Miaba yetu ya ntendelelu

MBATUMINE batendeledi balelela ba Yehowa dîyi bua kudisangisha bua kulongeshibua ne kukankamijangana. (Eb. 10:23-25) “Ntenta wa tshitendelelu, [anyi] ntenta wa kusambakena” ke muaba wa kumpala uvua bena Isalele (tshisamba tshivua Nzambi musungule) bamutendelela. (Ekes. 39:32, 40) Pashishe, Solomo muana wa Davidi wakibaka nzubu anyi ntempelo bua butumbi bua Nzambi. (1 Bak. 9:3) Pakupulabu ntempelo au mu tshidimu tshia 607 K.Y., bena Yuda bakatuadija kudisangishila mu nzubu ivuabu babikila ne: nsunagoga bua kutendelela Nzambi. Pashishe, bakibakulula ntempelo, yeye kulua kabidi muaba munene wa ntendelelu mulelela. Yezu wakalongesha mu nsunagoga ne mu ntempelo. (Luka 4:16; Yone 18:20) Yezu wakalongesha kabidi bantu nansha pa mukuna.​—Mat. 5:1–7:29.

² Panyima pa lufu lua Yezu, bena Kristo bavua badisangishila miaba ya patoke anyi mu nzubu ya bantu bua kulongesha Dîyi dia Nzambi ne kukankamijangana ne bena kuitabuja nabu. (Bien. 19:8, 9; Lomo 16:3, 5; Kolos. 4:15; Filem. 2) Mikuabu misangu bivua bibalomba bua badisangishile kabidi miaba misokome bua kunyema baluishi. Bushuwa, batendeledi ba Nzambi ba kale ba lulamatu bavua ne dijinga dikole dia kudisangisha miaba ivuabu balongolole bua ‘balongeshibue kudi Yehowa.’​—Yesh. 54:13.

³ Nansha lelu eu kabidi, bena Kristo batu badisangishila mu nzubu ya bantu anyi miaba ya patoke. Batu batamba kudisangishila mu nzubu ya bantu bua bisangilu bia mudimu wa buambi. Bana betu batu bitaba bua benzele bisangilu bia nunku mu nzubu yabu batu bangata bualu ebu bu diakalenga. Ba bungi mbamone ne: kufila nzubu yabu bua bisangilu bia nanku nkubambuluishe mu nyuma bikole.

NZUBU WA BUKALENGE

⁴ Nzubu wa Bukalenge ke muaba munene wa bisangilu bia Bantemu ba Yehowa. Pa tshibidilu batu basumba mpangu, bibaka Nzubu wa Bukalenge mupiamupia anyi bakajilula nzubu kampanda. Bua kubenga kutulakaja makuta etu ne kuenza bua miaba yetu ya ntendelelu yambuluishe bikole, bisumbu bia bungi bidi mua kuenzela bisangilu mu Nzubu wa Bukalenge umue padibi bikumbana bua kuenza nanku. Mu imue miaba, bitu bimpe kufutshila nzubu. Bua Nzubu ya Bukalenge mipiamipia ne eyi ivua milombe mudimu wa bungi wa diyakajilula, bitu bimpe kuyibanjija. Kadi padibu balongolola Nzubu wa Bukalenge ukavuaku anu kakese, kabiena bilomba kumubanjija to.

⁵ Kabena ne bua kuasa Nzubu ya Bukalenge milengeja mu mushindu udi ukemesha bantu to. Nansha mudiyi mua kushilangana bilondeshile muaba ne muaba, mmiasa bua kuenzelamu bisangilu. (Bien. 17:24) Bilondeshile muaba ne muaba, Nzubu wa Bukalenge udi ne bua kuikala muaba muimpe wa kuenzela bisangilu bia bena Kristo.

⁶ Bisumbu bionso bia Bantemu ba Yehowa bitu bifila makuta bua kusukula Nzubu wabi wa Bukalenge ne kumulama bimpe. Kabatu basangamu makuta ne kamutu tubondo anyi malongo bua kusanga makuta to. Mutu kashete ka mapa, ne aba badi babuela mu bisangilu badi mua kuelamu makuta ku budisuile bua malu a nzubu eu. Badi baafila ku budisuile ne muoyo mujima.​—2 Kol. 9:7.

⁷ Bena mu tshisumbu bonso badi ne bua kumona difila makuta a kulongoluesha Nzubu wa Bukalenge ne kumulama ne mankenda bu diakalenga. Batu basungula mukulu anyi musadidi wa mudimu udi mua kutangila midimu eyi. Pa tshibidilu, tusumbu tua mudimu wa buambi ke tutu tusukula Nzubu wa Bukalenge batulombola kudi batangidi batu anyi bindondi biabu. Nzubu wa Bukalenge udi ne bua kumueneka ne: ngua Yehowa ne bulongolodi buende, munda ne pambelu.

