TSHITUPA TSHIA 4

Nzambi nnganyi?

BANTU badi batendelela nzambi ya bungi. Kadi Mifundu minsantu idi yamba ne: kudi anu Nzambi umuepele mulelela. Udi nkayende, ku mutu kua bionso, ne wa tshiendelele. Wakafuka bintu bionso bidi mu diulu ne pa buloba ne wakatupesha muoyo. Nunku anu yeye nkayende ke udi mukumbane bua tuetu kutendelela.

Nzambi udi ne mianzu ya bungi, kadi udi ne dîna anu dimue. Dîna adi ke YEHOWA. Nzambi wakambila Mose ne: ‘Wewe newambile bena Isalele ne: Yehowa, Nzambi wa bankambua benu, Nzambi wa Abalahama, Nzambi wa Isaka ne Nzambi wa Yakoba wakuntuma kunudi: edi ndîna dianyi tshiendelele, etshi ntshivulukidi tshianyi kudi bantu bonso.’ (Ekesode 3:15) Dîna Yehowa didi misangu mitue ku 7 000 mu Mifundu minsantu. Musambu wa 83:18 udi wamba bua Nzambi ne: ‘Wewe nkayebe, ngudi muidike dîna dia Yehowa, udi Mutambe Bunene wa pa mutu pa buloba bujima.’

Kakuena muntu ukadi mumone Nzambi. Nzambi wakambila Mose ne: “Wewe kuena mua kumona mpala wanyi; bualu bua muntu kena mua kumona mpala wanyi ne kuikala ne muoyo.” (Ekesode 33:20) Nzambi udi mu diulu ne bantu kabena mua kumumona to. Mbibi bua kuenza lupingu anyi tshimfuanyi tshia Nzambi bua kutshitendelela. Yehowa Nzambi wakela mukenji ku butuangaji bua muprofete Mose ne: ‘Kudisongedi lupingu anyi tshifuanyikiji tshia tshintu tshia mu diulu anyi tshia tshintu tshia panshi pa buloba anyi tshia tshintu tshia mu mâyi adi muinshi mua buloba. Kubinaminyi, kubitendeledi; bua meme Yehowa, Nzambi webe, ndi bianyi Nzambi wa mukawu.’ (Ekesode 20:​2-5) Pashishe, Nzambi wakamba ku butuangaji bua muprofete Yeshaya ne: ‘Meme ndi Yehowa, adi ndîna dianyi; tshiena mpa mukuabu butumbi buanyi, anyi kutendelela kuanyi kudi mpingu misonga.’​—⁠Yeshaya 42:⁠8.

Bantu bakuabu badi bitabuja Nzambi kadi badi mua kuikala bamumona bu muntu udi bantu kabayi mua kumanya, kabayi mua kuyukila nende, muntu wa kutshina pamutu pa kumunanga. Wewe udi wela meji kayi? Nzambi udiku utangila malu ebe wewe anyi? Wewe udiku mua kumumanya bimpe ne kusemena kudiye anyi? Tumone tshidi Mifundu minsantu yamba bua ngikadilu ya Nzambi.

[Kazubu mu dibeji 11]

Mmunyi muwandamuna?

• Bua tshinyi tudi ne bua kutendelela Nzambi?

• Dîna dia Nzambi nnganyi?

• Bua tshinyi katuena ne bua kutendelela Nzambi ku diambuluisha dia mpingu anyi bimfuanyi?

• Mmunyi mudi Nzambi wenza mudimu ne nyuma muimpe ne banjelu bende bua kukumbaja disua diende?

[Tshimfuanyi mu dibeji 11]

Nyuma muimpe wa Nzambi ne banjelu bende

Mmunyi mudi Nzambi ukumbaja disua diende? Umue mushindu ngua kutuma nyuma muimpe wende. Nyuma wa Nzambi ki mmuntu anyi muanjelu to, kadi mbukole buende budi kabuyi bumueneka budiye wenza nabu mudimu, mbukole budi kabuyi ne tshidi mua kubuimanyika, budiye utuma bua kukumbaja tshionso tshidiye musue kuenza. Nzambi wakafuka diulu ne buloba ku diambuluisha dia bukole ebu. ‘Ku dîyi dia Yehowa bintu bia mu diulu biakafukibua, tshisumbu tshiabi tshionso tshiakafukibua ku mupuya wa mukana muende.’ (Musambu 33:⁠6) Genese 1:2 udi umvuija ne: pavua buloba bubuikila kudi mâyi ne Nzambi ulongoluela bantu buloba bua kusombapu, ‘nyuma wa Nzambi uvua unyunguluka pa mutu pa mâyi.’ Pashishe Nzambi wakafuka bintu bionso bidi ne muoyo pa buloba ku diambuluisha dia nyuma muimpe wende.

Nzambi udi kabidi ukumbaja disua diende ku diambuluisha dia banjelu. Nzambi wakabafuka bua bikale nende mu diulu. Banjelu badi ne bukole bua bungi. Badi bafikisha mikenji ya Nzambi kudi bantu ne benza midimu mikuabu minene. Tshilejilu, Mifundu minsantu idi yakula bua mikenji ivua Nzambi mufile ku butuangaji bua muprofete Mose bu “dîyi divuabu bambe ku butuangaji bua banjelu.” Banjelu ba Nzambi badi kabidi bambuluisha batendeledi bende pa buloba. Ke bualu kayi Mifundu minsantu idi ibikila banjelu ba Nzambi ne: “Nnyuma bua mudimu wa tshijila, batuma bua kuenzela bantu bapiana lupandu mudimu.”​—⁠Ebelu 1:14; 2:⁠2.

[Tshimfuanyi mu dibeji 10, 11]

Bakafila mikenji ku butuangaji bua muprofete Mose bu “dîyi divuabu bambe ku butuangaji bua banjelu”

[Tshimfuanyi mu dibeji 10]

Mivungu ya kale ya ku mbuu mufue idi ne dîna dia Nzambi