Dianyisha bua dikuatshisha dia lulamatu dia kudi Yehowa

MUYUKI MULONDA KUDI SHARON GASKINS

MPARADIZU pa buloba! Mvua ndimona ngenda ntumpika eku ne kuaka mu mpata, ngenda ngipata bibayibayi, nnaya ne tuana tua nyama wa ntambue. Bivua bimueneka bimpe bitambe! Kadi, mvua ne mpata. Ditekemena dianyi divua misangu mivule dishila dipanga ditekemena muaba!

Amu bu mundi tshiyi mua kubipua muoyo, nkuasa wa bíbómbó ke uvu’amu wanyi mulunda wa matuku wonso. Katshia ku buana buanyi, disama dia tuneke diakanjimijila masanka a ku buana. Pavua bana bakuabo banyemakana bavuale bisabata bia tudundu muinshi peshi banaya ne makalu, kadi meme, mvu’amu nshabakana panshi nkayanyi, tshiyi nkumbana nansha mua kuenda. Nenku, pavua mamu uya nanyi kudi buondopianganyi ba ka-bukulu, umue kunyima kua mukuabo, tuvua batekemena menemene bua kuenzeke tshishima kampanda. Kadi, musangu wonso, uvu’amu upingana nanyi musombesha mu nkuasa wanyi wa bíbómbó. Bivua bintekesha ku muoyo, kadi, mmushindu kayipu uvuabi bimutonda!

Bu muvuaye ukeba ditekemena dilelela, mamu wakatuadija kulonga Bible pamue ne Bantemu ba Yehowa ku ntuadijilu wa tshidimu tshia 1964. Apo, ntshivua ne bidimu bitue ku bisambombo ne tshitupa. Tuvua tukonkonona Mifundu ku diambuluisha dia mukanda wa Du paradis perdu au paradis reconquis.

Ngakakema bikole pa kumanya se: mparadizu mulengele uvuaku pa buloba. Diakabi, mulume wa kumpala, Adama, kavua mumutabalele nansha; kadi, mvua njinga kuikala pabuipi ne Nzambi, amu bu muvuabi bua Adama. Kudia malanda ne Nzambi kuvua mua kuikala tshinyi? Peshi, kuikala ne muoyo patshivua Muanende pa buloba? Mvua njinga ne muoyo mujima bua kuikala mu mparadizu mu matuku atshilualua. Nansha muntshivua ne bidimu bipuekele, biakamueneka patoke tuvua bamane kupeta bulelela!

Mamu wakatuadija kuya ne dîku dietu mu Nzubu wa Bukalenge wa Bantemu ba Yehowa. Bisangilu biabo bivua bishilangane bikole ne bituvua tumona mu ekleziya!

Bivua bikole bua mamu kuya netu mu Nzubu wa Bukalenge. Kunyima kuanyi, kuvua bana bakuabo basatu, kabidi katuvua ne vwatire to. Tuvua tuangata taksi pavua mamu muikale ne mushindu wa kumufuta. Ntshitu’amu mvuluka mushindu wakasumpakanaye dia lumingu kampanda. Taksi nansha umue kavua umueneka. Pashishe, amu bu mu tshintuluntulu, muntu kampanda wakalua ne kaminyo kende e kutuambula. Nansha mutuvua bafike kunyima kua dîba mu tshisangilu, kadi, tuakafikamu. Ndianyisha kayipu dituvua nadi bua Yehowa!

Mpindieu, bana betu ba balume ne bana betu ba bakaji basuibue ba mu nyuma bavua ne vwatire bavua bakombolangana bua kutuambula ne muoyo muimpe. Makankamija a mamu bua kubenga kushala mu bisangilu, amu pikalabi bua disama dikole menemene, akabueja mu tshieledi tshianyi tshitekete tshia lungenyi mushinga wa ‘kudisangisha kuetu kaba kamue.’ (Ebelu 10:24, 25) Musaka ku bivuaye ulonga, mamu wakatshipa muoyo wende kudi Yehowa ne kutambushibua mu 1965.

Mu tshikondo atshi, ntshivua mutambe kupuekela bua kubabidila bisangilu menemene. Mu tshisumbu tshia Cypress Hills, ku Brooklyn, New York, muvua batoke ba Mputu, bafike, bena Espagne ne bana betu ba balume ne ba bakaji bavua bafumine ku miaba mikuabo, bavua batendelela Yehowa diapa ku diapa. Bivua biumvuike menemene bua bantu batshinyi ba Nzambi kusombabo mu buena-muntu bulelela.​—Musambu wa 133:1.

