DILONGESHA 8
Abalahama ne Sala bakatumikila Nzambi
Tshimenga tshia Babela tshivua pabuipi ne tshimenga kampanda tshivuabu babikila ne: Ula, muvua bantu bavua batendelela nzambi ya bungi pamutu pa kutendelela Yehowa. Kadi mu Ula muvua muntu kampanda uvua utendelela anu Yehowa. Dîna diende divua Abalahama.
Yehowa wakambila Abalahama ne: ‘Shiya nzubu webe ne balela bebe, uye ku buloba bungakuleja.’ Pashishe Nzambi wakamulaya ne: ‘Neulue tshisamba tshinene, ne nengenzele bantu ba bungi ba pa buloba bujima malu mimpe ku diambuluisha diebe.’
Abalahama kavua mumanye kuvua Yehowa umutuma to, kadi wakeyemena Yehowa. Nunku Abalahama ne mukajende Sala ne tatuende Tela, pamue ne Lota muana wa muanabu bakasuika mabuki abu, kutumikilabu ne kutuadijabu luendu lule.
Abalahama uvua ne bidimu 75 pavuaye yeye ne bena mu dîku diende bafike mu buloba buvua Yehowa musue bua bamone. Bavua babubikila ne: buloba bua Kanâna. Muomu emu Nzambi wakayukila ne Abalahama, kumulayaye ne: ‘Buloba buonso budi bukunyunguluke ebu nembupeshe bana bebe.’ Kadi Abalahama ne Sala bakavua bakulakaje ne kabavua balele muana nansha umue to. Kadi mmunyi muvua Yehowa mua kukumbaja mulayi wende eu?
“Bua ditabuja . . . Abalahama wakatumikila, kuyaye muaba uvuaye ne bua kupeta bu bumpianyi; wakaya nansha muvuaye kayi mumanye kuvuaye uya.”—Ebelu 11:8