Mishindu ya kuyisha lumu luimpe

BU MUVUA Yezu muyishi wa lumu luimpe wa tshisumi, wakashila bayidi bende tshilejilu. Uvua uya miaba ivua bantu, ubayisha ne ubalongesha ku nzubu yabu ne miaba mikuabu yonso ivua bantu ba bungi. (Mat. 9:35; 13:36; Luka 8:1) Yezu uvua uyisha bantu, ulongesha bayidi bende pa nkayabu, ne ulongesha bisumbu bia bantu binunu ne binunu. (Mâko 4:10-13; 6:35-44; Yone 3:2-21) Dîba dionso divua mpunga umueneka, uvua wambila bantu malu avua abakolesha ku muoyo ne abapetesha ditekemena. (Luka 4:16-19) Uvua uyisha dîba dionso divua mpunga umueneka, nansha pavuaye mutshioke anyi ne nzala. (Mâko 6:30-34; Yone 4:4-34) Patudi tubala malu a mudimu wa Yezu aa mu Bible, kabienaku bitusaka bua kumuidikija anyi? Ke tshitudi basue kuenza, anu bu bapostolo.​—Mat. 4:19, 20; Luka 5:27, 28; Yone 1:43-45.

² Tumonayi mishindu idi bena Kristo bayisha lelu eu anu bu muvua Yezu Kristo mutuadije kuenza kukadi bidimu bitue ku 2 000.

KUYISHA KU NZUBU NE KU NZUBU

³ Bu mutudi Bantemu ba Yehowa, tudi bamanye mudibi ne mushinga bua kuyisha lumu luimpe lua Bukalenge ku nzubu ne ku nzubu. Tudi bayishe ku nzubu ne ku nzubu bikole, bienze bua tshikale tshimanyinu tshietu. Bipeta bimpe bidi bipatuke bidi bijadika mudi diyisha ku nzubu ne ku nzubu bua kupeta bantu ba bungi mu katupa kîpi dikale bualu bua meji. (Mat. 11:19; 24:14) Kuyisha nunku mmushindu muimpe wa kuleja ne: tudi banange Yehowa ne bantu netu.​—Mat. 22:34-40.

⁴ Bantemu ba Yehowa ki mba kumpala ku diyisha ku nzubu ne ku nzubu to. Mupostolo Paulo uvua ulongesha bantu ku mabu. Wakambila batangidi ba ku Efeso bua mudimu wende wa diyisha ne: ‘Katshia ku dituku dia kumpala dimvua mufike mu provense wa Asia, tshivua mudikande bua kunuambila malu onso avua mua kunukuatshisha ne bua kunulongesha ku nzubu ne ku nzubu.’ Mu mushindu eu ne mikuabu kabidi, Paulo ‘uvua mufile bumanyishi bua menemene kudi bena Yuda ne bena Greke bua dinyingalala bua mpekatu kumpala kua Nzambi ne bua ditabuja Mukalenge wetu Yezu.’ (Bien. 20:18, 20, 21) Tshikondo atshi, bakalenge ba bena Lomo bavua bakankamija bantu bua kutendelela mpingu, kadi bantu ba bungi bavua ‘batshina banzambi.’ Bivua bikengela kuenza lukasa bua kukeba “Nzambi uvua muenze buloba ne bintu bionso bidipu,” uvua “wambila bantu ba miaba yonso ne: badi ne bua kunyingalala bua mpekatu yabu.”​—Bien. 17:22-31.

⁵ Lelu eu bidi bikengela kudifila bikole bua kuambila bantu lumu luimpe ne lukasa. Nshikidilu wa ndongoluelu mubi wa malu eu udi wenda usemena ne lukasa. Nunku tudi ne bua kuyisha bikole. Kakuena nyishilu mukuabu ukadi muambuluishe bua kupeta bantu badi ne nzala ya bulelela kupita wa kuyisha ku nzubu ne ku nzubu eu to. Nyishilu eu utshidi anu upatula bipeta bimpe anu muvuabi mu matuku a Yezu ne bapostolo bende.​—Mâko 13:10.

⁶ Udiku wenza mudimu wa ku nzubu ne ku nzubu uwenzelamu anyi? Wewe wenza nanku, neusankishe Yehowa. (Yeh. 9:11; Bien. 20:35) Mudimu wa ku nzubu ne ku nzubu udi mua kuikala mukukolele. Pamuapa, mubidi webe udi ukupangisha bua kuenza mudimu eu bikole anyi mbakupeshe teritware udi bantu ba bungi kabayi basue kukuteleja to. Kudi mua kuikala mikenji ya mbulamatadi idi ikandika mudimu eu. Pamuapa udi mua kuikala ne bundu ne bikukolela bua kutuadija kuyukila ne bantu baudi kuyi mumanye. Nunku dîba dionso diudi uyisha ku nzubu ne ku nzubu, bidi bikuenza buôwa. Kadi kuteketshi mu mikolo to. (Ekes. 4:10-12) Bana benu ba miaba mikuabu badi pabu ne ntatu ya muomumue.

