Tshibumba tshia Babela

Panyima pa Mvula wa kabutu, bana ba Noa ne bakaji babu bakalela bana ba bungi. Mêku abu akavula, ne kutuadijawu kumuangalaka mu bitupa bishilashilangane bia buloba anu muvua Yehowa mubambile bua kuenza.

Kadi bena mu amue mêku kabakatumikila Yehowa to. Bakamba ne: ‘Tuibakayi tshimenga bua tusombe muaba eu. Tuenzayi tshibumba tshile, lusongo luatshi lubande lutue mu diulu. Nunku netumanyike bikole.’

Yehowa kavua muanyishe tshivua bantu benza atshi to, nunku wakangata dipangadika bua kabatshibaki to. Udi mumanye tshivuaye muenze anyi? Wakenza bua batuadije kuakula miakulu mishilangane. Bu muvuabu kabayi bumvuangana kabidi, bakimanyika mudimu wa dibaka au. Bakalua kubikila tshimenga tshivuabu bibaka atshi ne: Babela, dîna didi diumvuija ne: “Tshibuejakaji.” Bantu bakatuadija kumuangalaka ne kuya kusombela miaba mishilashilangane pa buloba. Kadi bakatungunuka ne kuenza malu mabi miaba ivuabu baye kusombela ayi. Kuvuaku muntu utshivua munange Yehowa anyi? Netumanye bualu ebu mu nshapita udi ulonda.