Yezu udi umuenekela balobi

Matuku makese panyima pa Yezu mumane kumuenekela bapostolo, Petelo wakapangadija bua kuya kuloba mu Mbuu wa Galela. Tomase, Yakobo, Yone, ne bayidi bakuabu bakaya nende. Bakaloba butuku bujima kadi kabavua bakuate mushipa nansha umue to.

Patshiatshia dituku diakalonda, bakamona muntu mukuabu muimane ku muelelu wa mâyi. Wakabela dîyi wamba ne: ‘Nukadi bakuate mushipa nansha umue anyi?’ Bakamuambila ne: “Tòo!” Muntu au kuamba ne: “Elayi kapamba ku dia balume dia buatu.” Pakelabu kapamba, kakuwula ne mishipa, kupangabu ne mua kukabandisha mu buatu. Diakamue Yone wakajingulula ne: muntu au uvua Yezu, ke kuambaye ne: “M’Mukalenge!” Musangu umue Petelo kudiela mu mâyi, kutuadijaye kuowela too ne ku muelelu. Bayidi bakuabu bakamulonda mu buatu.

Pakafikabu ku mukuna, bakamona diampa ne mishipa biteka pa kapia. Yezu kubambila bua balue ne ndambu wa mishipa bua kukumbaja ku bivuaye nabi. Pashishe kubambilaye ne: ‘Luayi nudie.’

Pakajikijabu kudia, Yezu wakebeja Petelo ne: ‘Udi munnange kupita diloba anyi?’ Petelo kuamba ne: ‘Eyowa, Mukalenge, wewe udi mumanye ne: ndi mukunange.’ Yezu kuamba ne: ‘Nunku udiishe bana banyi ba mikoko.’ Yezu wakamuebeja kabidi ne: ‘Petelo, udi munnange anyi?’ Petelo kuamba ne: ‘Mukalenge, wewe udi mumanye ne: ndi mukunange.’ Ke Yezu ne: “Ulame mikoko yanyi mikese.” Yezu kumuebeja kabidi musangu muisatu. Petelo wakabungama bikole. Wakamba ne: ‘Mukalenge, wewe udi mumanye malu onso. Udi mumanye ne: ndi mukunange.’ Ke Yezu kuamba ne: “Udiishe mikoko yanyi mikese.” Pashishe wakambila Petelo ne: “Tungunuka ne kundonda.”