Panudi nupeta ntatu

Nansha wewe wenza muebe muonso bua kuikala mu dîku ne mu dibaka dia disanka, malu audi kuyi mutekemene adi mua kufika ne adi mua kuenza bua bikukolele bua kulama disanka diebe. (Muambi 9:11) Nzambi utu utuambuluisha ne dinanga dionso patudi tutuilangana ne ntatu. Wewe mutumikile mêyi a mu Bible adi alonda aa, wewe ne bena mu dîku diebe nenuikale bakumbane bua kutantamena nansha nsombelu mikole menemene.

1 EYEMENA YEHOWA

TSHIDI BIBLE WAMBA: “Numupuile ntatu yenu yonso, bualu udi uditatshisha bua bualu buenu.” (1 Petelo 5:7) Misangu yonso ikala muvuluke ne: ki Nzambi udi ukukebela ntatu to. (Yakobo 1:13) Paudi usemena pabuipi nende, neakuambuluishe mu mushindu muimpe mutambe. (Yeshaya 41:10) Bible udi wamba ne: “Upumunayi mioyo yenu kumpala kuende.”—Musambu 62:8, NWT.

Neupete kabidi bukole wewe ubala ne ulonga Bible webe dituku dionso. Nebikuambuluishe bua kumona mudi Yehowa utukankamija mu ntatu yetu yonso. (2 Kolinto 1:3, 4; Lomo 15:4) Mmulaye bua kukupesha “ditalala dia Nzambi didi dipite dijingulula dionso dia malu.”—Filipoyi 4:6, 7, 13.

TSHIUDI MUA KUENZA:

• Lomba Yehowa bua akuambuluishe bua wikale mutukije ne wele meji mu mushindu muimpe

• Tangilula malu onso autu musue ne usungule audi mua kukumbaja

2 DITABALELA NE UTABALELA BENA MU DÎKU DIEBE

TSHIDI BIBLE WAMBA: ‘Mutshima wa mujinguludi wa mianda udi upeta lungenyi; matshi a bena meji adi akeba lungenyi.’ (Nsumuinu 18:15) Teta kumanya malu onso. Ujingulule tshidi yonso wa mu dîku dienu ujinga. Yukila nabu ne ubateleje.—Nsumuinu 20:5.

Udi mua kuenza tshinyi padi muntu unudi banange ufua? Kuikadi ne bundu bua kuleja muudi udiumvua to. Vuluka ne: nansha Yezu “wakapuekesha binsonji.” (Yone 11:35; Muambi 3:4) Mbimpe kuikala kabidi ne dîba dia bungi dia kuikisha ne kulala. (Muambi 4:6) Kuenza nunku, nekukuambuluishe bua kupita bimpe ne bualu budi bukubungamija.

TSHIUDI MUA KUENZA:

• Kumpala kua ntatu kunufikila, ikala ne tshibidilu tshia kuyukila ne bena mu dîku diebe. Padi tshilumbu tshimueneka, nebikale bipepele bua kuyukila nebe

• Yukila ne bantu bakuabu bakadi bapete lutatu lua muomumue ne luebe

3 KEBA DIAMBULUISHA

TSHIDI BIBLE WAMBA: ‘Mulunda utu wananga mu bikondo bionso, muanetu utu waleja bulela mu tshikondo tshia dikenga.’ (Nsumuinu 17:17) Balunda bebe badi mua kuikala basue kukuambuluisha, kadi badi mua kuikala kabayi bamanye tshiudi natshi dijinga. Kubengi bua kubambila tshiudi natshi dijinga. (Nsumuinu 12:25) Ukebe kabidi diambuluisha dia mu nyuma kudi bantu badi bamanye Bible. Mibelu ya mu Bible idibu mua kukupesha neikuambuluishe.—Yakobo 5:14.

Neupete diambuluisha diudi nadi dijinga wewe muikale ne tshibidilu tshia kudisangisha ne bantu badi bitabuja Nzambi ne beyemena milayi yende. Nebikukoleshe kabidi bikole wewe wambuluisha bakuabu badi dijinga ne busambi. Ubambile malu a Yehowa audi mumanye ne milayi yende. Difila bikole mu diambuluisha bantu bakuabu badi dijinga ne diambuluisha, kulekedi kusomba ne bantu badi bakunange ne badi bakutabalela.—Nsumuinu 18:1; 1 Kolinto 15:58.

TSHIUDI MUA KUENZA:

• Yukila ne mulunda webe wa pa muoyo ne itaba diambuluisha diende

• Ikala mumanye diambuluisha diudi nadi dijinga