⁷ Yezu wakalaya bayidi bende ne: “Monayi! Ndi nenu matuku onso too ne ku nshikidilu kua ndongoluelu wa malu eu.” (Mat. 28:20) Mulayi eu udi utupesha bukole bua kuenza mudimu wa kuvuija bantu bayidi eu. Tudi tudiumvua anu bu mupostolo Paulo uvua muambe ne: “Bua malu onso ndi ne bukole ku diambuluisha dia yeye udi umpesha bukole.” (Filip. 4:13) Ikala uya mu bisangilu bidi tshisumbu tshilongolola bua kuenza buambi bua ku nzubu ne ku nzubu; bualu wewe muwenze ne bakuabu, nebakukankamije ne nebakuambuluishe. Sambila bua kutantamena ntatu iudi mua kupeta ne udienzeje bikole bua kuyisha lumu luimpe.​—1 Yone 5:14.

⁸ Paudi wambila bakuabu lumu luimpe, udi ubumvuija ‘bua tshinyi udi ne ditekemena diudi nadi’ adi. (1 Pet. 3:15) Neudimuene dishilangana didi pankatshi pa bantu badi batekemena Bukalenge bua Nzambi ne badi kabayi babutekemena. (Yesh. 65:13, 14) Nebikusankishe paudi umanya ne: udi mutumikile dîyi dia Yezu dia ne: “butoke buenu bukenkeshe,” ne udi mua kuikala ne diakalenga dia kuambuluisha bantu bua kufikabu ku dimanya Yehowa ne bulelela budi bufikisha ku muoyo wa tshiendelele.​—Mat. 5:16; Yone 17:3; 1 Tim. 4:16.

⁹ Batu balongolola bua kuenza buambi bua ku nzubu ne ku nzubu ku ndekelu kua lumingu nansha munkatshi mualu. Bimue bisumbu mbilongolole bua kuyisha mêba a dilolo mu teritware mudibi bikole bua kupeta bantu ku nzubu yabu mu munya. Pamuapa bantu batu batamba kuakidila benyi mu mêba a mu mapingaja anyi ku dilolo menemene kupita a mu dinda.

NUKEBE BANTU BADI BAKUMBANE

¹⁰ Yezu wakambila bayidi bende bua ‘kukeba’ bantu badi bakumbane. (Mat. 10:11) Kavua ukebela bantu bavua bakaje muoyo wabu bimpe anu ku nzubu ne ku nzubu to. Kadi uvua uyisha misangu yonso, mu mushindu mulongolola ne pavua mpunga umueneka. (Luka 8:1; Yone 4:7-15) Bapostolo pabu bavua bayisha bantu miaba mishilashilangane.​—Bien. 17:17; 28:16, 23, 30, 31.

¹¹ Bia muomumue lelu, tudi petu ne tshipatshila tshia kuyisha muntu yonso mukenji wa Bukalenge. Mbuena kuamba ne: tudi tuidikija mishindu ivua Yezu ne bapostolo bende benza mudimu wa kuvuija bantu bayidi ne tumanya bimpe dishintuluka dia bikondo ne dia nsombelu ya bantu badi mu teritware wetu. (1 Kol. 7:31) Tshilejilu, bamanyishi ba bungi mbapete bipeta bilenga mu diyisha bantu miaba yabu ya mudimu. Diyisha bantu mu misesu, miaba idibu bikishila, idibu bimanyikila mashinyi, anyi muaba kayi wonso utudi mua kubapeta ndipatule bipeta bilenga mu matunga a bungi. Bimue bisumbu bidi biyisha ne mêsa anyi tumatempu mu teritware yabi. Kabidi, filiale udi mua kulongolola mudimu wa pa buawu wa diyisha mu bimenga binene, miaba idi bantu ba bungi bapitshila, ne kubikila bana betu ba balume ne ba bakaji ba mu bisumbu bia bungi. Nunku bantu badi kabayi ku mabu padi bamanyishi bayaku badi mua kumvua pabu lumu luimpe muaba wonso udibu.

¹² Patudi tupeta muntu udi wanyisha mukenji wa mu Bible miaba idi bantu ba bungi, tudi mua kumupesha mukanda udi muakanyine. Bua kukolesha dijinga diende adi, udi mua kumupesha adrese webe ne nimero yebe ya telefone ne kulongolola bua kumupinganyina, kumuleja site wa jw.org, anyi kumuleja muaba udi tshisumbu tshia pabuipi. Neumone ne: kuyisha miaba idi bantu ba bungi mmushindu mulenga wa kualabaja mudimu webe.