Mamu wakandongesha mua kudilongolola bua kufila mumvuija mu bisangilu. Kakuvua tshipumbishi nansha tshimue mu lungenyi, kadi, amu ku mubidi. Difubidila dia mijilu mu bongo didi dienza bilema bipepele, kadi, bidi bipatuisha bipeta bibi bitambe. Bivua binkolele, too ne lelu’eu, bua kuela kashonyi kalulame kuinshi kua mandamuna mu mikanda idi yumvuija Bible. Kadi, ne kudibidija mubidi, ngafiki ku diakaja ngelelu wanyi wa tushonyi.

Tshieledi tshianyi tshia lungenyi tshivua tshisapalala ne ngenyi ya kuamba. Kadi, pamvua mbulula mukana, miaku ivua yimbuelakana. Bivua bikengel’amu bua ndiolole bua mifungu yanyi kayikolakanyi. Mvua kabidi ne bua kudienzeja bua kujukula muaku wonso bua umvuike bimpe. Mmuenenu wa diteketa mu maboko uvua wamba kundia pamvua mmona se: miaku ki mmijukula bu muvuabi bikengedibua peshi pamvua mmona se: bantu ki mbumvue bimpe tshimvua nsua kuamba. Nansha bikale nanku, pakalongabo mua kummanya, bana betu ba balume ne ba bakaji ba mu tshisumbu bakafika too ne ku dituadija kujingulula bimvua ngamba. Kadi, kukadi matuku, lutatu lutshidi’amu nanyi.

Ngondo isambombo ya dibungama

Pangakakumbaja bidimu muanda-mukulu, ngakapetangana ne nsombelu mukole wakanenga ngondo isambombo ne bipeta bitshidi bitungunuka too ne lelu. Nansha mumvua ngondopibua ku mubidi, diondopibua pa kutumika ne nsombelu wa bamue ne wa bakuabo bua kukepesha tubazubazu ne malongesha a dijikula dilenga dia miaku, ba-minganga bakantuma mu nzubu wa dikoleshisha bidimba ku West Haverstraw, New York. Meme pamue ne mamu, bivua bitutonda bikole ku muoyo. Bidimu bivule kumpala, pavua ba-minganga bantête ne bapatule bipeta bibi, bamba mumvua tshileyileyi, mamu wakabambila ne: kavua mua kunshiya nansha kakese. Bualu, nansha dipanga kumonangana dia tshikondo tshikese divua mua kumutonda bikole. Kadi, wakafika ku dijingulula se: bua meme kulubuluka bimpe kakuyi diambuluisha diende anyi dia tatu, abi bivua bikengela bua tshikadi amu mutekemene kudibo, ku mubidi pikalaku mushindu.

Nzubu ivua milenga, kadi, mvua ndiumvua mulekelela. Binsonji ne difua tshiji binekesha kabivua bisokoka kantu nansha kamue pa mmuenenu wanyi bua muaba eu. Mu mpukapuka, baledi banyi bavu’amu mua kuenza luendu lua mêba asatu ku katuba bua kulua kummona, nangananga pavua mamu ne diimi dia muanende muitanu. Biakandubakaja bikole pakavuabo ne bua kualukila, ke pakamuambila munganga bua kuikala upitshisha matuku mavule kumpala kua kuenza dikumbula dikuabo. Amu misangu ibidi patupu ke yakampeshabo dianyisha dia kuya ku nzubu kuetu.

Mishindu eyi ya luondopo yakandongesha mua kuenda ku diambuluisha dia biamu bidi bilulamija bukua-mifuba ne dia mikombo ya bíbómbó ya bujitu ya tshiamu tshia plomb. Mvua mmona bu ivua ne bujitu bua kilo tshinunu. Kadi, bujitu ebu buvua bungambuluisha bua kushala tshiyi ntenkakana peshi bua tshivu kukuluka. Ke ntuadijilu wa mulongolongo wa biidia bivua ne bua kumfikisha ku dienda tshiyi ne biamu bia bíbómbó.

Kukosa anyi kukeka biakudia, kuasa mbota​—tuambe ne: midimu yonso ivua ikengela kutumika ne minu—​kuvua kunkolele, anyi kabivua mua kuenzeka nansha kakese. Kadi, mu mushindu kampanda peshi kansanga, ngakalonga mua kudia ne mua kudivuadika nkayanyi. Ke tshiakangambuluisha pashishe mu mudimu wanyi wa Nzambi.

