TSHISAKIDILA TSHIA C

Mua kulongeshangana Bible ne mukanda wa Shala ne muoyo kashidi!

Bana betu bavua basambile bikole ne bakebulule malu bimpe bua kupatula mukanda wa Shala ne muoyo kashidi! Bua wowu kukuambuluisha, tumikila malu adi alonda aa paudi ulongeshangana Bible.

Kumpala kua dilonga

1. Dilongolola bimpe menemene. Paudi udilongolola, ikala utuma meji ku majinga a mulongi webe, nsombelu wende, ne malu adiye witaba. Dianjila kuela meji a malu onso adi mafuane kumukolela bua kuumvua ne kuatumikila bimpe. Tangila bintu bidi mu tshitupa tshia “Bia kutangila kabidi” ni bidi mua kuambuluisha mulongi; nanku pikalabi bikengela, wikale mudilongolole bua kubikonkonona panudi nuenda nulonga.

Bua kutuadija dilonga

2. Mulongi yeye muitabe, tuadija ne disambila, ujikije kabidi ne disambila.
3. Wamanya bua kuakudi bia bungi to. Imanyina anu pa malu adi mu mukanda, ulekele mulongi ikale wakula.
4. Panudi nutuadija tshitupa tshipiatshipia, bala lungenyi lunene lua tshitupa atshi, utele kabidi biena-bualu ndambu bia malongesha.
5. Panudi nujikija tshitupa atshi, ela nkonko ya diambulula ya mu tshitupa atshi bua mulongi avuluke malongesha adiye mulonge.
6. Panudi nulonga dilongesha dionso ne mulongi:
1. Balayi bikoso bia mbangilu.
2. Balayi mvese yonso idibu bafunde ne: “Balayi.”
3. Pikalabi bikengela, nubale mvese mikuabu idibu baledile.
4. Tangilayi filme yonso idibu bafunde ne: “Tangilayi” (panuikala nayi).
5. Ela mulongi nkonko yonso.
6. Tuma ntema ya mulongi ku bimfuanyi bidi mu tshitupa tshia “Buela mu buondoke,” umulombe bua abiumvuije.
7. Ambuluisha mulongi ne kazubu ka “Tshipatshila” bua kumona mushindu udiye uya kumpala mu nyuma. Mukankamija pamuapa bua aditekele tshipatshila tshikadibu bafunde mu mukanda, anyi bipatshila bikuabu, peshi bionso bibidi.
8. Ebeja mulongi bikala filme anyi tshimue tshia ku biena-bualu bidi mu tshitupa tshia “Bia kutangila kabidi” tshimusankishe bikole pavuaye ulongolola dilongesha.
9. Dienzeja bua kujikija dilongesha dijima musangu wonso unudi nulonga.

Ku ndekelu kua dilonga

7. Ikala anu ne mulongi mu meji. Lomba Yehowa abeneshe mulongi bua atante aye kumpala ne bua akupeshe meji bua umanye mua kumuambuluisha.