TSHITUPA TSHIA 3

Mibelu mimpe idi ilengeja nsombelu webe

ELABI meji ne: munganga mupiamupia mmulue muaba uudi musombele. Pamuapa udi mua kuanji kuelakana bua kuya kudiye. Kadi newenze tshinyi wewe mumvue ne: mmuambuluishe balunda bebe bakuabu ne mbumvue bimpe menemene? Kuenaku mua kuya kumonangana pebe ne munganga au anyi?

Mifundu minsantu idi anu bu munganga au mu mushindu kampanda. Bantu bakuabu badi belakana bua kuyibala. Kadi padibu batumikila mibelu mimpe idimu, nsombelu wabu udi ulengela bimpe menemene. Tumone ndambu wa bilejilu.

Kujikija bilumbu mu dibaka

Sumiatun udi uvuluka wamba ne: “Patutshivua tubuelelaku mu dibaka, mvua mmona bayanyi Dumas bu uvua undengulula. Bua tshiji, mvua mmuela bulaku bukole, mmuasa bintu ne misangu mikuabu mmututa bisusu. Dimue dituku, bua bukole bua tshiji ngakuminyina.

“Pakatuadija Dumas kulonga Mifundu minsantu, mvua mmuseka. Kadi mvua nteleja mu tshibambalu tshikuabu mu musokoko malu avuaye ulonga. Dituku dikuabu, ngakumvua babala mvese eyi: “Bakaji bakokele ba bayabu bu mudibu bakokela Mukalenge . . . Mukaji pende udi ne bua kuikala ne kanemu kakole kudi bayende.” (Efeso 5:​22, 33) Mêyi aa akandenga ku muoyo. Ngakalomba Nzambi bua amfuile luse bua mumvua nkengesha bayanyi, meme kumulomba bua angambuluishe bua ngikale mukaji muimpe. Meme ne Dumas tuakatuadija kulonga Mifundu minsantu pamue.”

Mifundu minsantu idi yamba kabidi ne: ‘Balume badi ne bua kunanga bakaji babu bu mibidi yabu bobu bine.’ (Efeso 5:28) Sumiatun udi wamba ne: “Kulonga malu aa kuakatushintulula tuetu bonso babidi. Ngakatuadija kupesha Dumas dikopo dia tshiayi pavuaye ufuma ku mudimu ne kumuakuisha ne dîyi dimpe. Dumas pende wakatuadija kundeja dinanga dia bungi ne kungambuluisha ku midimu ya mu nzubu. Tuetu bonso tuakadienzeja bua ‘kuenzelangana malu mimpe, kuditeka pa muaba wa mukuabu ne muoyo mujima, tufuilangana luse ne muoyo mujima.’ (Efeso 4:32) Nunku, mushindu utuvua banangangane ne tunemekangana wakakola bikole. Mpindieu tudi ne bidimu bipite pa 40 mu dibaka bikale ne disanka. Mibelu mimpe ya mu Dîyi dia Nzambi mmipandishe dibaka dietu!”

Kukanda tshiji

Tayib udi wamba ne: “Mvua ne tshikisu tshikole. Mvua nduangana bikole ne mfunyina bantu ne tshingoma misangu ya bungi. Mvua kabidi ntuta mukajanyi Kustriyah, bua tshiji mvua mmuzaka mu buloba. Bantu ba bungi bavua bantshina.

“Dituku dikuabu ngakabala mêyi a Yezu aa: ‘Ndi nnupesha mukenji mupiamupia ne: Nunangangane; anu bu mundi mununange.’ (Yone 13:34) Biakandenga bikole, meme kudisuika bua kushintuluka. Pavua tshiji tshimbanda, mvua nsambila Nzambi bua kutukija. Tshiji tshianyi tshivua tshijika. Meme ne mukajanyi tuakatuadija kutumikila mubelu udi mu Efeso 4:​26, 27 wa ne: ‘Kanulekedi dîba dibuela nuenu bikale anu ne tshiji, kanushidi Diabolo kaba ka kubuelela.’ Tudi tubala Mifundu minsantu ne tusambila pamue butuku buonso. Kuenza nunku kuvua kupepeja bujitu bua dituku ne kutusuikakaja pamue bikole.

“Ndi mumanyike mpindieu bu muena ditalala. Mukajanyi ne bana banyi mbanange ne badi bannemeka. Ndi ne balunda ba bungi, ne ndi ndiumvua pabuipi ne Nzambi. Ndi mpindieu ne disanka dilelela.”

Kulekela dikuatshika bintu bia lulengu

Goin udi wamba ne: “Mvua mu dingumba dia benzavi, mvua munu wa makanya wa dilambu, misangu ya bungi butuku buvua buntshila mulale mu njila mukuatshike. Mvua kabidi nnua bintu bia lulengu bivua bikandika bu mudi diamba ne mvua mbisumbisha; mvua mbisokoka mu nkoleta wanyi uvua masashi kaayi mua kutubula. Nansha mumvua mmueneka bu muntu uvua kayi utshina bualu, mvua ne buôwa dîba dionso.