¹³ Mudimu udibu bapeshe bena Kristo lelu ki ngua kuyisha anu lumu luimpe musangu umue paku kujika to. Wewe musue kuambuluisha bakuabu bua kuitababu bulelela budi bufikisha ku muoyo wa tshiendelele, udi ne bua kupinganyina bantu badi banyisha bulelela njila ne njila bua bamone mua kulua bena Kristo bashindame.

DIPINGANYINA BANTU

¹⁴ Yezu wakambila bayidi bende ne: “Nenuikale bantemu banyi . . . too ne ku miaba ya kule menemene ya pa buloba.” (Bien. 1:8) Kadi wakabambila kabidi ne: “Nunku, ndayi nuvuije bantu ba mu bisamba bionso bayidi, . . . nubalongesha mua kutumikila malu onso andi munuambile.” (Mat. 28:19, 20) Kupinganyina bantu kudi mua kutupetesha disanka mu mudimu wa Yehowa. Bantu bavua banyishe lumu luimpe pauvua mubayishe musangu wa kumpala badi mua kuikala ne disanka dia kukumona kabidi. Paudi uyukila nabu malu makuabu a mu Bible, udi mua kukolesha ditabuja diabu kudi Nzambi ne kubambuluisha bua bamanye ne: badi dijinga ne malu a mu nyuma. (Mat. 5:3) Wewe mudilongolole bimpe bua kupinganyina muntu dîba dinuvua bumvuangane nende, udi mua kutuadija kulonga nende Bible. Paudi upinganyina bantu, ikala ne tshipatshila tshia kutuadija kulonga nabu Bible. Katuena anu tukuna ntete ya bulelela to, kadi tudi kabidi tuyimiamina mâyi.​—1 Kol. 3:6.

¹⁵ Kupinganyina bantu kudi mua kukolela bamue bamanyishi. Pamuapa ukadi mupiluke mu dimanyisha bantu lumu luimpe mu minite mikese, ne nyishilu eu udi ukusankisha. Kadi paudi wela meji a kupinganyina muntu bua kuyukila nende malu a mu Bible, udi mua kudimona kuyi mukumbane. Wewe udilongolola bimpe, newakule ne dishindika dionso. Tumikila ngenyi mimpe idibu bafila mu tshisangilu tshia munkatshi mua lumingu. Udi kabidi mua kulomba mumanyishi udi mupiluke bikole bua aye kukufila paudi upinganyina bantu.

KULOMBOLA MALONGA A BIBLE

¹⁶ Pavua mumanyishi Filipo uyukila ne muntu uvua muitabuje buena Yuda uvua wenda ubala Dîyi dia Nzambi, wakamukonka ne: “Udi mumanye bushuwa bualu buudi ubala abu anyi?” Muntu au wakandamuna ne: “Bulelela, mmunyi mundi mua kubumanya bikala muntu kayi mundudike?” Bienzedi nshapita wa 8 udi uleja kabidi ne: Filipo wakatuadija ne tshitupa tshia mu Mifundu tshivua muntu au wenda ubala, “kumuambilaye lumu luimpe lua bualu bua Yezu.” (Bien. 8:26-36) Katuena bamanye bungi bua mêba avua Filipo muyukile ne muntu au to, kadi wakamumvuija lumu luimpe, kufikishabi muntu au ku dilua muena kuitabuja ne kulombaye bua amubatize. Wakalua muyidi wa Yezu Kristo.

¹⁷ Bantu ba bungi lelu ki mbamanye malu a mu Bible bimpe to, nunku bidi mua kutulomba bua kubapinganyina ne kulonga nabu Bible munkatshi mua mbingu, ngondo, tshidimu tshijima anyi kupita apu kumpala kua kulejabu ditabuja ne kukumbanabu bua kubatijibua. Kadi paudi wambuluisha bantu ba muoyo muimpe ne lutulu ne dinanga dionso bua kuluabu bayidi, nebikupeteshe masanka anu muvua Yezu muambe ne: “Disanka dia kufila ndipite dia kuangata.”​—Bien. 20:35.

¹⁸ Kakuyi mpata neujinge bua kulombola dilonga dia Bible ne umue wa ku mikanda idi milongolola bua kulonga ne bantu. Paudi utumikila ngenyi idibu bafila mu tshisangilu tshia munkatshi mua lumingu ne uyisha ne balongeshi bapiluke ba mu tshisumbu, nebikuambuluishe bua kulombola malonga a Bible adi aya kumpala, ne kuambuluisha bantu bua kuluabu bayidi ba Yezu Kristo.