Ngakatungunuka ne kudibidija nenku mu dipingana dianyi ku nzubu. Mamu uvua ungenzeja bua kutumikila makokeshi anyi mapiamapia. Bivua mvita milelela ya mundamunda, bualu, nansha mumvua ne dijinga dia kudienzela bintu kampanda, bivua binkolele bua kubikumbaja; bivua bindia dîba ne bingenza dipungi. Elayibi meji kakese, mvua ne bua kupitshisha mêba abidi amu bua kuvuala nkayaku bua kuya mu bisangilu!

Patuakaya kusombela ku nzubu uvua mutangilangane ne Nzubu wa Bukalenge, mvua ndiyilaku nkayanyi, ku makasa. Bivua ditshimuna dinene!

Dituku ditambe bulenga dia muoyo wanyi

Mamu uvua utabalela bua dîku dietu kupetadi biakudia biakanyine bia mu nyuma. Uvua ulonga nanyi Bible ne ushala muindile bua se: mbale nimero yonso wa bibejibeji bietu, Tshibumba tshia Nsentedi ne Réveillez-vous! Bivua bikengela kulongolola bisangilu ne kubuelamu. Nansha muvua tshieledi tshianyi tshia lungenyi ne mutshima wanyi bimina dimanya edi ne lukuka luonso, tshivua ngela meji menemene bua kuditshipa kudi Yehowa peshi bua kuleja patoke mutshipu eu pa kutambushibua to; buanyi meme, kuenza nenku kuvua malu a kuteka pa muaba muibidi. Mamu wakangambuluisha bua kujingulula se: nansha mumvua mulema, mvu’amu ne bua kudiambuila bujitu bua mu nyuma ku mesu kua Nzambi. Tshivua mua kutekemena bua kubuela mu bulongolodi bupiabupia amu bua madikolela a mamu, mbuelamu bu mutembelele ku bilamba biende nansha.

Mvua munange Nzambi, kadi, ngikadilu wanyi wa ku mubidi uvua muntapulule, bualu mvua mushilangane ne bakuabo​—mbualu buvua butonda bikole bua nsongakaji. Bivua bikole bua kuanyisha bukese bua anyi makokeshi. Misangu mivule, mvua mfua tshiji, ne bivua bikengela kuluisha mmuenenu eu kumpala kua meme kutambushibua. (Galatia 5:19, 20) Kadi, bingavua kupangila bua kuakaja nsombelu wanyi bilondeshile mutshipu wanyi kudi Yehowa?

Ku dilomba dia mamu, mukulu kampanda wa mu tshisumbu wakavua kuyukila nanyi. Wakatela lukonko luvua muprofete Elie muele bena Izalele lua ne: “Nudi nuenda nuzobela pankatshi pa nseke ibidi musangu bule munyi?” (1 Bakalenge 18:21, Mukanda wa Nzambi) Mbimueneke patoke se: dielakana dianyi kadivua disankisha Yehowa nansha.

Ngakatabuluka mu nyuma; meme kulomba Yehowa bikole mu disambila bua kungambuluishaye ne kumulondela dipangadika dianyi dia kumulambula muoyo wanyi. Muanetu kampanda wa bakaji wa mu tshisumbu wakalonga nanyi Bible. Uvua ne bidimu bishadile kundi ne uvua mufuishe mamuende patshivuaye muana mupuekele. Nansha bikale nanku, uvua muditshipe kudi Nzambi patshivuaye mutambe kupuekela menemene.

Ngakangata dipangadika ne mvula 17. Mvua njinga kusadila Yehowa muanyi muonso. Meme kutambushibua mu dia 9 Août 1974; ke dituku ditambe bulenga dia muoyo wanyi.

Masanka mu mudimu

Kudisangisha kuanyi mu mudimu wa buambi kuakamuenesha bipumbishi bikole bitambe amu bu mukuna wa kabandi banyane. Tshivua ne bualu ntshia se: bateleji bangumvue. Mvua ngakula mu mushindu wa kujukula miaku muanyi muonso. Pashishe, pavuabi bikengedibua, muanetu umvua mupatuke nende mu buambi uvua wambuluila muyukidijanganyi netu mumvuija anyi. Bamue bavua babenga kuitaba, bamona ne: mvua muntu uvua Bantemu batumika nende bua kukemesha bantu. Kadi, kulongesha mbukenji buanyi ne dijinga dianyi dilelela.

