Ndongeshilu mupepele

Tshivua Yezu muenze

FILME: Yezu ufila tshilejilu tshia mudi Tatu wetu ututabalela

1. Tangila FILME, anyi bala Matayi 6:25-27. Pashishe welangane meji a nkonko idi ilonda eyi:

1. Ntshilejilu kayi tshivua Yezu mufile tshia mudi Yehowa ututabalela?

2. Nansha muvua Yezu mumanye malu a bungi a nyunyi, wakatamba kuimanyina pa malu kayi mapepele? Bua tshinyi ndongeshilu au uvua mukumbane?

Dilongesha

2. Patudi tulongesha bantu malu mapepele, nebaavuluke ne netulenge mioyo yabu.

Idikija Yezu

3. Kuakudi bia bungi to. Pamutu pa wewe kulondela mulongi malu onso audi mumanye mu tshiena-bualu kampanda, imanyina anu pa malu adi mu mukanda unudi nulonga. Paudi wela lukonko, indila ne lutulu luonso bua mulongi andamune. Yeye kayi mumanye diandamuna anyi muambe bualu budi bubengangana ne Bible, muela nkonko mikuabu bua kumueleshisha meji. Diakamue padi mulongi umvua lungenyi lunene bimpe, nupite ku bualu bukuabu.

4. Ambuluisha mulongi bua alamakaje dilongesha dipiadipia ne malu akadiye mumanye. Tshilejilu, kumpala kua kutuadija dilongesha dia dibishibua dia bafue, udi mua kuela mulongi tukonko tua diambulula tukese pa malu akadiye mulonge pa bidi bitangila tshitu tshienzekela muntu padiye ufua.

5. Fila bilejilu bimpe. Kumpala kua kufila tshilejilu, diebeja ne:

1. ‘Tshilejilu tshindi mfila etshi ntshipepele anyi?’’

2. ‘Mulongi neatshiumvue bipepele anyi?’

3. ‘Netshimuambuluishe bua kuvuluka lungenyi lunene anyi neavuluke anu tshilejilu?’