¹⁹ Wewe dijinga ne diambuluisha bua kutuadija dilonga dia Bible ne kudilombola, kutshinyi bua kuambila mutangidi kampanda wa mu tshisumbu tshienu anyi muena Kristo mukuabu udi mumanye mua kulonga bimpe ne bantu to. Ngenyi idi mu Mabeji a Tshisangilu tshia Nsombelu ne mudimu wetu idibu baleja mu manaya a bilejilu mu tshisangilu idi kabidi mua kukuambuluisha. Eyemena Yehowa, umuleje dijinga edi mu disambila. (1 Yone 3:22) Nunku kuoku mushindu, udifundile tshipatshila tshia kulonga Bible ne muntu nansha umue pa kumbusha dilonga dionso diudi mua kuikala ulombola mu dîku diebe. Disanka diebe bua mudimu wa buambi nedivule paudi ulonga Bible ne bantu.

TULOMBOLAYI BANTU BADI BANYISHA BULELELA KU BULONGOLODI BUA YEHOWA

²⁰ Patudi tuambuluisha bantu bua bafike ku dimanya Yehowa Nzambi ne ku dilua bayidi ba Yezu Kristo, badi balua pabu bena mu tshisumbu. Balongi betu ba Bible nebaye kumpala ne nebashindame mu nyuma padibu bamanya bulongolodi bua Yehowa ne benza nabu mudimu pamue. Kubalongesha mua kuenza nunku kudi ne mushinga wa bungi. Filme ne broshire wa Badi benza disua dia Yehowa lelu mbanganyi? mbilongolola nangananga bua tshipatshila etshi. Amue malu adi mu nshapita 4 wa mukanda eu adi kabidi mua kubambuluisha.

²¹ Anu pautshidi utuadija kulonga Bible ne muntu, umuambuluishe bua kumona ne: Yehowa udi wenza mudimu ne bulongolodi kampanda bua kukumbaja mudimu wa diyisha pa buloba lelu eu. Umvuija mushinga udi nawu bintu bietu bia kulongesha nabi Bible, ne mushindu udibu babipatula ne babiabanya pa buloba bujima kudi bena budisuile badi badilambule kudi Nzambi. Bikila mulongi webe wa Bible mu bisangilu ku Nzubu wa Bukalenge. Mumvuija mutu bisangilu bienzeka, wenze bua amanyangane ne bana betu. Panudi nuya mu mpuilu ne mu mpungilu, muambuluisha kabidi bua amanyangane ne Bantemu bakuabu. Mu bikondo bia nunku anyi bikuabu, enza bua adimuene mudi batendeledi ba Yehowa balejangana dinanga didi tshimanyinu tshia bena Kristo balelela. (Yone 13:35) Padi dinanga diende didiye munange bulongolodi bua Nzambi dienda dikola, neasemene kabidi kudi Yehowa bikole.

TUENZE MUDIMU NE MIKANDA YETU

²² Bena Kristo ba kumpala bakalua bamanyishi ba Dîyi dia Nzambi ba tshisumi. Bavua batentula malu a mu Mifundu bua kudilongela ne kualonga mu tshisumbu. Bavua bakankamija bakuabu bua kubala Dîyi dia Nzambi dia bulelela. Nansha muvua mikanda yabu mikese, bavua bayangata ne mushinga wa bungi. (Kolos. 4:16; 2 Tim. 2:15; 3:14-17; 4:13; 1 Pet. 1:1) Lelu, Bantemu ba Yehowa badi benza mudimu ne biamu bidi bienda bipatuka bua kupatula Bible miliyo nkama ne nkama ne bintu bikuabu bidi biambuluisha bua kulonga nabi Bible. Mu bintu abi mudi trakte, broshire, mikanda ne bibejibeji mu miakulu nkama ne nkama.

²³ Paudi uyisha bakuabu lumu luimpe, ditatshisha bua kuenza mudimu bimpe ne bintu bietu bia kulongesha nabi Bible bikadi bulongolodi bua Yehowa bupatule. Paudi umona masanka audi mupete mu dibala mikanda ya Bantemu ba Yehowa ne diyilonga, neumvue dijinga dia kuambila bakuabu biudi mulonge.​—Eb. 13:15, 16.

²⁴ Bua bantu ba bungi, Enternete ke muaba wabu wa kumpala udibu bapetela ngumu. Nunku pa kumbusha mikanda yetu, site wetu wa jw.org ntshia mudimu tshinene tshia kumuangalaja natshi lumu luimpe. Pa buloba bujima, bantu badi mua kubadila Bible ne mikanda yetu ku ordinatere ne kutelejilaku mêyi abi makuata mu miakulu nkama ne nkama. Bantu badi belakana bua kuyukila netu anyi badi basombele miaba idibu ne mpunga mikese ya kuyukila ne Bantemu ba Yehowa badi mua kumanyina malu atudi tuitabuja adi mu site wetu wa jw.org ku mabu.