Mvua mpungila bua kuenda ku nzubu ne ku nzubu, nansha mikale ya tshibambalu tshimu’epele. Nzubu mivule ya mu teritware wetu idi ne bibandilu, ke tshivua tshimpubisha bua kufikaku. Mu muvu wa hiver, dimia dikuatakane panshi mu misesu bu dibue dia mashika kadivua dimpetesha mushindu nansha mukese wa kuenza mudimu wa ku nzubu ne ku nzubu. (Bienzedi 20:20) Kadi, bana betu bakangambuluisha bikole menemene, ne ku diambuluisha dia Yehowa, ndi ne nkuasa wa bíbómbó muasa motere, ke tshidi tshitamba kuntekeshila mudimu wanyi wa buambi.

Pashishe, ngakatuadija kufila bumanyishi pa kufundila bantu mikanda. Kakuvua bualu bua kufunda ku tshianza, bualu bantu bavule kabavua mua kubala tshianza tshianyi bimpe to. Nenku, mashinyi a mikanda a nzembu ke akalua mamfundidi a mikanda. Ndi nkuma ku tshiamu bitekete bitekete amu bua dizakala dia bianza bianyi. Bidi bikengela tshipungu bule kampanda bua kuanji kutentekela dileta kansanga diambedi ne kudikuma. Ndi mua kupitshisha dîba dijima amu bua kufunda mu luseke lumue lua dibeji.

Nansha mundi tshiyi ne bukole bua kuimana mutantshi mule tshiyi mutekuke, ku musangu ne ku musangu, ntu ngenza mudimu wa bumpanda-njila buambuluishi, mpitshisha mêba 60 ku ngondo anyi mpitshisha apo mu buambi. Abi bidi bikengela programme muimpe, madikolela a pa mutu ne dikuatshisha dia balunda banyi bena nkristo. Mmuenenu wabo bua mudimu wa bumpanda-njila udi unkankamija. Mamu udi pende ufila tshilejilu tshimpe: uvua pende mpanda-njila wa pa tshibidilu peshi muambuluishi, nansha muvuaku matetshibua, mubidi mubi ne lutatu lua kukolesha, yeye nkayende, bana muanda-mutekete mu dîku dipanduluke mu mianda ya malu a Nzambi.

Ngavu mudikadile

Pangakakumbaja bidimu 24, ngakangata dipangadika dia kudisombela nkayanyi. Kuya kubanza ku wanyi nzubu uvua mu kartié ka Bensonhurst ku Brooklyn, kuvua bu dibenesha buanyi meme. Tshisumbu tshia Marlboro tshivua bu dîku didi mu buobumue menemene. Ditabuja dianyi diakatamba kukoleshibua pangakafikamu. Bana betu bavua kungangata bua kuya mu bisangilu bionso, pabi, kuvu’amu vwatire ibidi peshi isatu mu tshisumbu. Kadi, tshiakanenga mu muaba eu to.

Bu mumvua ndiumvua bu muntu mupangile bionso, ngakapingana tshiakabidi mu dîku dietu ne kukengakana ne disama dikole dia dépression diakanenga bidimu bisatu. Meme kutuadija kufua kabidi biji bikole. Pashishe, meme kupeta meji a kudishipa ne kukeba misangu mivule bua kukumbaja bualu ebu. Lufu luvua luluijakane amu bu mvula mukunge kuulu. Kadi, meme kueyemena Nzambi ne kumulaya bua kuleja dianyisha bua dipa dia muoyo didiye mumpeshe. Bakulu bakankolesha ne kumpesha mibelu. Kusangisha ku masambila, kudilongela kua pa nkayanyi, lutulu lua bena dîku dietu ne diambuluisha dia ba-minganga ba masama a lungenyi, dikuatshisha edi diakapingaja bulongame mu meji anyi.

Ku diambuluisha dia Tshibumba tshia Nsentedi, ne diengeleka, Yehowa mmutumvuije tshidi disama edi dikole dia dépression. Eyowa, udi ukuba tshisamba tshiende ne mmumanye majinga etu. (1 Petelo 5:6, 7) Ku kakese ku kakese, disama dia dépression anyi tshinyongopelu diakatuya. Lelu’eu, kunyima kua bidimu bipite pa dikumi, Yehowa utshidi ungambuluisha matuku wonso bua kutantamena majinga andi mupangile kukumbaja ne disama dia dépression. Imue misangu, mmuenenu wa se: tshiena ne mushinga nansha mukese ku bantu utu wamba kundia mujima. Nansha bikale nanku, masambila, dilonga dia Bible ne dîku dianyi mbintu bia mushinga mukole bidi bingambuluisha.

