Bua tshinyi “kuya kudi kankenene”?

MUENA meji Solomo, mukalenge wa Izalele wa kale, wakafila mubelu eu: “Ndaku kudi kankenene.” Bua tshinyi wakamba nunku? Ntshinyi tshitudi mua kulonga kudi tunkenene?

Solomo wakasakidila ne: “Ukonkonone bienzedi bia [kankenene] ne ulue muena meji. Nansha mudiku kakayi ne mukatuminyi wa dîyi, peshi eu udi ukatangila anyi mfumu’aku, kadi kalongolola biakudia biaku mu muvu wa luya; kadi kasangisha biakudia biaku mu tshikondo tshia dinowa.” (Nsumuinu 6:6-8) Miaku eyi miamba ku kale idi ileja malelela majandula matuku adi panshi aa kudi bashikuluji ba mianda idi itangila mitshi, nyama anyi biishi.

Agur, mufundi wa nsumuinu udi uleja se: tunkenene tudi ne “meji ku tshingenyingenyi tshiatu.” (Nsumuinu 30:24, 25) Bushuwa, meji atu kaena afuma ku ngenyi yatu, apo adi afuma ku tshingenyingenyi tshidi Mufuki mutupeshe. Tshilejilu, ku tshingenyingenyi etshi, tunkenene tudi tusangisha biakudia biatu mu tshikondo tshikumbanyine.

Tunkenene tudi tuenza bionso mu bulongame mushindu wa dikema. Tudi tueleshangana diboko, tutabalela bena mudimu natu, tukuatshisha etu tudi tutapika mputa anyi tudi tupungila bua kupingana ku matubu. Ku tshingenyingenyi tshiatu, tudi tulongolola biakudia bua matuku atshilualua ne tuenza muatu muonso bua kukumbaja midimu yatu.

Ngikadilu wa tunkenene wa ku tshifukilu udi utulongesha se: bantu badi ne bua kudianjila kudilongolola ne kuikala benji ba mudimu ba dilambu. Ke tshidi tshikengela kuenza mu ekole, mu midimu ya ku mubidi ne midimu ya mu nyuma. Amu mudi kankenene kalabula masanka ku tshisumi tshiaku, nenku Nzambi mmusue bua bantu ‘bapetele masanka ku mudimu wabu wonso mukole.’ (Muambi 3:13, 22; 5:18) Amu bu tunkenene tuenji tua mudimu tua dilambu, bena nkristo balelela mbena bivule bia kuenza dituku dionso. Badi ‘benza ne makanda abu wonso tshionso tshidi bianza biabu bipeta bua kuenza,’ ki mbualu badi babatangila anyi babalombola, kadi bualu mbena bululame, kabidi mbasue kuikala benji ba mudimu ba tshisumi ne bapatudi ba bipeta bilenga.​—Muambi 9:10; fuanyikija ne Nsumuinu 6:9-11; utangile kabidi Tito 2:9, 10.

Netuikale ne disanka menemene “bituaya kudi kankenene” ne bituatumikila bitudi tulongelaku. Ne netupete disanka dipite makuabu bunene bituenza kakuyi njingakanyi disua dia Yehowa Nzambi anu mudidi disokolola mu Bible.