Nkonko ya babadi

Bantu badi kabayi bitaba buena-nkristo bulelela lelu’eu ne bafua kumpala kua ntuadijilu wa dikenga dinene nebabiishibue ku lufu anyi?

Bidi bimpe bua tuetu buonso kutantamena ditetshibua dia kuditeka bu balumbuluishi ne kuitaba se: ndekelu wa bionso, anu dilumbuluisha dia Nzambi dienza ku butuangaji bua Yezu Kristo ke didi ne mushinga. (Yone 5:22; Bienzedi 10:42; 2 Timote 4:1) Kadi, Mifundu idi ifila mamanyisha adi ambuluisha bu diandamuna ku lukonko elu.

Bumanyishi bua lumu luimpe lua Bukalenge bua Nzambi pa buloba bujima ntshitupa tshinene tshia ‘tshimanyinu tshia dikalaku dia Yezu.’ Tshimanyinu etshi ntshimueneke patoke ku ntuadijilu wa siekele eu. Ku mudimu wa bumanyishi, bantu ba matunga wonso mbatapuludibue mu dikumbana dia tshimfuanyi tshia “mikoko” ne “bibujibuji” tshivua Yezu mumanyishe. Pajika mudimu eu wa dimanyisha ne ditapulula, “dikenga dinene” nedituishe bulongolodi ebu bua malu bubi ku ndekelu.​—Matayi 24:3, 21, 22; 25:31-46.

Yehowa pamue ne Muanende, ke bashindika bikala muntu udi kayi wanyisha mukenji wa Bukalenge ne ufua kumpala kua dibudika dia dikenga dinene ne bua kutekibua ku luseke lua bibujibuji. Yezu wakamba ne: mbuji “neyiye mu kabutu ka kashidi.” Nenku, tudi mua kufila nkomenu wa se: aba badi Nzambi wangata bu bibujibuji kabakubiishibua ku lufu nansha. Nebapete dilumbuluisha dia muomumue ne dia bantu “bapeta dinyoka dia bulumbuluishi dia kabutu ka kashidi” tshikondo tshia dikenga dinene.​—2 Tesalonike 1:9.

Kadi, netuambe tshinyi bua aba badi bamueneka bu bavua kabayi bapete dimanya dikumbane dia mukenji wa Bukalenge mushindu wa kumonabo mua kuenza disungula dia meji bua bulelela anyi disungula dibengangane ne bulelela bangabanga ne badi bafua mu “matuku aa a ku nshikidilu”?​—2 Timote 3:1.

Bavule ba ku aba badi bafua patshidi mudimu wa bumanyishi wenda wenjibua, kumpala kua dikenga dinene, nebabiishibue ku lufu kabiyi mpata. Ke tshidi Buakabuluibua 6:7, 8 uleja patoke pa bidi bitangila lubilu lua babandi ba pa tubalu ba mu tshimfuanyi. Bantu bavule mbafue ku mvita, tshiyole ne bipupu bishipi. Bu mudi “Hadès” ke udi ulomba bantu aba bashipa kudi “Lufu,” nebabiishibue mu Bukokeshi bua Kristo bua bidimu tshinunu, tshikondo tshiapingaja Hadès bafue badi munda muende. (Buakabuluibua 20:13) Imue misangu, bungi kampanda bua ku aba babiishibua ku lufu nebikale bapete dimanya dia Bukalenge kumpala kua kufuabo.

Ndisanka kayipu bu mudi Yezu kayi mupeshe bantu bukenji bua kujingulula eu udi mufuane tshibujibuji ne eu udi mufuane mukoko! Bantu bapange bupuangane kabena mua kupima biakane mushindu uvua muntu kampanda peshi kansanga mupete mushindu wa kumvua ne kuanyisha lumu luimpe. Tudiku mua kujingulula tshivua ngikadilu wa mutshima wende peshi kumanya né uvua munange menemene buakane anyi? Tudiku mua kumanya buenzeji buvua nabu dîku diende ne bitendelelu kudiye pakasankidilaye bulelela anyi? Tòo, nansha kakese. Kadi, tudi mua kuikala ne dishindika dia se: Yehowa Nzambi ne Yezu Kristo badi mua kupima nsombelu ya mushindu’eu, ne kuenza malumbuluisha adi mapuangane, makane ne malelela.​—Dutelonome 32:4; Yeshayi 11:1-5.

Pa nanku, katuena ne kabingila nansha kamue bua kukeba mua kumanya eu wa munkatshi mua aba badi bafua matuku adi panshi aa wabiishibua anyi wabenga kubiishibua. (Fuanyikija ne Luka 12:13, 14.) Bidi bia meji bua tuetu kuindila mapangadika a Balumbuluishi bakane, Yehowa Nzambi ne Yezu Kristo. Abi nebitupeshe ditalala divule dia mu tshieledi tshia lungenyi bu mutudi basadidi ba Yehowa. Abi nebituambuluishe kabidi bua kutabalela menemene mudimu mutupesha bua kuenza​—wa ‘kuya ne kuvuija balongi bantu ba matunga wonso, kubalongesha mua kutumikila malu wonso avua Yezu mutume dîyi bu kuenza.’​—Matayi 28:19, 20.

[Mêyi a dianyisha bua tshimfuanyi mu dibeji 31]

Leicester sheep, Meyers