²⁵ Nunku tudi tuleja bantu site wetu wa jw.org dîba dionso didi mpunga umueneka. Muntu yeye mutuebeje malu atudi tuitabuja, tudi mua kumuleja diakamue diandamuna ku diambuluisha dia telefone anyi ordinatere. Tuetu bapetangane ne muntu udi wakula muakulu mukuabu, anyi muakulu wa tumama, tudi mua kumutuma mu site wetu bua apete Bible ne mikanda yetu mikuabu ya mu muakulu wende. Bamanyishi ba bungi mbaleje bantu filme idi mu site eu bua kutuadija kuyukila nabu malu a mu Bible.

KUYISHA PADI MPUNGA UMUENEKA

²⁶ Yezu wakambila bantu bavua bateleja dîyi diende ne: “Nudi butoke bua pa buloba. . . . Butoke buenu bukenkeshe kumpala kua bantu, bua bamone bienzedi bienu bimpe, batumbishe Tatu wenu udi mu diulu.” (Mat. 5:14-16) Bayidi abu bavua baleja ngikadilu ya Nzambi bualu bavua bidikija Yezu uvua muambe bua bualu buende ne: “Ndi butoke bua pa buloba.” Wakashila bena Kristo tshilejilu pakenzaye bua “butoke bua muoyo” bukenkeshe bua diakalenga dia bonso bavua mua kuteleja.​—Yone 8:12.

²⁷ Mupostolo Paulo wakatushila pende tshilejilu tshia kulonda. (1 Kol. 4:16; 11:1) Pavuaye mu Atena, uvua uyisha bantu bavuaye upetangana nabu mu tshisalu dituku dionso. (Bien. 17:17) Bena Kristo ba mu Filipoyi bakamuidikija. Ke bualu kayi Paulo wakabafundila ubambila ne: bavua basombele ‘munkatshi mua bantu ba tshipungu tshibi tshivua tshikonyangale,’ muvuabu ‘bakenka bu miendu panu.’ (Filip. 2:15) Lelu, tudi mua kukenkesha bulelela bua Bukalenge ku mêyi ne ku bienzedi bietu dîba dionso didi mpunga umueneka bua kuambila bakuabu lumu luimpe. Bushuwa, tshilejilu tshietu tshimpe tshia bantu bena bululame tshidi mua kuleja mutudi bashilangane ne bena panu. Kadi tuetu tubayisha lumu luimpe, nebafike ku dimanya bua tshinyi katuena bu bantu bakuabu.

²⁸ Batendeledi ba Yehowa ba bungi batu bayisha bantu badibu bapetangana nabu ku mudimu, mu tulasa, padibu mu mashinyi anyi padibu benza malu abu makuabu a buatshia buila. Patudi tuenza luendu, tudi mua kubabidila mpunga wa kuyukila ne batudi tuenza nabu luendu. Muntu yonso udi ne bua kuikala ukeba mpunga wa kufila bumanyishi padiye wakula ne bantu miyuki ya malu makuabu. Tuikale badilongolole bua kuyisha bakuabu dîba dionso didi mpunga umueneka.

²⁹ Nebitusake bua kuyisha tuetu tuvuluka ne: tudi tutumbisha Mufuki wetu, tutumbisha kabidi dîna diende. Tudi kabidi mua kuambuluisha bantu ba muoyo muimpe bua kumanyabu Yehowa, kumuenzela pabu mudimu ne kupeta ditekemena dia muoyo didi difumina ku ditabuja Yezu Kristo. Yehowa udi usanka patudi tudienzeja mushindu eu ne udi umona mudi mudimu wetu muikale wa tshijila.​—Eb. 12:28; Buak. 7:9, 10.

TERITWARE

³⁰ Yehowa udi ujinga bua bayishe mukenji wa Bukalenge pa buloba bujima, mu bimenga ne mu misoko. Ke bualu kayi biro bia filiale bitu bipesha bisumbu ne bamanyishi badi bayisha miaba idi kayiyi Bantemu teritware wa kuenzela mudimu. (1 Kol. 14:40) Ke tshivua Nzambi muenze mu bidimu lukama bia kumpala. (2 Kol. 10:13; Gal. 2:9) Bu mudi mudimu wa Bukalenge uya kumpala ne lukasa mu matuku a ku nshikidilu aa, bipeta bimpe bidi bimueneka padibu bakaja malu bimpe bua kuyisha bikole mu teritware wa tshisumbu.

