Bible​—Mulombodi udi muakanyine bantu lelu’eu

Malongesha, bilejilu ne mêyi-makulu bia mu Bible mbiakanyine menemene bantu ba mu tshikondo tshietu etshi. Mêyi-maludiki a buakane ne a bikadilu bilenga adi mu mukanda eu mbiwuvuije mukanda udi mutambe mikuabo yonso. Bible kêna amu wandamuna ku nkonko ya mushinga mukole to, kadi, udi kabidi ufila mibelu miakanyine, mu mushindu wa se: pikalabo bayitumikile, neyikoleshe makanda a mubidi ne a mu lungenyi a bantu badi base pa buloba.

Bible udi ufila mêyi-maludiki a mu nsombelu wa ku dituku ne ku dituku pa tshidi tshimpe ne tshidi tshibi. Yezu wakamba ne: “Nenku, bionso binudi basue bua bantu banuenzele, nuenu penu, nudi ne bua kubenzelabi mushindu wa muomumue.” (Matayi 7:12) Mukalenge muena meji Solomo wakafila dilongesha edi: “Kunyengi bintu bia mupele, bualu mmupele, kukengeshidi muena dibungama ku tshiibi. Bualu Yehowa nkayende neabakuile, ne kabiyi mpata, neanyenge anyima wa aba badi babanyenga bintu biabo.”​—Nsumuinu 22:22, 23.

Dîyi difunda ku nyuma wa Nzambi ndiakule kabidi bua kuenza mudimu ne mitalu ne kuikala nsombelu mukezuke. Mupostolo Paulo udi ukankamija bua “kuikala ne tshipatshila tshia kusomba mu bupole, muntu kayi ubuelakana mu malu a bende ne nudienzela mudimu mukole ne bianza bienu, amu bu mutuvua banulombe bua kuenza, mu mushindu wa kuenda mu budipope ku mesu kua bantu ba pa mbelu, kanuyi nukengela kantu.” (1 Tesalonike 4:11, 12) “Pabi, midimu ya mubidi idi imueneka patoke; ke tshiendenda tshia masandi, bukoya bua mu meji ne bua ku mubidi, nsombelu mubole, . . . Kadi, mamuma a spiritu adi dinanga, disanka, ditalala, muoyo-mule, bulenga, buimpe, ditabuja, bupole-malu ne didikanda. Kakuena mukenji udi ukandika malu bu nunku.”​—Galatia 5:19-23.

Tangila kabidi didimuija edi: “Kanudilekeledi banupambula. Malunda mabi adi anyanga bikadilu bilenga.” (1 Kolinto 15:33) Bidi bia mushinga mukole bua tuetu kulonda didimuija edi, bualu, “eu udi wenda pamue ne bena meji neavue pende muena meji, kadi, diakabidi nedivuile eu udi umvuangana ne bapote.”​—Nsumuinu 13:20.

Bible mmukanda udi ufila mibelu milenga mitambe bua diumvuangana kuikaladi mu dîku. (Dutelonome 6:4-9; Efeso 5:21-33) Nenku, bantu bavule ki mbajingulule se: dituku kampanda, mulongeshi muende lumu, William Lyon, wakamba ne: “Ndi ngela meji se: kuikala ne dimanya dia mu Bible, nansha muntu kayi mulonge mu université, kudi ne mushinga mukole mutambe kupita kuikala mulonge mu université, kakuyi dimanya dia Bible.” Pa bidi bitangila Bible, John Quincy Adams wakafunda ne: “Pa kutangila mikanda yonso ya pa buloba bujima, kakuena mukanda nansha umue udi mua kuvuija bantu bena diakalenga, bena meji ne ba disanka to.” Uwuvuije pebe mulombodi webe ne konkonona mushindu udiwu mua kukuambuluisha!