Bimanu bia Yelushalema

Tuanji tupinganayi panyima bidimu ndambu. Muena mudimu mukuabu wa mukalenge Atashasete dîna diende Nehemiya uvua muena Isalele uvua musombele mu tshimenga tshia Shushana mu Pelasa. Muanabu ne Nehemiya wakafuma mu Yuda ne ngumu mibi eyi: ‘Bantu bavua bapingane ku Yelushalema kabena mu bukubi to. Ki mbanji kuibakulula bimanu bia tshimenga ne biibi biatshi bivua bena Babilona babutule to.’ Biakatonda Nehemiya. Uvua musue kuya ku Yelushalema bua kuambuluisha, ke yeye kusambila bua mukalenge amulekele aye.

Pakapita matuku, mukalenge wakamona ne: Nehemiya uvua mubungame. Kumukonkaye ne: ‘Tshitu muanji kukumona wewe mubungame nunku to. Ntshinyi?’ Nehemiya wakamba ne: ‘Mmunyi mundi tshiyi mua kubungama padi tshimenga tshietu tshia Yelushalema tshishale tshinyanguke?’ Mukalenge wakamuebeja ne: ‘Udi musue nkuenzele tshinyi?’ Diakamue Nehemiya wakasambila munda munda. Pashishe wakamba ne: ‘Nganyishila bua nye koku ku Yelushalema bua kuibakulula bimanu.’ Mukalenge Atashasete wakambila Nehemiya ne: uvua mua kuya, kuenzaye kabidi bua bualu kabumufikidi mu luendu luende lule alu to. Wakateka kabidi Nehemiya nguvena wa Yuda, kumupeshaye mabaya bua biibi bia tshimenga.

Pavua Nehemiya mufike ku Yelushalema, wakaya bua kutangila bimanu bia tshimenga. Pashishe wakasangisha bakuidi ne balombodi, kubambilaye ne: ‘Tudi mu nsombelu mubi be! Bidi bikengela tukutule mudimu.’ Bantu bakitaba, bobu kubangisha kuibakulula bimanu.

Kadi bamue baluishi ba bena Isalele bavua babaseka bamba ne: ‘Nansha mukenge udi mua kupula tshimanu tshinudi nuibaka etshi.’ Bantu bavua benza mudimu bakajika matshi ku bipendu abi, bobu kutungunuka anu ne kuibaka. Tshimanu tshivua anu tshienda tshilepa ne tshikolakana.

Baluishi bakangata dipangadika dia kubapatukila bafumina nseke mishilashilangane bua kuluisha Yelushalema. Pavua bena Yuda bumvue tshivuabu balongolole atshi, bakumvua buôwa bua bungi. Kadi Nehemiya wakabambila ne: ‘Kanutshinyi to. Yehowa udi netu.’ Wakateka balami bua kulama bantu bavua benza mudimu, baluishi kupangilabu bua kulua kubaluisha.

Bakajikija bimanu ne biibi mu matuku 52 tshianana. Nehemiya wakalua ne bena Lewi bonso ku Yelushalema bua kubanjija bimanu. Wakabateka mu bisumbu bibidi bia bimbi ba misambu. Bakabandila pa tshimanu ku bibandilu bia ku Tshiibi tshia ku Mpokolo wa mâyi, pashishe kuyilabu nseke ibidi mishilangane bua kunyunguluka tshimenga. Bavua bimbila Yehowa ne mpungi, ne bintu bia kukumakaja, ne nzenze. Ezela wakaya ne tshisumbu tshimue, Nehemiya ne tshikuabu, too ne pavuabu basambakene ku ntempelo. Bantu bonso: balume, bakaji, ne bana, bakafila milambu kudi Yehowa, bobu kusanka. Mbila yabu ya disanka ivua yumvuika too ne kule.