³¹ Mutangidi wa mudimu wa buambi ke udi utangila malu a diyisha lumu luimpe mu teritware wa tshisumbu. Musadidi wa mudimu udi mua kutangila malu a teritware. Kudi mishindu ibidi ya teritware: teritware wa kasumbu ka buambi ne wa muntu nkayende. Muaba udi teritware mukese, batangidi ba tusumbu tua buambi nebikale ne teritware ya tusumbu tuabu mudi bamanyishi ba mu tusumbu atu mua kuyishila. Kadi muaba udi teritware munene, badi mua kupesha mumanyishi yonso wende teritware.

³² Mumanyishi udi ne teritware wende nkayende neikale ne muaba wa kuyishila dîba didibu kabayi balongolole bisangilu bia buambi anyi padiye kayi ne mushindu wa kuya mu kasumbu kabu ka buambi. Tshilejilu, bamue bamanyishi batu ne teritware idi pabuipi ne miaba idibu benzela mudimu ne bayishilamu mêba adibu bikisha mu midi anyi padi mudimu ujika. Batu bapesha amue mêku teritware ya pabuipi ne muaba udibu basombele, nunku batu bayishamu amue matuku ku dilolo. Padi mumanyishi muikale ne teritware udi pabuipi ne muaba udiye musombele, bidi mua kumuambuluisha bua kuyisha mêba a bungi. Kadi bena mu kasumbu ka buambi badi mua kuyisha pabu mu teritware wa muntu nkayende. Wewe ujinga bua bakupeshe webe teritware, udi mua kulomba musadidi wa malu a teritware.

³³ Padibu bapesha mutangidi wa kasumbu ka buambi teritware bua kasumbu kende anyi bapesha mumanyishi teritware kampanda, buonso buabu badi ne bua kuenza ne muabu muonso bua kuyisha muntu yonso udi musombelamu. Panudi nulongolola bua kuyisha mu teritware mujima, nudi ne bua kunemeka mikenji idi ilomba bua kukuba malu a bantu. Mutangidi wa kasumbu ka buambi yonso anyi mumanyishi udibu bapeshe teritware udi ne bua kuenza bua kumujikija mu ngondo inayi. Diakamue padiye umujikija, udi ne bua kumanyisha musadidi wa malu a teritware. Bilondeshile nsombelu udiku, mutangidi wa kasumbu ka buambi (anyi mumanyishi) udi mua kulama teritware au bua kuyishamu kabidi anyi kumupingajila musadidi wa malu a teritware.

³⁴ Padi bena mu tshisumbu bonso beleshangana diboko, badi mua kujikija teritware wabu bimpe, kuepuka diya kuyisha mu teritware umue umue mêba amue kudi bamanyishi bashilashilangane, bualu bidi mua kutonda bantu. Nunku netuleje mutudi tunemeka bana betu ne bantu ba mu teritware wetu.

TUELESHANGANE DIBOKO BUA KUYISHA BANTU BA MIAKULU YONSO

³⁵ Bidi bikengela bua bantu bonso balonge malu a Yehowa Nzambi, a Muanende ne a Bukalenge buende. (Buak. 14:6, 7) Tudi ne dijinga dia kuambuluisha bantu ba miakulu yonso bua kubilabu dîna dia Yehowa, kupeta lupandu ne kuvuala bumuntu bua buena Kristo. (Lomo 10:12, 13; Kolos. 3:10, 11) Ngimue ntatu kayi itudi tupeta patudi tuyisha lumu luimpe miaba idi bantu bakula miakulu ya bungi? Mmunyi mutudi mua kujikija ntatu eyi mu mushindu udi mua kupetesha bantu ba bungi mpunga wa kuteleja mukenji wa Bukalenge mu muakulu udibu bumvua bimpe?​—Lomo 10:14.

³⁶ Batu bapesha tshisumbu tshionso teritware bilondeshile muakulu watshi. Nunku, miaba idibu bakula miakulu ya bungi, bamanyishi ba mu bisumbu bishilangane batu bayisha mu teritware umuepele. Nanku mbimpe bua bamanyishi ba mu tshisumbu tshionso batambe kuyisha anu bantu badi bakula muakulu wa tshisumbu tshiabu. Nebenze nunku kabidi padibu babanya mabeji a dibikila nawu bantu. Kadi padi bamanyishi bayisha muaba udi bantu ba bungi anyi padi mpunga umueneka, badi mua kuyukila ne muntu yonso ne kumupesha mukanda wa mu muakulu kayi wonso.

