DILONGESHA DIA 45
Mua kubenga kulamata luseke kampanda mu malu a bena panu
Yezu wakalongesha ne: bayidi bende kabena ne bua ‘kuikala ba pa buloba’ to. (Yone 15:19) Abi bidi biumvuija kabidi kubenga kulamata luseke kampanda mu malu a bena panu, mmumue ne: kubenga kudibueja mu malu, bu mudi a tshididi tshia bena panu ne a mvita. Kadi mu bulelela, kabitu anu bipepele to. Badi mua kutupetula anyi kutuseka anu bua bualu abu. Mmushindu kayi utuashala katuyi ne luseke lutudi balamate mu malu a bena panu kadi tushala balamate anu Yehowa Nzambi?
1. Mmunyi mudi bena Kristo balelela bamona mbulamatadi ya bantu?
Bena Kristo badi banemeka mbulamatadi. Tudi tutumikila dîyi dia Yezu dia ‘kufuta Kaisa bintu bia Kaisa,’ tuambe ne: tutumikila mikenji ya mbulamatadi, bu mudi ya kufuta bitadi. (Mâko 12:17) Bible udi uleja ne: mbulamatadi ya bantu idi ikokesha lelu bualu Yehowa mmuyanyishile bua kukokesha. (Lomo 13:1) Nanku tudi bajadike ne: bukokeshi buayi budi ne mikalu anyi budi kuinshi kua bua Nzambi. Ke bualu kayi tudi tuetu tutekemena anu kudi Nzambi ne Bukalenge buende bua mu diulu bua kujikijila bantu ntatu yabu.
2. Mmunyi mutualeja ne: katuena baditeke luseke kampanda mu malu a bena panu?
Anu bu Yezu, katutu tubuelakana mu malu a tshididi to. Pakamona bantu tshishima kampanda tshivua Yezu muenze, bakajinga kumuteka mukalenge wabu pa buloba apa; kadi wakabenga. (Yone 6:15) Bua tshinyi wakabenga? Wakalua kumvuija wamba ne: “Bukalenge buanyi ki mbua pa buloba ebu to.” (Yone 18:36) Mutudi bayidi ba Yezu, tudi tuleja mutudi katuyi balamate luseke kampanda mu malu a panu mu mishindu ya bungi. Tshilejilu, katutu tuya ku mvita to. (Balayi Mika 4:3.) Tudi tunemeka bimanyinu bia ditunga, bu mudi dibendele, kadi katutu tubikukuila to. (1 Yone 5:21) Katuena tutumbisha anyi tubipisha muena tshididi kampanda anyi tshisumbu kansanga tshia tshididi nansha. Eyi ngimue ya ku mishindu itudi tuleja ne: tudi tuetu balamate anu ku mbulamatadi wa Nzambi anyi Bukalenge buende.
BUELA MU BUONDOKE
Tumonabi nsombelu idi mua kutubueja mu diteta dia kufuana kuditeka luseke kampanda mu malu a bena panu; tumone kabidi muudi wewe mua kuangata mapangadika asankisha Yehowa.
3. Bena Kristo balelela kabena ne luseke ludibu mu malu a bena panu to.
Yezu ne bayidi bende mbatushile tshilejilu tshimpe. Balayi Lomo 13:1, 5-7 ne 1 Petelo 2:13, 14. Pashishe, nutangile FILME ne nuandamune nkonko idi ilonda.
Bua tshinyi tudi ne bua kunemeka bamfumu ba mbulamatadi?
Nku malu kayi kutudi mua kuleja ne: tudi tubakokela?
Mu bikondo bia mvita, matunga makuabu atu amba mudiwu kaayi abuelakanamu, kadi eku mikale ambuluisha badi mu mvita. Mpindieu kubenga kubuelakana mu malu a bena panu kudi kumvuija tshinyi menemene? Balayi Yone 17:16. Pashishe, nutangile FILME ne nuandamune lukonko ludi lulonda.
Kubenga kulamata luseke kampanda mu malu a bena panu kudi kumvuija tshinyi?
Bakokeshi bobu batulomba bua kuenza bualu budi bubengangana ne mikenji ya Nzambi, netuenze tshinyi? Balayi Bienzedi 5:28, 29. Pashishe, nutangile FILME ne nuandamune nkonko idi ilonda.
Padi mikenji ya bantu ibengangana ne mikenji ya Nzambi, nya nganyi itudi ne bua kutumikila?
Udi mua kulejaku bikondo biudi umona ne: bena Kristo kabena mua kutumikila bamfumu ba mbulamatadi anyi?
4. Mu lungenyi ne mu bienzedi, wepuke dilamata luseke kampanda mu malu a bena panu
Balayi 1 Yone 5:21. Pashishe, nutangile FILME ne nuandamune nkonko idi ilonda.
Bua tshinyi muanetu Ayenge wa mu filme eu wakabenga kubuela mu tshisumbu tshia tshididi anyi kuenza bilele bikuabu bia malu a ditunga, bu mudi dinemekela dibendele?
Buebe wewe, Ayenge uvua muangate dipangadika dia meji anyi?
Nnsombelu kayi mikuabu idi mua kutubueja mu diteta dia bafuane tualamata luseke kampanda mu malu a bena panu? Tangilayi FILME, pashishe nuandamune nkonko idi ilonda.
Mmunyi mutudi mua kushala katuyi ne luseke lutudi balamate padi bena matunga mashilangane banaya manaya?
Mmushindu kayi utudi mua kushala katuyi ne luseke lutudi balamate padi mapangadika a bamfumu ba tshididi atusankisha anyi kaayi atusankisha?
Ngumu itudi tubala anyi tumvua ku tudiomba nansha kudi balunda idi mua kutufikisha ku dilamata luseke kampanda lua malu a bena panu mushindu kayi?
Mmu binganyi mudi muena Kristo ne bua kuikala kayi ne luseke ludiye mulamate mu malu a bena panu mu meji nansha mu bienzedi?
MUNTU YEYE MUKUEBEJE NE: “Bua tshinyi nuenu kanutu nunemekela dibendele anyi nuimba musambu wa ditunga?”
Neumuambile tshinyi?
TSHIA KUKUATA
Bena Kristo badi badienzeja bikole bua kubenga kubuelakana mu malu a tshididi mu meji, mu mêyi, nansha mu bienzedi biabu.
Diambulula
Ndibanza kayi ditudi nadi kumpala kua mbulamatadi ya bantu?
Bua tshinyi katuena tulamata luseke kampanda lua malu a tshididi?
Nnsombelu kayi idi mua kutubueja mu diteta dia kulua bu badi luseke kampanda mu malu a bena panu?
BIA KUTANGILA KABIDI
Mmalu kayi atudi pamuapa mua kudipangisha bua kubenga kuikala ne luseke lutudi balamate mu malu a bena panu?
Mmunyi mudi mêku mua kudianjila kudilongolola ku diteta dia kuikala bu bena luseke kampanda mu malu a bena panu?
Padi malu a bantu mu tshibungi enzeka, kuikadi ne luseke luudi to (4:25)
Bua tshinyi lumu lua kuluila ditunga dienu kaluena anu ne mushinga mupite wa malu makuabu onso to?
Mona muudi mua kushala ‘kuyi wa pa buloba’ paudi ne mapangadika a kuangata mu malu a midimu.
‘Muntu ne muntu neadiambuile bujitu buende’ (Tshibumba tshia Nsentedi, 15/3/2006)