Katuikadi ne mmuenenu wa didibandisha!

Lusumuinu kampanda lua meji lua mu Bible ludi luamba ne: “Eu yonso udi utamba kubandisha tshiibi tshiende udi udikebela kabutu.” (Nsumuinu 17:19) Bua tshinyi mbibi bua kutamba kubandisha tshiibi? Ne ndungenyi kayi lua nshindamenu ludi mu lusumuinu elu?

MU BIKONDO bia kale, bivua bu tshilele bua kumona bantu ne tusumbu tua bivi babandi ba pa tubalu. Ku misoko, nzubu ivua kayiyi mikubibue ivua mua kubueja bivi. Bua kudikuba ku bivi, bamue bena kantu ku bianza bavua biibaka tshimana ne tshiibi tshia pa buatshi. Tshimana tshivua tshile, kadi tshiibi tshîpi tshiotshi. Bushuwa, bimue kabivua bipita nansha pa bule bua metre umue (kadi bikal’anu panshipanshi kakuyi mushindu wa mubandi wa pa kabalu kubuela). Aba bavua kabayi benza nunku, bavua badibueja mu njiwu ya kumona babandi ba pa tubalu babuela ne bapawula bintu biabu.

Mu bimenga, biibi bia mpangu ya nzubu bivua bîpi ne kabiyi bilenga kuisu, kabiyi bilejaku nansha kakese bubanji buvua mua kuikala mu lubanza. Kadi, ku Perse, amu bana ba bakalenge ke bavua ne bukenji bua kuenza biibi bile. Bantu patupu bavua bidikija kuenza nunku bavua badibueja mu njiwu buobo bine. Eu yonso uvua wenza tshiibi tshitumbuke uvua udianyika ku buivi, bualu uvua uleja bubanji buende patoke.

Nenku, Nsumuinu 17:19 udi uleja se: aba badi babandisha biibi biabu bikole badi badikebela kabutu, bualu badi baditeka ku mutu kua tshidibo menemene. Lusumuinu elu luvua kabidi mua kufunkuna mukana mudi, anu bu tshiibi, mudibandisha pa kupatula miaku ya lutambishi ne tshikisu. Miaku ya mushindu’eu idi isonsola matandu ne ndekelu wa bionso ifikisha badibandishi ku kabutu. Mmushindu kayipu udibi bia meji bua kubenga kuikala ne mmuenenu wa didibandisha!

[Mêyi a dianyisha bua tshimfuanyi mu dibeji 30]

La Palestine, le Sinaï et l’Egypte pittoresques (angl.), Volime wa mukanda 1, kudi Colonel Wilson (1881)