³⁷ Misangu mikuabu, bena mu bisumbu bia miakulu mikuabu badi mua kupangila bua kuikala kuyisha mu teritware yabu idi kule menemene pa tshibidilu. Biobi nanku, batangidi ba mudimu wa buambi ba mu bisumbu abi nebayukile bua kumvuangana bua kukeba mushindu muimpe wa kuyisha mu teritware ayi. Kuenza nunku nekupeteshe muntu yonso mpunga wa kumvua mukenji wa Bukalenge ne kuenza bua bamanyishi bashilashilangane kabapitshi kumbelu kumue kumue to.​—Nsu. 15:22.

³⁸ Tshitudi mua kuenza ntshinyi bikala muntu udi utuakidila ku tshiibi wakula muakulu mukuabu? Katuambi ne: bamanyishi badi bakula muakulu wende nebalue kumuyisha to. Bamanyishi bakuabu badi ne teritware idi bantu bakula miakulu mikuabu mbalonge miakulu ayi bua kuyisha bantu abu nansha mu mêyi makese. Tudi mua kuleja muntu mua kubadila mikanda yetu anyi kuyambuila mu site wetu wa jw.org, peshi kumupesha mikanda ya mu muakulu wende.

³⁹ Muntu yeye muitabe bulelela ne muoyo mujima, mbimpe tudienzeje bua kukeba muanetu udi mukumbane bua kumuambuluisha mu muakulu udiye umvua bimpe. Tudi mua kumuleja kabidi muaba wa pabuipi udibu benzela bisangilu mu muakulu wende. Yeye ujinga bua muntu udi wakula muakulu wende alue kumutangila, tudi mua kumuleja mua kubueja dilomba diende mu site wetu wa jw.org, bua balue kumutangila. Biro bia filiale nebidienzeje pabi bua kumanya mumanyishi, kasumbu anyi tshisumbu tshidi pabuipi bua kumuambuluisha.

⁴⁰ Tudi ne bua kutungunuka ne kuyisha muntu eu too ne pikalaye mua kutuambila ne: bavua balue kumutangila kudi muntu udi wakula muakulu wende. Imue misangu biro bia filiale bidi mua kumanyisha bakulu ne: ki mbapete mumanyishi udi wakula muakulu wa muntu au to. Biobi nanku, mbimpe tuenze ne muetu muonso bua kutungunuka ne kuyisha muntu udi muitabe bulelela au. Bikalaku mushindu, tudi mua kulonga nende Bible, pamuapa ne mukanda kampanda wa mu muakulu wende. Tuetu tumumvuija bimfuanyi bimpe ne tumulomba bua kubala mvese idibu batele, neumvue amue malu a nshindamenu a mu Bible. Bikalaku muena mu dîku diabu udi mumanye miakulu yonso ibidi, udi mua kuikala umukudimuina.

⁴¹ Bua kulombola muntu udi muitabe bulelela au ku bulongolodi bua Nzambi, mbimpe tumubikile mu bisangilu nansha yeye kayi mua kumvua bionso bialongeshabu bimpe. Padibu babala mvese, kuoku Bible mu muakulu wende, tudi mua kumuambuluisha bua kuyipeta. Kudisangisha ne bakuabu mu tshisumbu kudi mua kumukolesha ne kumuambuluisha bua kutungunuka ne kuya kumpala mu nyuma.

⁴² Tusumbu tukese: Kasumbu kakese nkenza ne bamanyishi badi bayisha mu muakulu udi kawuyi wa tshisumbu tshiabu, nansha mudiku kakuyi mukulu anyi musadidi wa mudimu udi mukumbane bua kulombola tshisangilu lumingu luonso mu muakulu au. Biro bia filiale bidi mua kuanyishila tshisumbu kampanda bua tshikale ne kasumbu kakese anu paditshi tshikumbaja malu adi alonda aa:

1. 1) Bantu ba bungi ba muaba au badi bakula muakulu mukuabu udi mushilangane ne wa mu tshisumbu.

2. 2) Kudi bamanyishi ndambu badi bamanye muakulu au anyi basue kuwulonga.

3. 3) Kasumbu ka bakulu nkanyishe bua kulombola mudimu wa diyisha mu muakulu au.

Bikala kasumbu ka bakulu kajinga kuenza kasumbu kakese, bakulu nebanji kuyukila ne mutangidi wa tshijengu. Udi mua kuikala mumanye bisumbu bidi bijinga pabi kuyisha bantu badi bakula muakulu au. Udi kabidi mua kufila ngenyi mimpe idi mua kuambuluisha bua kumanya tshisumbu tshiakumbana menemene bua kuakidila kasumbu kakese aku. Diakamue padibu bamanya tshisumbu, bakulu nebatumine biro bia filiale mukanda bua kulomba dianyisha bua bitabile tshisumbu atshi bua kuakidila kasumbu kakese.

