha bua bantu bende, kenaku ukusankisha anyi?

Nzambi wa buakane

“Yehowa udi unanga kulumbulula kuakane.” (Musambu 37:28) Udi wenza malu mimpe ne makane misangu yonso mu diumvuangana ne mikenji yende mipuangane.

Nzambi mmukine malu onso adi kaayi makane. ‘Yeye katu watangila bantu ne kansungusunga, kena witabuja mafutu’ anyi mbuejelu. (Dutelonome 10:17) Kena wanyisha bantu badi bakengesha bakuabu, ne udi wambuluisha bantu badi kabayi ne wa kubakuatshisha, bu mudi ‘bakaji ba mu lufuila anyi bana ba nshiya.’ (Ekesode 22:22) Nzambi katu usunguluja bantu to. “Nzambi kena ne kansungasunga to, kadi udi witaba muntu wa mu tshisamba tshionso udi umutshina, udi wenza malu makane.”​—⁠Bienzedi 10:​34, 35.

Buakane bua Yehowa mbukumbanangane bimpe menemene. Katu utamba kulekelela malu, ne katu ne dîsu dikole dipitshidile to. Udi unyoka bantu babi badi kabayi bakudimuna mutshima, kadi udi ufuila badi bakudimuna mutshima luse. ‘Yehowa udi ne luse ne dinanga, kena ukuata tshiji lubilu, udi muwule tente ne dinanga dijalame. Kena utandangana netu tshiendelele, kena ushala ne tshiji tshiende kashidi. Kena mutuenzele bu mudi mibi yetu, kena mutufute bu mudi malu etu a tshishiku.’ (Musambu 103:​8-10) Nzambi udi kabidi uvuluka malu mimpe a batendeledi bende ba lulamatu ne udi ubafuta. Kuenaku mua kueyemena Nzambi wa buakane bua mushindu eu anyi?

Nzambi wa meji

Kudi Yehowa ke kudi kufumina meji onso. “Aka! Monayi ndondo wa bubanji bua Nzambi, meji ende ne dimanya diende!” (Lomo 11:33) Kakuena muntu udi ne meji bu a Nzambi, ne meji ende kaena ne ndekelu.

Meji a Nzambi adi amuenekela patoke mu bintu bidiye mufuke. Mufundi wa musambu wakamba ne: ‘Yehowa, mona mudi bungi bua mishindu ya midimu yebe! Wewe wakenza buonso buayi ne lungenyi luebe.’​—⁠Musambu 104:⁠24.

Mifundu minsantu idi kabidi ileja meji a Nzambi. Mukalenge Davidi wakafunda ne: ‘Tshimanyishilu tshia Yehowa tshidi mua kueyemenyibua, tshidi tshivuija muntu udi mutshimbakane muena meji.’ (Musambu 19:⁠7) Tshinkabi mudi meji a Nzambi adi kaayi ne ndekelu mua kukuambuluisha! Kuenaku mua kukeba mushindu bua akuambuluishe anyi?

“Nzambi udi dinanga”

Ngikadilu munene wa Yehowa ndinanga. Mifundu minsantu idi ituambila ne: “Nzambi udi dinanga.” (1 Yone 4:⁠8) Dinanga ke didi dimusaka ne dimulombola mu malu onso adiye wenza.

Nzambi mmuleje mudiye mutunange mu mishindu ya bungi. Udi utupesha bintu bimpe. Udi “wenza malu mimpe, unulokeshila mvula mu diulu, unupesha mivu ya biakudia, uwuja mioyo yenu tente ne biakudia ne disanka.” (Bienzedi 14:17) Bushuwa, “dipa dionso dimpe ne dipa dionso dipuangane didi difuma muulu, difumina kudi Tatu wa butoke bua mu diulu.” (Yakobo 1:17) Nzambi udi utuleja bulelela pa bidi bimutangila ne utulongesha mikenji yende ya dinanga ne mêyi ende ku diambuluisha dia dipa dia mushinga mukole didiye mutupeshe: Mifundu minsantu. Yezu wakamba mu disambila ne: “Dîyi diebe mbulelela.”​—⁠Yone 17:⁠17.

Nzambi udi utuambuluisha kabidi mu ntatu yetu. ‘Teka bujitu buebe pambidi pa Yehowa, ne yeye neakukoleshe; kena witabuja tshiendelele bua bantu bakane banyungishibue.’ (Musambu 55:22) Udi utufuila luse bua mibi yetu. ‘Bualu bua wewe, Mukalenge, udi muimpe, ne mutshima webe udi musue kubuikidila bantu mibi yabu; udi muwule tente ne luse lujalame kudi bonso badi bakubikila.’ (Musambu 86:⁠5) Udi kabidi utulaya muoyo wa tshiendelele. “Yeye neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha miadi, nansha bisama kabiakuikalaku kabidi.” (Buakabuluibua 21:⁠4) Newenze tshinyi bua dinanga dia Nzambi? Neumunange pebe anyi?

Semena kudi Nzambi

Nzambi mmusue bua umumanye bimpe. Dîyi diende didi dikuambila ne: ‘Semena pabuipi ne Nzambi ne yeye neasemene pabuipi nebe.’ (Yakobo 4:⁠8) Nzambi wakabikila muprofete wa lulamatu Abalahama ne: “Mulunda wanyi.” (Yeshaya 41:⁠8) Yehowa mmusue bua wikale pebe mulunda wende.

Wewe utungunuka ne kulonga malu a Nzambi, neusemene pabuipi nende ne newikale ne disanka dia bungi. “Disanka didi kudi muntu” udi ‘disanka diende mu mikenji ya Yehowa, ne mu mikenji yende mudiye welangana meji munya ne butuku.’ (Musambu 1:​1, 2) Nanku tungunuka ne kulonga Mifundu minsantu. Ikala welangana meji bua ngikadilu ya Nzambi ne midimu yende. Leja muudi munange Nzambi pa kutumikila biudi ulonga. “Bualu dinanga dia Nzambi didi diumvuija ne: tutumikile mikenji yende; pabi mikenji yende kayena ne bujitu.” (1 Yone 5:⁠3) Pashishe usambile bu muvua mufundi wa musambu musambile ne: ‘Yehowa, ummanyishe bienzedi biebe! unyishe njila yebe. Undombole biebe mu bulelela buebe.’ (Musambu 25:​4, 5) Neumone ne: Nzambi kena “kule ne yonso wa kutudi.”​—⁠Bienzedi 17:⁠27.

[Kazubu mu dibeji 14]

Udi wela meji kayi?

• Nngikadilu kayi wa Nzambi udi utamba kukusankisha? Bua tshinyi?

• Mmunyi muudi mua kusemena kudi Nzambi?

[Tshimfuanyi mu dibeji 12, 13]

Nzambi udi ne bukole bua bungi

[Tshimfuanyi mu dibeji 13]

Nzambi kena ne kansungasunga

[Tshimfuanyi mu dibeji 13]

Meji a Nzambi adi atukemesha patudi tutangila bintu bidiye mufuke

[Tshimfuanyi mu dibeji 13]

Mifundu minsantu idi ne meji a Nzambi

[Tshimfuanyi mu dibeji 14]

Kusambila ne kuelangana meji pa ngikadilu ya Nzambi nekukusemeje pabuipi nende