Neubusumbe ku mushinga kayi?

UDIKU mumanye tshintu kampanda tshidi ne mushinga mukole menemene tshidi mua kukufikisha ku dijimija bionso biudi nabi bua wewe kutshipeta anyi? Ke muvuabi bua Yezu, ne wakayukidila balongi bende pa bualu ebu.

Wakamba ne: “Bukalenge bua mu diulu budi kabidi bu ngenda-mushinga muena-ngendu udi ukeba mibele milenga. Papeteleye mubele wa mushinga mukole, wakaya kupangisha diakamue bionso bivuaye nabi ne wakawusumba.”​—Matayi 13:45, 46.

Ngenda-mushinga eu uvua mudiakaje bua kulekela bionso bivuaye nabi bua kupetaye “mubele,” mbuena kuamba ne: Bukalenge bua Nzambi. Bua tshinyi nanku? Bualu kakuena tshintu nansha tshimue tshidi tshiakanangane nabu. Bukalenge bua Nzambi nebujikije ntatu idi muntu kayi mukumbane bua kujikija. Tshilejilu: mvita, nzala, dibunda bibawu ne dikengeshangana. (Musambu wa 72:4-8, 13, 14) Muinshi mua bukokeshi bua Bukelenge, nansha mpekatu, masama ne lufu kabiakuikalaku kabidi. (Buakabuluibua 21:4, 5) Kabiena bikemesha to bua dilomba dibidi dia mu disambila dia Tatu Wetu kuikaladi mushindu’eu: “Bukalenge buebe bulue”!​—Matayi 6:9, 10.

Ntshinyi tshiwafila bua kupeta mabenesha wonso afuma ku Bukalenge ebu? Bushuwa, mabenesha aa kaena kusumba. Kadi, bua kuababidila, udi ne bua kumanya tshidi Bukalenge ebu bumvuija, kubuanyisha amu mudibu, ne kubuteka pa muaba wa kumpala mu nsombelu webe. Udiku mua kuenza nenku anyi? Bible udi ne mamanyisha a mushinga mukole akuambuluisha. Bua tshinyi kubenga kuanyisha bua Bantemu ba Yehowa bakuambuluishe bua kumanya Bukalenge bua Nzambi ne bua kumanya mushindu uudi mua kupetelaku disanka bituadijile ku mpindieu?