⁴³ Tusumbu: Biro bia filiale bidi mua kuitaba bua tshisumbu tshiakidile kasumbu kampanda anu paditshi tshikumbaja malu adi alonda aa:

1. 1) Kudi bantu bungi bukumbane badi banyisha bulelela ne kudi didiunda mu muakulu au.

2. 2) Kudi bamanyishi bakese badi bakula muakulu au anyi badi bawulonga.

3. 3) Kudi mukulu anyi musadidi wa mudimu udi mukumbane bua kuludika malu ne kulombola tshisangilu nansha tshimue anyi tshitupa kampanda tshia tshisangilu ku lumingu bu mudi muyuki wa patoke anyi dilonga dia Tshibumba tshia Nsentedi mu muakulu au.

Padi tshisumbu tshikumbaja malu aa mu mushindu mukumbanyine, kasumbu ka bakulu nekatumine biro bia filiale mukanda udi ne malu onso bua kulomba bua tshisumbu atshi tshimanyike ne: tshidi tshitangila kasumbu kampanda. Mukulu anyi musadidi wa mudimu udi utangila kasumbu aku neikale bu “mutangidi wa kasumbu” anyi “musadidi wa kasumbu” bua ikale ukatabalela.

⁴⁴ Diakamue padibu benza kasumbu aku, kasumbu ka bakulu ka tshisumbu tshidi tshiakidila kasumbu aku nekamone bikalaku mushindu wa kusakidila bitupa bikuabu bia bisangilu ne muikala bisangilu bienzeka ku ngondo. Badi mua kutuadija kabidi bisangilu bia buambi bua kasumbu aku. Bena mu kasumbu aku bonso badi benza mudimu ku bulombodi bua kasumbu ka bakulu kadi kakatangila. Bakulu nebafile buludiki buakanyine ne kuleja mudibu batabalela majinga a kasumbu aku ne muoyo mujima. Padi mutangidi wa tshijengu uyisha naku lumingu ludiye ukumbula tshisumbu tshidi tshikatangila, neatumine biro bia filiale luapolo luipi lua mudiku kaya kumpala ne majinga adimu. Mu tshikondo tshiakanyine, kasumbu aku kadi mua kulua tshisumbu. Yehowa neasanke bikala bonso batumikila mibelu idi bulongolodi bufila.​—1 Kol. 1:10; 3:5, 6.

DIYISHA NE BAMANYISHI BAKUABU

⁴⁵ Bena Kristo badilambule badi ne bujitu bua kumanyisha bantu bakuabu lumu luimpe. Kudi mishindu ya bungi ya kuyisha, kadi ba bungi ba kutudi batu basue kupatuka mu buambi ne bakuabu. (Luka 10:1) Ke bualu kayi bena mu tshisumbu batu badisangisha bua kuya mu buambi munkatshi mua lumingu ne ku ndekelu kualu. Batu kabidi badisangisha matuku a dikisha bua kuyisha, bualu bana betu ba bungi kabatu baya ku mudimu matuku au to. Komite wa mudimu wa tshisumbu udi ulongolola bisangilu bia mudimu wa buambi mu mêba ne miaba idi miakanyine mu munya ne dilolo.

⁴⁶ Diyisha ne bamanyishi bakuabu didi diambuluisha bua kuenza mudimu pamue ne “kukankamijangana.” (Lomo 1:12) Bamanyishi bapiabapia badi mua kuyisha pamue ne bamanyishi bakadi bapiluke bua babalongeshe. Mu imue miaba, bitu bimpe bua bamanyishi bayishe babidi anyi kupita pa babidi, bua kuepuka njiwu. Nansha wewe musue kupatuka nkayebe mu buambi, kubuela mu bisangilu bia mudimu wa buambi kudi mua kukolesha bonso badimu. Kumanya anu ne: kudi bantu bakuabu badi bayisha muaba unudi kudi mua kukupesha dikima. Bampanda-njila ne bamanyishi bakuabu kabena ne bua kudiumvua benzejibue bua kubuela mu tshisangilu tshionso tshia buambi tshidi tshisumbu tshienza to, nangananga tshiotshi tshienzeka dituku dionso. Nansha nanku, badi mua kubuela mu bimue bia ku bisangilu ebi lumingu luonso.

⁴⁷ Tuetu bonso tulondayi tshilejilu tshia Yezu ne tshia bapostolo bende. Tuikale bashindike ne: Yehowa neabeneshe bionso bitudi tuenza bua kukumbaja mudimu wa mushinga mukole eu wa kuyisha lumu luimpe lua Bukalenge ne muetu muonso.​—Luka 9:57-62.