Dianjila kudilongolola, wenze malu ne meji

Tshilejilu tshia muana mujimine tshidi Yezu ufuma ku dilonda, tshivua ne bua kuikala tshikemeshe balambuishi ba bitadi, bafundi ne Bafalese pavuabu bumvue ne: Nzambi mmusue kubuikidila benji ba mpekatu badi banyingalala. (Luka 15:1-7, 11) Mpindieu Yezu udi uyukila ne bayidi bende. Bua musangu eu udi wenza mudimu ne tshilejilu tshikuabu tshidi tshiakula bua muntu mubanji udi mupete lumu lua ne: mulami wa bintu biende mmuenze bualu kampanda bubi.

Yezu udi ulonda wamba ne: bavua bafunde mulami bua muvuaye muenze mudimu bibi ne bintu bia mfumuende. Nunku mfumuende udi wamba ne: mulami eu udi ne bua kuipatshibua ku mudimu. Mulami udi ukema wamba ne: “Nengenze tshinyi, bu mudi mfumuanyi unnyenga mudimu wa bulami? Tshiena ne bukole bukumbane bua kumbula nabu, ne ndi ne bundu bua kulomba ka pa luse.” Bua kupita bimpe ne tshivua ne bua kumufikila udi wamba ne: “Aaa! ndi mumanye tshingenza, bua padibu bangumbusha ku mudimu wa bulami, bantu bangakidile mu nzubu yabu.” Udi ubikila diakamue bantu bavua ne mabanza ne webeja yonso ne: “Biudi ne bua kufuta mfumuanyi bidi bungi munyi?”​—Luka 16:3-5.

Wa kumpala wakandamuna ne: “Bipiminu lukama bia mafuta a olive.” Mmumue ne: litre ya mafuta 2 200. Muena dibanza uvua ne bua kuikala muntu uvua ne mitshi ya bungi ya olive ne uvua upana mafuta. Mulami wa bintu udi umuambila ne: “Angata mukanda webe wa diumvuangana nawu, somba ne funda lukasa 50 [mmumue ne: litre 1 100].”​—Luka 16:6.

Mulami wakebeja muntu mukuabu ne: “Mpindieu wewe, biudi ne bua kufuta bidi bungi munyi?” Ke yeye kuandamuna ne: “Bipiminu binene lukama bia ntete ya blé.” Mmumue ne: litre 22 000. Mulami udi wambila muena dibanza eu ne: “Angata mukanda webe wa diumvuangana nawu, funda 80.” Nunku uvua mumupuekeshile dibanza bia pa lukama 20.​—Luka 16:7.

Mulami wa bintu utshidi utangila bintu bia mfumuende bia bungenda, nunku mu mushindu kampanda udi ne bukenji bua kukepesha mabanza adi nawu bakuabu kudi mfumuende. Padi mulami ukepeshila bantu makuta avuabu ne bua kufuta udi udia nabu bulunda budi buenza bua bamuambuluishe padibu bamumbusha ku mudimu.

Mu mushindu kampanda mfumu wakapeta lumu lua tshivua tshienzeke. Nansha muvua tshivua tshimufikile tshileja muvuaye mujimije bintu, wakakema bua muvua mulami muenze malu ne kumuelaye kalumbandi, bualu “nansha muvuaye kayi muntu muakane,” uvua “muenze malu ne meji.” Yezu wakamba ne: “Bana ba mu ndongoluelu wa malu eu badi ne meji adi ambuluisha kudi bena tshipungu tshiabu kupita bana ba butoke.”​—Luka 16:8.

Yezu kena wanyisha mushindu udi mulami muye ne malu, anyi ukankamija mushindu mubi uvuaye muenze malu ne budimu to. Kadi uvua usua kuamba tshinyi? Wakambila bayidi bende ne: “Nudikebele balunda ku diambuluisha dia biuma bidi kabiyi biakane, bua padibi bijika, bamone mua kunuakidila mu miaba ya kusombela ya tshiendelele.” (Luka 16:9) Eyowa, muaba eu kudi dilongesha dia kuikala kumona kule ne kuenza malu ne meji. Batendeledi ba Nzambi, anyi “bana ba butoke” badi ne bua kuenza mudimu ne bintu biabu bia ku mubidi mu mushindu muimpe, balame mu lungenyi nsombelu wa kashidi wa mu matuku atshilualua.

Anu Yehowa Nzambi ne Muanende ke badi mua kuakidila muntu mu Bukalenge bua mu diulu anyi mu mparadizu wa pa buloba ku bukokeshi bua Bukalenge abu. Tudi ne bua kudia nabu bulunda buimpe ne lukasa luonso pa kuenza mudimu ne bintu bia ku mubidi bitudi nabi bua kutua malu a Bukalenge nyama ku mikolo. Matuku etu atshilualua adi kaayi ndekelu neikale majadikibue pikala or, arjan, ne bintu bikuabu bia ku mubidi bijimine.

Yezu wakamba kabidi ne: bantu badi ne lulamatu mu bintu bia ku mubidi nebikale bena lulamatu mu malu a mushinga mukole. Yezu wakaleja ne: “Nunku, binuikala kanuyi badileje bena lulamatu mu bualu bua biuma bidi kabiyi biakane, nnganyi wanupesha biuma bidi bilelela [bu mudi malu a Bukalenge bua Nzambi]?”​—Luka 16:11.

Yezu udi uleja bayidi bende ne: nebabalombe bia bungi bua bobu kubakidila mu “miaba ya kusombela ya tshiendelele.” Muntu nansha umue kena mua kuikala mutendeledi mulelela wa Nzambi eku muikale kabidi mupika wa bintu bia ku mubidi bidi kabiyi biakane to. Yezu wakajikija wamba ne: “Muena mudimu kena mua kuikala mupika wa bamfumu babidi to, bualu neakine umue ne neanange mukuabu, anyi nealamate umue ne neapetule mukuabu. Kanuena mua kuikala bapika ba Nzambi ne ba Biuma to.”​—Luka 16:9, 13.