Wapetshi “tshifulu tshia butumbi tshia muoyo”

MUPOSTOLO Yone wakapeta dîyi-dituma bua kufundila muanjelu wa tshisumbu tshia Smirne mêyi aa: “Udileje biebe muena lulamatu, nansha ne ku lufu, nunku nenkupeshe tshifulu tshia butumbi tshia muoyo.” (Buakabuluibua 2:8, 10) Nanku, lumu lutudi tunumanyisha mpindieu ludi lua dibungama ne disanka popamue: Frederick William Franz, muludiki wa Watch Tower Bible and Tract Society of Pennsylvania ne wa Watchtower Bible and Tract Society of New York, Inc., ne biâpu bikuabu bia midimu ya Bukalenge, wajikiji luende lubilu lua pa buloba mu dinda dia 22 Décembre 1992.

Lumu elu ndua dibungama bualu ludi lutumanyisha se: musadidi wa Yehowa uvua munangibue bikole ne uvua muleje lulamatu lua dikema wafiki ku ndekelu kua midimu yende ya pa buloba. Kadi, ludi kabidi lua disanka bualu mêyi a mu Buakabuluibua 14:13 adi akumbanyina lelu’eu muanetu Franz: “Ba diakalenga mbafue badi bafua mu buobumue ne Mukalenge bituadije ku mpindieu. Spiritu udi wamba ne: Eyowa, ke mudi spiritu wamba, biikishe bua midimu yabo, bualu, malu adibo benze adi abalonda.” Muanetu Franz uvua muena kudipuekesha ne budipope; uvua muenji wa mudimu wa dilambu. Uvua ministre mupatudi wa bipeta bilenga mu nkuatshilu wende wa mudimu uvua Yehowa Nzambi mutumike nende bikole bu muena mu kasumbu ka “mupika wa lulamatu ne wa budimu” bua kuenza mudimu wa diabanya biakudia bia mu nyuma kudi “bena mudimu” ne bena nkristo nabo.​—Matayi 24:45-47.

Muanetu Franz uvua mulela mu dia 12 Septembre 1893, mu tshimenga tshia Covington, ku Kentucky, dimue dia ku matunga a Amerike wa ku Nord. Wakumvuila bulelela kudi umue wa ku bakulu bende ba balume. Mu tshikondo atshi, uvua ulonga mu Université wa Cincinnati, ne tshipatshila tshia kulua ministre wa ekleziya presbytérien. Nanku, wakapatuka mu Ekleziya presbytérien, e kudisangisha kudi Balongi ba Bible, ke muvuabo babikila Bantemu ba Yehowa kumpala. Wakatambushibua mu dia 30 Novembre 1913, ne tshidimu tshiakalonda, wakapatuka mu université bua kutuadija mudimu wa bu-colporteur (bumpanda-njila). Mu dia 1 Juin 1920, wakalua muena mu dîku dia Betele wa ku Brooklyn. Ne lukasa luonso, wakatekibua mutangidi wa Biro bia ba-colporteur ne, mu 1926, bakamushintulula midimu pa kumutuma mu tshibambalu tshia difunda malongesha, muine emu wakadileja muenji wa mudimu muzanzamuke. Mu 1945, wakalua tshindondi wa muludiki wa Société Watch Tower ne biâpu bikuabu bia midimu bidi bisuikakaja ku société eu. Pashishe, wakalua muludiki wa Société Watch Tower pafuile muludiki Nathan H. Knorr, mu 1977. Wakashala pa mudimu eu too ne ku dituku dia lufu luende. Mu bule bua matuku a muoyo wende, muanetu Franz wakadimuena muvua bungi bua Bantemu ba Yehowa buvua ku binunu buende buvula too ne ku miliyo mitue ku inayi ne tshitupa. Wakapeta masanka mavule mu mudimu, bu mudi kuenza miyuku mu mpuilu ya bukua-matunga ne kukumbula filiale ne nzubu mivule ya ba-misionere pabuipi ne yonso pa buloba bujima. Muyuki wa muoyo wende pa buloba mmulonda mu Nsentedi wa mu dia 1 Mai 1987.

Mu dimue dia 28 Décembre 1992, kuakenjibua muyuki wa dijikangana nawu mu Nzubu wa Bukalenge wa Betele wa ku Brooklyn. Muanetu Albert Schroeder, muena mu Kasumbu kaludiki wakenza muyuki wa musangelu ne udi ukolesha ku muoyo. Mêku a Betele wa ferme de la Watchtower, wa ferme de Patterson, wa ferme de la Montagne ne wa ferme du Royaume, pamue ne dîku dia Betele wa filiale wa Canada, bakalonda muanda eu ku nshinga.

Buonso buabo, ne nangananga aba bavua benza nende mudimu pamue, nebanyingalale bikole bua muanetu Franz. Uvua mutabaledianganyi ne muena kuditeka pa muaba wa bakuabo, muena mêyi a kukankamija ne muena lutulu kudi aba buonso bavua benza nende mudimu ne baya pamue nende ku ngendu. Nanku, balunda bende mu ditabuja bavua baleja bua bualu buende mmuenenu udibo bumvuije mu Ebelu 13:7 ne: “Nuvuluke aba badi ku mutu kuenu, bavua banumanyishe dîyi dia Nzambi, ne, pa kutangila masanka apetelebo mu nsombelu wabo, nuidikije ditabuja diabo.”

Mu dia 30 Décembre 1992, muanetu Milton G. Henschel wakasungudibua bua kupingana pa muaba wa muanetu Franz bu muludiki muitanu wa Société.

[Bimfuanyi mu mabeji 31, 32]

Frederick W. Franz mu 1913

Ku imprimerie wa Société, Myrtle Avenue, mu 1920

Pamue ne Nathan H. Knorr ku Yankee Stadium, mu 1953