Kunyima kua mumane kukeba kupanga nzubu mukuabo, ne muoyo mujoboke, ngakangata dipangadika dia kusomba pamue ne dîku dianyi bua matuku anyi wonso a muoyo. Pashishe, Yehowa wakandamuna ku masambila anyi. Kuvua nzubu wa munda mutupu mu kartié ka Bedford-Stuyvesant ku Brooklyn. Ku ndekelu wa muvu wa été mu 1984 ke mungakabuelaku, ne ntshidiku too ne lelu.

Bena mu tshisumbu tshilenga tshia Lafayette bavua ne musangelu bua kuluabo kungambula ku mashinyi bua kubuela mu bisangilu. Ntshidi mubivuluke bienz’amu bu dituku dishale ke dimvua mubuele mu dilonga dia mukanda bua musangu wa kumpala. Divua dienzekela ku etaje muisatu, ne kakuvua tshibandilu tshia nzembu! Amu ku diambuluisha dia Yehowa ke kumvua mbanda ne ntuluka mu bibandilu. Kunyima pashishe, bakandombola ku dilonga dia mukanda divua dienzekela mu muaba mulenga. Pashishe, Yehowa wakambenesha, bualu, ndi mpindieu ne disanka dia kuikala ne dilonga dia mukanda mu nzubu muanyi.

Mmuenenu mulenga bua mudimu wa bumpanda-njila udi umueneka kuonso mu tshisumbu etshi. Pangakafikamu, muvua bampanda-njila batue ku makumi-asatu, ne bamue bakangambula mu mapa abo. Musangelu wa mushindu’eu wakansaka bua kuikala mpanda-njila muambuluishi ku musangu ne ku musangu.

Mu Avril 1990, tshisumbu tshia Lafayette ne tshia Pratt biakiibaka Nzubu wa Bukalenge amu kuinshi kua musesu mumvua musombele. Bivua bienzeke mu tshikondo tshiakane, bualu, bu muvua makanda anyi a mubidi enda akepela, bua meme kuenda bikadi bualu bukole. Kadi, ne dikalu dia bíbómbó dia motere pamue ne diambuluisha dia bana betu ba balume ne ba bakaji, ndi ne disanka dia kuya mu bisangilu ne kupingana. Eyowa, ndi ne dianyisha diondoke bua diambuluisha edi diuwule tente ne dinanga!

Dianyisha bua diambuluisha dia Nzambi

Nansha mudi mikolo yanyi itenkakana, mutshima wanyi kawena utenkakana. Bushuwa, kuikala ne dimanya dimpe kudi kupepeja nsombelu nanku nanku, kadi, nangananga Nzambi ke uvua mungambuluishe. Tshivua mumanye kuvua biakudia bianyi mua kufumina, kadi, Yehowa wakangambuluisha ne mmudileja muikale Mumpeshi wa bionso ne lulamatu. Mêyi aa a Davidi adi ne mushinga mutambe menemene kundi: “Mvua nsongalume, ngakulakaji panyi, kadi, tshiena mumone muntu muakane mulekelela menemene, nansha ndelanganyi yende ilombangana diampa.”​—Musambu wa 37:23-25.

Misangu ne misangu, Yehowa mmumpeteshe bukole bua kulama mmuenenu wanyi muashila pa Mifundu pa kungambuluisha bua kubenga ditumika ne mashi mu bikondo bia dipandibua. (Bienzedi 15:28, 29) Tatu mmufue matuku adi panshi aa. Dijimija muntu umvua munange bikole diakansuya bikole ku muoyo. Amu bukole budi bufumina kudi Yehowa ke buakangambuluisha bua kutantamena ditetshibua edi, pamue ne makuabo kabidi.

Pamu’apa, makanda anyi a mubidi neatungunuke ne kuteketa, kadi, ditekemena dianyi kudi Nzambi ne malanda andi mudie nende ke wanyi ngabu. Ndisanka kayipu dindi nadi bua kusanganyibua mu tshisamba tshia Yehowa ne kupeta diambuluisha diende dia lulamatu!