Mpuilu ya distrike ya “Dilongesha dia Nzambi”

ABA buonso badi basue kulongeshibua kudi Yehowa mbindile ne muoyo kulukulu mpuilu ya distrike “Dilongesha dia Nzambi.” Programme eu wa matuku anayi udi ne tshipatshila tshia kufila butoke pa bitupa binene bia dilongesha dia mu Bible didi dikuba bena nkristo mu tshikondo tshidi ntatu ya muntu pa nkayende yend’anu ivula ne tshidi bulongolodi ebu busaluke bikole. Miyuki yenjibua neyibambuluishe bua kutantamena muabo muonso ‘tshionso tshidi bu tshiluishi tshia dilongesha dia lupandu.’ (1 Timote 1:10) Aba buonso badi kabidi basue kulua balongeshi ba dilambu ba dîyi dia Nzambi nebapeteleku diambuluisha.

Tudi ne bilejilu bia tshitembu bia kulonda! Mulongeshi mutambe bunene udi’anu Yehowa Nzambi yeye nkayende! Nunku, mbia bushuwa pavua Elihu muambile Yobo ne: Yehowa “ke Eu udi utulongesha kupita nyama ya pa buloba, ne udi utuvuija bena meji kupita bifukibua bibuuki bia mu mawulu.” Wakakonka kabidi bua Yehowa ne: “Nnganyi udi mulongeshi [munene] bu yeye?” (Yobo 35:11; 36:22) Yeshayi 30:20 udi ufunkuna Nzambi bu “Mushidimunyi munenene.”

Diakamue kunyima kua Yehowa, Muanende Yezu Kristo ke udi ulonda. Uvua mumanyike bu “Mulongeshi” ne bu “Mushidimunyi,” anu mudi Evanjeliyo imufunkuna nunku misangu mitue ku 50. Nansha muvuaye muondope bantu bavule mu tshishima ne muenze bikuabu bishima bia bungi, kavua mumanyike bu Muondopianganyi, kadi bu Mulongeshi, Mushidimunyi.​—Matayi 8:19; Luka 5:5; Yone 13:13.

Nunku, mbikumbanyine menemene pavua Yezu mulongeshe balongi bende ne bapostolo bende bua kuikalabo balongeshi bu yeye. Ke tshitudi mua kumona mu Matayi 10:5 too ne 11:1 ne mu Luka 10:1-11. Katupa kakese kumpala kua kubandaye mu diulu, Yezu wakapesha balongi bende mukenji udi mumanyike bikole lelu’eu, wa kulongesha, udi mu Matayi 28:19, 20: “Nunku, ndayi ne nuvuije bantu ba mu matunga wonso balongi, nubatambuishe mu dîna dia Tatu, dia Muana ne dia spiritu munsantu, nubalongeshe mua kutumikila malu wonso anakunutumina dîyi bua kuenza.” Mukanda wa Bienzedi, anu bu mikanda mikuabu mifundisha ku spiritu munsantu idi ilonda kunyima kuawu mu Mifundu ya bena nkristo ya tshiena-Greke, udi ulonda mushindu uvua balongi ba kumpala ba Yezu bakumbaje mudimu wabu ne mitalu, dizanzamuka ne ditabuja.

Lelu’eu, kupita mene bikondo bikuabu bionso, mudimu eu wa kulongeshangana udi ne mushinga mukole. Bu mutukadi mu matuku a ndekelu a bulongolodi ebu bua malu, mioyo mivule idi mu njiwu. Bua bantu kuepukabo dibuelakana mu mpekatu ya Babilone Munene ne kubenga kuabanyangana nende makenga ende, bidi bikengela kubalongesha ne kubambuluisha bua kupatukabo mu Babilone Munene ne kuditeka ku luseke lua Yehowa ne Bukalenge buende.​—Buakabuluibua 18:4.

Bua kuambuluisha Bantemu bende mu madikolela adibo benza bua kukumbaja mudimu wabu eu, ku butuangaji bua bulongolodi buende, Yehowa mmupangadije bua kulongolola mpuilu ya distrike “Dilongesha dia Nzambi.” Mpuilu eyi ya matuku anayi neyituadije ku Mputu ku ntuadijilu kua muvu wa été tshidimu tshia 1993. Musadidi yonso wa Yehowa udiku mua kudilongolola bua kuikala ne dishindika dia kubuela nansha mu umue wa ku mpuilu eyi, kuikala muomu ne kuteya ntema biangatshile ku musambo ne disambila bia mbangilu mu dinayi kunyima kua midi too ne ku disambila dia ndekelu mu dia-lumingu kunyima kua midi!