“Pashishe muntu mukuabu wakambadisha mvese eu: ‘Muananyi, kupu diyisha dianyi muoyo . . . nebakutentakajile dilepa dia matuku ne bidimu bia muoyo ne ditalala.’ (Nsumuinu 3:​1, 2) Mvua njinga ne muoyo mujima kulala matuku a bungi pa buloba ne kuikala ne nsombelu wa ditalala. Ngakabala kabidi ne: ‘Bana betu bananga, bu mutudi ne milayi eyi, tudilengeje ku bukoya buonso bua mubidi ne bua nyuma, tuvuija dikala dietu ba tshijila dipuangane mu ditshina dia Nzambi.’ (2 Kolinto 7:⁠1) Nunku, ngakalekela kunua bintu bia lulengu, kumbuka mu dingumba dia benzavi dimvua, ne kutuadija kuenzela Nzambi mudimu.

“Nkadi mulekele dinua dia bintu bia lulengu kukadi bidimu bipite pa 17. Mpindieu ndi ne makanda a mubidi mimpe, ne dîku didi ne disanka, ne balunda bimpe ne kondo ka muoyo kimpe. Pamutu pa kulala mu njila mukuatshike, ndi ndala pa bulalu mu ditalala butuku buonso.”

Kulekela kansungasunga

Bambang udi uvuluka wamba ne: “Pamvua nsonga, mvua muenzavi ne bantu ba bungi bamvua ngenzela bibi bavua ba mu tshisa tshikese tshimvua mukine.

“Kadi tshikondo tshikuabu, ngakatuadija kukeba Nzambi. Dikeba dianyi diakamfikisha ku dituilangana ne kasumbu kavua kadisangisha bua kulonga Mifundu minsantu. Bakangakidilamu ne disanka kudi ba mu tshisa tshimvua mukine. Ngakamona kabidi ne: bantu ba bisamba bishilashilangane bavua badisangisha mu kasumbu amu ne disanka, kakuyi bualu. Biakankemesha! Ke meme kumvua mvese udi wamba ne: ‘Nzambi kena ne kansungasunga to, kadi udi witaba muntu wa mu tshisamba tshionso udi umutshina, udi wenza malu makane.’​—⁠Bienzedi 10:​34, 35.

“Lelu muoyo wanyi kawutshiena mmunyanga kudi kansungasunga to. Bamue ba ku balunda banyi banene mba mu tshisa tshimvua mukine atshi. Nzambi mmundongeshe ku diambuluisha dia Mifundu minsantu bua kunangangana.”

Kulekela tshikisu

Garoga udi wamba ne: “Pantshivua nsonga, ngakabuela mu buloko misangu isatu: ibidi bua buivi ne umue bualu mvua mutue muntu mukuabu tuele ne tshikisu. Pashishe ngakabuela mu tshisumbu tshia bantomboji, meme kushipa bantu ba bungi. Pakajika mvita, ngakatuadija kulombola kasumbu kavua kanyengangana bintu ne katondeshangana malu ku bukole. Bantu bavua bandama bavua baya nanyi kuonso kumvua nya. Mvua muntu mubi wa tshikisu tshikole.

“Dituku dikuabu, ngakabala mvese eu: ‘Dinanga didi ne lutulu ne buimpe. Dinanga kadiena ne mukawu, kadiena ne diambu, kadiena didiuwuja, kadiena dienza malu a bundu, kadiena didikebela anu adi masanka, kadiena dikuata tshiji lukasa. Kadiena dibalulula malu mabi adibu badienzela.’ (1 Kolinto 13:​4, 5) Mêyi aa akandenga ku muoyo. Ngakamuangala kuya muaba mukuabu, kulonga Mifundu minsantu ne kutumikila mibelu idimu.

“Tshiena kabidi muena tshikisu to. Kadi badi bannemeka bu mulongeshi wa Dîyi dia Nzambi. Mpindieu ndi ne nsombelu wa nsongo udi ne tshipatshila.”

Dîyi dia Nzambi didi ne bukole

Bilejilu ebi ne bikuabu bia bungi bidi bijadika ne: “Dîyi dia Nzambi didi ne muoyo ne bukole.” (Ebelu 4:12) Mibelu idimu mmipepele, idi yambuluisha ne ikolesha.

Mifundu minsantu idiku mua kukuambuluisha pebe anyi? Eyowa, idi mua kukuambuluisha mu bualu buonso buudi nabu. “Dîyi dionso didi mu Mifundu minsantu ndifundisha ku nyuma wa Nzambi, ne didi diambuluisha bua kulongesha, bua kubela, bua kululamija malu, bua kunyoka mu buakane, bua muntu wa Nzambi ikale mukumbane menemene, muikale ne bionso bidi bikengedibua bua mudimu wonso muimpe.”​—⁠2 Timote 3:​16, 17.

Nunku, tukonkononayi amue malongesha manene adi mu Mifundu minsantu.

[Kazubu mu dibeji 9]

Udi wela meji kayi?

• Ntshilejilu kayi tshia ku bidi kuulu eku tshidi tshikulenge bikole? Bua tshinyi?

• Mmunyi mudi Mifundu minsantu mua kukuambuluisha?

[Tshimfuanyi mu dibeji 6, 7]

Dumas ne Sumiatun

[Tshimfuanyi mu dibeji 6, 7]

Kustriyah ne Tayib batu basambila pamue butuku buonso

[Tshimfuanyi mu dibeji 7]

Goin

[Tshimfuanyi mu dibeji 8]

Bambang mmudie mpindieu bulunda buimpe ne bantu ba mu bisamba bishilashilangane

[Tshimfuanyi mu dibeji 9]

Garoga katshiena kabidi muena tshikisu, kadi mmulongeshi wa Dîyi dia Nzambi udibu banemeka