Mujuki wa patshia

KU MITSHI yonso mikuami ya bimuma ku rejon wa Mediterané, amandier ng’umue wa ku eyi idi ikemesha. Ku ndekelu kua ngondo wa Janvier ne ku ntuadijilu wa Février​—kumpala menemene kua mitshi mikuabu yonso—​udi ujuka ku tulu [tua difululuka] tua muvu wa hiver. Kadi, ndijuka kayipu! Mutshi mujima mmubuikila kudi bilongo bikese bikunzubile peshi bitoke, kuenzabi anu bu nsuki mitoke ya muntu mununu, pikala bilongo ebi bitoke.​—Fuanyikija ne Muambi 12:5.

Bena Ebelu ba mu bikondo bia kale bavua babikila amandier ne: “Eu utu ujuka ku tulu,” ne meji matuma ku diela diawu dia bilongo dia patshia anyi kumpala kua dîba. Yehowa wakatumika ne ngikadilu eu wa pa buende wa amandier bua kufuanyikija mukenji kampanda wa mushinga mukole. Ku ntuadijilu kua mudimu wende, Yelemiya wakamona lutonga lua amandier mu tshikena-kumona. Abi bivua biumvuija tshinyi? Yehowa wakumvuija ne: “Ndi nshala mutabale bua dîyi dianyi, bua kudikumbaja.”​—Yelemiya 1:12.

Anu mudi amandier ‘ujuka ku tulu’ ne lunkelu, ke muvua Yehowa ‘mujuke ne lunkelu’ bua kutuma baprofete bende bua kudimuijabo tshisamba tshiende ku manyoka a bupidia. (Yelemiya 7:25) Ne kakuikisha to​—‘neashale mutabale’—​too ne pakumbana dîyi diende dia mulayi. Nunku, mu 607 K.B.B., pakumbanyine tshikondo tshijadika, ke pakadituta dilumbuluisha dia Yehowa pa ditunga ditontolodi dia Yuda.

Dîyi dia Yehowa didi dimanyisha se: dilumbuluisha dia muomumue nediditute pa bulongolodi ebu bubi butudi tusanganyibua mpindieu. (Musambu wa 37:9, 10; 2 Petelo 3:10-13) Ne meji matuma ku dikumbaja dia dilumbuluisha edi, muprofete Habakuka udi utushindikila ne: “Bualu, tshikena-kumona tshitshidi bua tshikondo tshijadika, . . . tungunuka ne kutshindila; bualu, netshikumbane bushuwa. Katshiakujanguluka to.” (Habakuka 2:3) Diela bilongo bilenga kudi amandier didi dituvuluija se: Yehowa neashale mutabale bua dîyi diende, bua kudikumbaja.

[Mêyi a dianyisha bua tshimfuanyi mu dibeji 32]

Pictorial Archive (Near Eastern History) Est.