Mêyi a mbangilu

Mukanda wa Mvese idi itangila nsombelu wa buena Kristo newukupepejile malu bua kupeta mvese anyi bilejilu bia bantu badibu batele mu Bible bidi mua kukuambuluisha bua kutantamena ntatu iudi upeta. Newukuambuluishe kabidi bua kupeta mvese mimpe ya kukankamija nayi bakuabu ne kubambuluisha bua kuangata mapangadika adi atumbishisha Yehowa. Sungula tshiena-bualu tshidi tshikusankisha. Neupetamu nkonko mimpe ne bilejilu bia mu Bible biamba mu tshikoso. (Bala kazubu ka “Mua kutambakana mu mukanda eu.”) Muomu amu pamu neupetamu mvese yakupetesha mibelu ne busambi buudi ukengela. Neupete kabidi bubanji bua mêyi malenga a mu Bible a wewe kuambuluisha nawu bakuabu anyi kubakankamija nawu.

Mua kutambakana mu mukanda eu

Bua kupeta tshiena-bualu, tangila mu kazubu ka tshikebelu, anyi muaba udi bitupa binene. Mukanda wa Mvese idi itangila nsombelu wa buena Kristo mmukosolola mu bitupa binene 7 ebi: Ntatu, Bikadilu, Tshisumbu, Malu a ku dituku, Dîku, Bulunda buetu ne Yehowa, ne Ngikadilu. Pamuapa neupete tshiena-bualu tshiudi ukeba mu tshimue tshia ku bitupa abi. Tangila mu tshitupa tshidi tshiakanyine, usungule tshiena-bualu tshiudi ukeba. Wewe kuyi mumanye tshitupa tshidi ne bualu buudi ukeba, tangila mu Biena-bualu bionso bua usungule. Mu tshiena-bualu tshionso mudi tumitu tua bualu tufunda mu maleta mafiikisha. Tumue tua kuditu mmalu mamba tshianana, tukuabu nnkonko. Paudi ubala mvese mifiikisha idi ilondela kamutu ka bualu, konkonona bimpe umone mudiyi ijadika malu au anyi yandamuna nkonko ayi. Misangu mikuabu, tshiena-bualu ntshikosolola mu bitupa bua upete malu audi ukeba pa lukasa. Bualu bukuabu, kudi mvese idibu bafunde ne: “Bala kabidi.” Mvese ayi idi ne ngenyi idi ipetangana ne tshiena-bualu atshi. Neumone kabidi bafunde miaba ya bungi ne: “Tshilejilu tshia mu Bible.” Kudi tshiambilu tshidi tshileja lungenyi lunene anyi dilongesha didi mu mvese idibu batele ayi. Tshiambilu atshi netshikuambuluishe bua kumanya tshiudi mua kukeba mu mvese iwabala ayi.

Tshiena-bualu tshionso tshidi mu mukanda eu ki mbatshielele mvese yonso idi itshitangila to. Kadi mukanda mmuenza bua kukupetesha muaba uudi mua kutuadijila didikebuluila, kuya too ne mu mikanda mikuabu. (Nsu 2:1-6) Bua kukebulula malu kuya nawu mu buondoke, bala mvese miledila ne mamanyisha a mu Bible wa kulonga nende adi mu Bible—Nkudimuinu wa bulongolodi bupiabupia wa muakulu mukuabu uudi umvua. Bala Mukanda wa makebulula wa Bantemu ba Yehowa anyi wa Index des publications des Témoins de Jéhovah bua kuya mu buondoke bua diumvuija dia mvese kampanda anyi kumanya mushindu wa kumutumikila. Mikanda ayi neyikuleje bintu bitukadi bapatule bidi biumvuija mvese au. Mu bintu bia ndekelu menemene bitudi bapatule mudi ngumvuilu mupiamupia wa mvese au.

Mukanda wa Mvese idi itangila nsombelu wa buena Kristo ukuambuluishaku bua kupeta meji, dimanya, ne lungenyi bidi mu Mifundu minsantu. Paudi ubala mukanda eu neutuishibue bikole menemene ne: “Dîyi dia Nzambi didi ne muoyo, ne bukole.”—Eb 4:12.