⁸ Padi bisumbu bia bungi bidisangishila mu nzubu umue, bakulu ba bisumbu ebi nebenze Komite wa dilombola midimu ya ku Nzubu wa Bukalenge bua kutangila midimu idi ne bua kuenzeka bua kulama lupangu ne nzubu. Tusumbu tua bakulu netusungule muanetu umue bua kuikala mutangidi wa komite wa dilombola midimu. Komite eu udi wenza mudimu ku bulombodi bua tusumbu tua bakulu. Udi utangila disukula dia nzubu, bua kujadika ne: mmulama ne mmulongolola bimpe ne kujadika kabidi ne: kudi bintu bia kuenza nabi mudimu. Bidi bikengela bisumbu bionso bikale bieleshangana diboko.

⁹ Padi bisumbu bia bungi bidisangishila mu Nzubu wa Bukalenge umue, bakulu nebenze programe muimpe wa mêba a bisangilu udi mua kuikala ushintuluka. Bakulu nebenze programe eu ne lungenyi lua kuditeka pa muaba wa bakuabu ne dinanga dionso. (Filip. 2:2-4; 1 Pet. 3:8) Tshisumbu nansha tshimue katshiena ne bua kuangata mapangadika pa muaba wa tshikuabu to. Padi mutangidi wa tshijengu ukumbula tshisumbu tshimue mu Nzubu wa Bukalenge eu, bisumbu bikuabu nebishintulule anu mêba a bisangilu adi akengela kushintulula lumingu alu.

¹⁰ Badi mua kuenzela miyuki ya mabaka anyi ya lufu mu Nzubu wa Bukalenge ne dianyisha dia Komite wa mudimu wa tshisumbu. Komite eu udi ukonkonona dilomba dionso bimpe menemene ne wangata dipangadika bilondeshile mibelu idi ifumina ku biro bia filiale.

¹¹ Bana betu badibu banyishila bua kuenzela miyuki ya nunku mu Nzubu wa Bukalenge badi ne bua kuenza malu mu mushindu udi uleja ne: mbena Kristo balelela. Ki mbimpe tshintu nansha tshimue tshidi mua kupendesha Yehowa anyi kunyanga lumu lua tshisumbu tshienzeke ku Nzubu wa Bukalenge to. (Filip. 2:14, 15) Badi kabidi mua kuenzela midimu mikuabu ya bena Kristo mu Nzubu wa Bukalenge ku bulombodi bua biro bia filiale, bu mudi Kalasa ka mudimu wa Bukalenge ne Kalasa ka bampanda-njila.

¹² Tshisumbu tshidi ne bua kunemeka miaba iditshi tshidisangishila. Mvuadilu wetu, didilengeja dietu ne mushindu utudi tulengeja miaba eyi bidi ne bua kuleja ne: tudi tunemeka ntendelelu wa Yehowa. (Muam. 5:1; 1 Tim. 2:9, 10) Ditumikila mibelu eyi didi dileja mutudi tunemeka bisangilu bietu bia bena Kristo.

¹³ Kuenza malu ne bulongame patudi mu bisangilu kudi ne mushinga. Mbilombibue bua bana bikale basomba ne baledi babu. Baledi badi ne bana batekete badi mua kuikala basombela muaba udibu kabayi mua kunyanga ntema ya bakuabu biobi bikengela bua bapatuke nabu pambelu bua kubanyoka anyi bua kubenzela malu makuabu.

¹⁴ Batu basungula bana betu ba balume bakumbane bua kuakidila bantu mu bisangilu ku Nzubu wa Bukalenge. Bana betu aba badi ne bua kuikala bakazamuke, bena musangelu ne bikale ne busunguluji. Badi ne mudimu wa kuela bantu bapiabapia badi balua muoyo ne kubakidila ne disanka, kupesha badi bafika panyima miaba ya kusomba, kubala bungi bua bantu badi mu bisangilu, ne kunzulula biibi ne madidishi bua kapepe kabuele mu nzubu. Padibi bikumbana, mbimpe bana betu badi ne mudimu wa diakidilangana bavuluije baledi bua kutangilabu bana babu, bua kabikadi banyemakana kumpala ne panyima pa bisangilu anyi banaya ku tshiakuidi to. Padi muana wenza mutoyi, umue wa ku badi bakidilangana udi mua kulomba muledi ne bukalanga buonso bua kupatuka nende pambelu bua bateleji balonde bisangilu bimpe. Mudimu udi bana betu aba bakuata udi wambuluisha muntu yonso bua ikale ne disanka mu bisangilu. Mbimpe bana betu badi bakidilangana bikale bakulu ne basadidi ba mudimu.

DIBAKA NZUBU YA BUKALENGE

¹⁵ Mu bidimu lukama bia kumpala, bamue bena Kristo bavua babanji, bakuabu bapele, nunku mupostolo Paulo wakafunda ne: “Ku diambuluisha dia dikumbajijangana, bintu bienu bidi bipite pa mutu mpindieu bikumbajije bidibu bapangile, bua bintu biabu bidi bipite pa mutu bilue pabi kukumbajija binudi bapangile, bua kuikale dikumbanangana.” (2 Kol. 8:14) Lelu eu “dikumbajijangana” dia muomumue edi didi dienzeka. Makuta adi bisumbu bia pa buloba bujima bifila adi ambuluisha bua kuibaka Nzubu ya Bukalenge ne kuyilongolola. Bulongolodi buetu bujima ne bisumbu bidi bipeta diambuluisha edi bidi biela bana betu ba pa buloba bujima badi bafila mapa ne tshianza tshilekelela aba tuasakidila wa bungi.

