Malu avua mushindu kayi mu Mparadizu?

Yehowa wakapesha Adama ne Eva bintu bimpe bia bungi. Genese 1:28

Yehowa wakenza Eva. Eva ke muntu mukaji wa kumpala pa buloba apa. Nzambi wakamufila kudi Adama bua ikale mukajende.​—Genese 2:21, 22.

Yehowa wakabafuka ne meji ne mubidi bivua kabiyi kalema.

Bavua basombele mu Mparadizu, muaba uvuabu babikila ne: budimi bua Edene. Uvua muaba muimpe wa dikema. Muvua misulu ya mâyi ne mitshi ya bimuma ne nyama.

Yehowa uvua uyukila nabu. Uvua kabidi ubalongesha. Bu bobu bamutumikile, bavua mua kuikala ne muoyo wa tshiendelele mu Mparadizu pa buloba.

Nzambi uvua muambile Adama ne Eva bua kabadi bimuma bia mutshi kampanda. Genese 2:16, 17

Umue wa ku banjelu wakatombokela Nzambi. Muanjelu mubi au ke Satana Diabolo.

Yehowa wakaleja Adama ne Eva mutshi kampanda wa mu budimi, e kubambila ne: nuenu badie bimuma bia mutshi eu, nenufue.

Satana kavua musue bua Adama ne Eva batumikile Yehowa to. Ke bualu kayi wakenza mudimu ne nyoka e kuambila Eva ne: wewe mudie tshimuma tshia mutshi eu, kuakufua to, kadi neulue bu Nzambi. Satana uvua mushime Eva.​—Genese 3:1-5.