“Kumpala kua mikuna”
“WAKADIMANYISHA tshisombedi tshia bushuwa buetu tuetu ku tshipungu ne ku tshipungu. Kumpala kua mikuna kuledibua, peshi kua wewe kulela buloba ne bufuke bu mu bisama, eyowa, katshia ku bikondo kabiyi ndekelu ne bua bikondo kabiyi ndekelu wewe udi Nzambi.” (Musambu wa 90:1, 2) Miaku eyi miamba bua Mutufuki wetu idi ikankamija bushuwa, nangananga bua mu tshikondo tshietu etshi tshidi bintu bionso bimueneka kabiyi bishala musangu mule!
Bu mudi mianda ya mpetu yenda inyanguka, bantu bakese ke badi ne ditekemena bua matuku atshilualua. Didiunda dikuate buowa dia dibunda dia bibawu ne dia dinua dia diamba biakavuija bimue bimenga bu miaba ya kuluila mvita. Nansha dîku padi kadiena dishala musangu mule. Diselangana dia mulume ne mulume anyi mukaji ne mukaji ndivue muanda mupiapia udi utamba kumvuika kuonso. Mêku adi mulume anyi mukaji mudishadile nkayende adi enda avula, ne muledi eu udi mudishadile udi atamba kulubakana bikole mu lungenyi. Ngenzelu mikuata buowa ya mushindu’eu idi inyanga ditalala mu mêku mavule: mvita idi ibudika pankatshi pa mulume ne mukaji ne bana badi bakuatshibua ku bukole bua kuenda nabo masandi.
Nnganyi watulombola mu tshikondo etshi tshia ntatu mikole? Mibelu idi ifuma kudi bashikuluji ba mianda ya bienzedi bia bantu, balongeshi ne kudi bantu bakuabo kayena ipangika, kadi mivule ya kudiyi mmitapulukangane. Bua bantu ba tshipungu tshijima ku Mputu, doktere Benjamin Spock uvua mufidi wa ngenyi wa kalanda musenga mu mianda ya nkoleshilu wa bana. Wakajingulula pashishe muvuaye mu tshilema!
Bidi bia meji bua kuikala ne Nzambi bu “tshisombedi” tshietu! Mu tshikondo etshi tshivuanduluke, udi dibue dietu dia kueyemena, udiku ne muoyo “katshia ku bikondo kabiyi ndekelu too ne ku bikondo kabiyi ndekelu.” Wakamba ku butuangaji bua muprofete Malaki ne: “Meme ndi Yehowa; tshiena mushintuluke to.” (Malaki 3:6) Mêyi–maludiki a Nzambi, anu bu mutudi tuasangana mu Bible, mmalelela menemene. Nzambi uvuaku “kumpala kua mikuna,” ne mibelu yende, idi muntu yonso mua kusangana mu Mifundu Minsantu, mmishindamena pa meji ende a tshiendelele. Idi bushuwa tshintu tshitudi tukengela bua kuikala ne disanka ne kulubuluka.
Nenku, mbia meji bua kueyemena malu mamba mu Dîyi dia Nzambi, Bible. Kudilonga kudi kutuambuluisha mua kubabidila meji adi afuma kudi Nzambi. Ikala ne ditabuja mu biudi ulonga ne enza bua se: dimanya edi dikale butoke budi bukulombola mu njila wa muoyo. (Musambu wa 119:105) Amu aba badi benza nunku ke badi ne mabingila bua kuikala ne ditekemena bua matuku atshilualua ne kuikala ne ditalala dilelela dia mu tshieledi tshia lungenyi.