Mudi lumu luimpe luenda luyishibua

Yehowa ukadi pa kujikija makenga atudi nawu ku diambuluisha dia Bukalenge buende. Bantu bonso badi ne bua kumvua lumu luimpe elu. Yezu uvua musue bua bayidi bende bamanyishe mukenji eu kudi muntu yonso! (Matayi 28:19, 20) Mmushindu kayi udi Bantemu ba Yehowa batumikila dîyi divua Yezu mutume edi?

1. Mmushindu kayi udi Matayi 24:14 wenda ukumbana lelu eu?

Yezu wakamanyisha ne: “Nebayishe lumu luimpe elu lua Bukalenge pa buloba bujima budi bantu basombele.” (Matayi 24:14) Tuetu Bantemu ba Yehowa tudi tuenza mudimu wa mushinga mukole eu ne disanka dia bungi. Tudi tuamba lumu luimpe elu pa buloba bujima mu miakulu mipite pa 1 000! Mudimu munenanenayi eu udi ulomba malu a bungi ne dilongolola malu bimpe. Bu Yehowa kayi utuambuluisha, katuvua mua kuwenza to.

2. Bua kuyisha bantu tutu tuenza tshinyi?

Tutu tuyisha bantu miaba yonso itudi tutuilangana nabu. Tutu tuyisha “ku nzubu ne ku nzubu” anu bu bena Kristo ba mu bidimu lukama bia kumpala. (Bienzedi 5:42) Mudimu mulongolola bimpe nunku udi utuambuluisha bua kuyisha bantu ba bungi menemene tshidimu tshionso etshi. Kadi bu mututu katuyi anu tupeta bantu bakuabu ku mabu, tutu tuyisha kabidi miaba ya bantu ba bungi. Tutu anu tukeba mpunga ya kuambila bantu malu a Yehowa ne a bidiye mulongolole.

3. Nnganyi udi ne dibanza dia kuamba lumu luimpe?

Muena Kristo mulelela yonso udi ne bua kuambila bantu bakuabu lumu luimpe. Katuena tunaya ne mudimu eu to. Tudi tuwenza ne bukole buetu buonso bilondeshile mudi nsombelu wetu, bualu tudi bamanye ne: mioyo ya bantu idi mu njiwu. (Balayi 1 Timote 4:16.) Kabatu batufutshilawu to, bualu Bible udi wamba ne: “Nuvua bapete tshianana, nufile tshianana.” (Matayi 10:7, 8) Bonso kabatu anu batuteleja to. Kadi tudi anu tutungunuka ne mudimu wa diyisha, bualu kuwenza nkutumikila Yehowa, kabidi kudi kumusankisha.

BUELA MU BUONDOKE

4. Tutu tudienzeja bikole bua kuyisha bantu bonso

FILME: Diyisha “miaba ya kule menemene ya pa buloba” (7:33)

• Ntshinyi tshidi tshikukemesha bua mushindu udi Bantemu ba Yehowa badienzeja bua kuyisha?

Balayi Matayi 22:39 ne Lomo 10:13-15, pashishe nuandamune nkonko eyi:

• Mmushindu kayi udi mudimu wetu uleja ne: tudi banange bantu netu?

• Ntshinyi tshitu Yehowa umvua bua bantu badi bayisha lumu luimpe?​—Tangilayi mvese wa 15.

5. Tudi benzejanganyi ba mudimu ne Nzambi

Kudi malu a bungi adi ajadika ne: Yehowa udi ulombola mudimu wetu. Tshilejilu, muanetu wa balume mukuabu wa mu Nouvelle-Zélande, diende Paul, uvua mutuilangane ne mamu mukuabu pavuaye uyisha ku nzubu ne ku nzubu mu mapingaja. Mu dinda dia dituku adi, mamu au uvua musambile bua muntu kulua kumuyisha, usambila utela Nzambi mu dîna diende dia Yehowa. Paul udi wamba ne: “Panyima pa mêba 3, meme kukokola kua mamu au.”

Balayi 1 Kolinto 3:9, pashishe nuandamune lukonko elu:

• Mmushindu kayi udi malu atu enzeka, bu mudi bua muena mu Nouvelle-Zélande ebu, ajadika ne: Yehowa udi ulombola mudimu wa diyisha?

Balayi Bienzedi 1:8, pashishe nuandamune lukonko elu:

• Bua tshinyi bidi bikengela Yehowa kutuambuluisha bua kukumbaja mudimu wetu?

Udi mumanye anyi?

Mu bisangilu bietu bia munkatshi mua lumingu luonso elu, batu batulongesha mua kuyisha. Biwikala ukadi mubuelamu nansha musangu umue, udi wela meji kayi bua mushindu utubu balongeshamu?

6. Tudi tutumikila mukenji wa Nzambi wa kuyisha

Mu bidimu lukama bia kumpala, baluishi bakajinga kupangisha bayidi ba Yezu bua kuyisha. Bena Kristo ba kumpala abu bakakuila bukenji buabu bua kuyisha lumu luimpe pa ‘kulujadika kumpala kua bakokeshi.’ (Filipoyi 1:7) Ke tshidi Bantemu ba Yehowa benza pabu lelu eu.a

FILME: Diakuila lumu luimpe ku tubadi (2:28)

Balayi Bienzedi 5:27-42, pashishe nuandamune lukonko elu:

• Bua tshinyi katuakulekela kuyisha?​—Tangilayi mvese wa 29, 38, ne wa 39.

TSHIA KUKUATA

Yezu uvua mutumine bayidi bende dîyi bua kuyisha lumu luimpe mu bisamba bionso. Yehowa udi wambuluisha bantu bende bua kuenza mudimu au.

Diambulula

• Lumu luimpe ludi luambibua pa buloba bujima mushindu kayi?

• Nku tshinyi kudi mudimu wetu uleja ne: tudi banange bantu netu?

• Buebe wewe, kuyisha kudi mua kutupetesha disanka anyi? Bua tshinyi?

BIA KUTANGILA KABIDI

Mona mutu Bantemu ba Yehowa bayisha bantu mu bimenga binene.

Mudimu wa pa buawu wa diyisha mu bimenga binene: mu Paris (5:11)

Ntshinyi tshivua Bantemu ba Yehowa benze bua kuyisha bena tshimuangi?

Batu bajikija nyota ya bena tshimuangi ya malu a Nzambi (5:59)

Diumvuila nkayebe disanka didi nadi muntu udi mudifile matuku ende onso mu mudimu wa diyisha.

Ndi ne disanka mundi musungule mudimu eu bua kashidi (6:29)

Tangila mapangadika avua tubadi tuangate adi matuambuluishe bua kuyisha bipepele.

“Bamanyishi ba Bukalenge badi baya ne bilumbu biabu ku tubadi” (Bukalenge bua Nzambi budi bukokesha!, nshapita wa 13)