¹⁶ Bilondeshile muaba ne muaba, biro bia filiale bitu bisungula bua bisumbu kampanda bikale bibuela mu Nzubu ya Bukalenge kansanga. Biobi ke bidi bisungula kabidi tshikondo ne muaba wa bobu kuibaka Nzubu ya Bukalenge mipiamipia ne kuakajilula ikavuaku mu teritware wabi. Padiku bipupu, badi mua kukeba tshia kuenza bua kuakajilula Nzubu ya Bukalenge idi minyanguke, ne imue misangu, kulongoluela kabidi bana betu nzubu.

¹⁷ Biro bia filiale ke bidi bitangila bena budisuile badi mua kuambuluisha bua kukeba miaba ya kuashila Nzubu ya Bukalenge, kuenza plan ya dibaka, kuenzeja mikanda ya mbulamatadi, kuibaka nzubu eyi ne kuyilama bimpe. Bu mudiku dijinga dinene dia kuibaka Nzubu ya Bukalenge mu matunga a bungi, bidi bikengela kuikale bena budisuile ba bungi. Badi balomba bamanyishi bonso bakadi babatijibue badi bakumbane ne basue kuambuluisha bua buwuje dilomba ne badipeshe Komite wa mudimu wa tshisumbu tshiabu. Nansha bamanyishi badi kabayi banji kubatijibua badi mua kuambuluisha mu dibaka Nzubu wabu wa Bukalenge anyi dimuakajilula.

NZUBU YA MPUILU

¹⁸ Bena Kristo ba kumpala bavua batamba kudisangisha mu tusumbu tukese. Kadi misangu mikuabu bavua badisangisha bikale “musumba wa bantu ba bungi.” (Bien. 11:26) Bia muomumue lelu, batendeledi ba Yehowa batu badisangisha ba bungi mu mpuilu ya tshijengu ne mu mpungilu ya rejon. Batu bafutshila miaba kampanda bua kuenza mpuilu eyi. Kadi padi miaba ayi kayiyi ikumbana anyi kayiyiku, badi mua kusumba muaba wa kutendelela udibu babikila ne: Nzubu wa mpuilu.

¹⁹ Imue misangu, batu basumba nzubu ne bamulongolola bua kumuvuija Nzubu wa mpuilu. Kadi misangu ya bungi, batu basumba lupangu ne bibaka nzubu mupiamupia. Nzubu ya mpuilu itu mishilangane ku bunene bilondeshile majinga a muaba ne muaba. Batu bangata dipangadika dia kuibaka nzubu wa nunku anu padi biro bia filiale bikonkonona mushinga bimpe ne bitangila bungi bua mpuilu yikala yenzekelamu.

²⁰ Biro bia filiale bitu bisungula bana betu ba balume bua kuenzeja midimu, ne kulama Nzubu ya mpuilu bimpe. Batu balongolola bua bena mu bijengu bikale basukula nzubu eyi pa tshibidilu, misangu ibidi ku tshidimu ne bua kulongolola tumue tuntu bua kubabidila dinyanguka diayi. Mbimpe bana betu bikale benza midimu eyi ku budisuile. Nunku badi bakankamija bisumbu bionso bua kuenza midimu eyi ne muoyo mujima.​—Mis. 110:3; Mal. 1:10.

²¹ Imue misangu, badi mua kuenzela midimu mikuabu ya bena Kristo mu nzubu eyi, bu mudi tulasa tua malu a mu Bible ne bisangilu bia pa buabi bia batangidi ba bijengu. Anu bu Nzubu wa Bukalenge, Nzubu wa mpuilu mmuaba wa ntendelelu wa tshijila. Patudi tuya ku Nzubu wa mpuilu, ngenzelu wetu wa malu, mvuadilu wetu ne didilengeja dietu bidi ne bua kuleja kanemu anu bu patutu tuya bua kutendelela Yehowa ku Nzubu wa Bukalenge.

²² Bantu bapiabapia ba bungi badi bapuila mu bulongolodi bua Yehowa mu matuku a ku nshikidilu aa. Bualu ebu budi bujadika ne: Yehowa udi utubenesha. (Yesh. 60:8, 10, 11, 22) Nunku tudi ne bua kukuatshisha malu onso adibu balongolola bua kupeta miaba yetu ya ntendelelu ne kuyilama bimpe. Tuetu tuenza nanku, netuleje mutudi ne dianyisha bua mudimu udi nawu miaba eyi. Mudimu au ngua kutuambuluisha bua kukankamijangana nangananga patudi tumona dituku dia Yehowa dienda disemena pabuipi.