Bamanyishi ba Bukalenge badi balonda

Wapetshi tshipatshila tshia muoyo wende

YEZU udi wamba ne: mmumanye mikoko yende. (Yone 10:14) Bikala muntu ne muoyo muimpe ne munange ditalala ne buakane, muine eu neakokibue kudi balongi ba Yezu. Muntu eu neapete tshipatshila tshia muoyo, amu muakenzekelabi mukaji muena ditunga dia Belgique. Muyuki wende ngowu’eu:

“Pakakokola Bantemu ba Yehowa ku tshiibi tshianyi, mvua ne tunyinganyinga tukole ne ngela meji bua kutua tshisala ku muoyo wanyi. Ngakanyisha biakangambilabu kudi Bantemu pa bidi bitangila mushindu wajika ntatu idi nayi bena mu bulongolodi ebu budi busama, kadi tshiakanyisha lungenyi lua se: tshilumbu etshi tshivua patshi tshitangila Nzambi nansha. Bidimu muanda-mukulu kumpala, nkavua mumane kulekela kubuela mu ekleziya, bualu mvua nkina buena-mpala-ibidi buvuamu. Kadi, ngakasunguluja tshivuma tshia bulelela mu biakangambila Bantemu ba Yehowa ne ngakafika ku dimanya se: kakuyi diambuluisha dia kudi Nzambi, mbikole bua kuikala ne muoyo.

“Diakabi, kunyima kua makumbula makese, ngakalekela kupetangana ne Bantemu. Ngakajimija ditekemena. Mvua nnua mabuki a makanya abidi ku dituku ne meme kutuadija kunua diamba. Bu mumvua ne dijinga dia kuyukila ne kaku mulume ukavua mumane kufua, ngakaditua mu spiritisme. Mbuowa kayipu buvua bunkuata pamvua ntatshishibua bua bualu ebu butuku kudi ba-demon bavua banduisha! Ditatshisha edi diakanenga ngondo mivule. Dilolo dionso, mvua ngumvua buowa bua kuikala nkayanyi.

“Pashishe, dituku kampanda, meme kuya mu diendakana, meme kupitshila mu njila mukuabo umvua tshiyi nyiila pa tshibidilu, ke meme kufika pa muaba kampanda uvuabo biibaka nzubu. Musumba munene wa bantu bavua muaba eu wakankemesha. Nsemena pabuipi, meme kumona se: Bantemu ba Yehowa ke bavua biibaka Nzubu wa Bukalenge. Ke meme kuvuluka makumbula abo ku nzubu kuanyi, ne meme kuela meji se: bidi mua kuikala bimpe bitambe bu bantu buonso mua kuikala ne nsombelu wa mushindu’eu.

“Mvua njinga ne muoyo umue bua Bantemu kualukilabu tshiakabidi kuanyi, nenku, ngakayukidilangana ne bamue ba ku aba bavua benza mudimu ku nzubu awu. Meme kusambila Nzambi, ne matuku dikumi pashishe, muntu umvua mupetangane nende bua musangu wa kumpala ke uvua ku tshiibi tshianyi. Kundombaye bua kutungunuka ne dilonga dia Bible, meme kuanyisha ne disanka. Diakamue, wakambikila bua kubuela mu bisangilu bivua bienzekela mu Nzubu wa Bukalenge, meme panyi kuandamuna bimpe ku dibikila edi. Tshivua muanji kumona bia mushindu’eu nansha! Katshia ku kale, mvua nkeba bantu badi banangangane ne bikale ne disanka. Ndekelu wa bionso, ngafiki ku dibapeta!

“Pashishe, ngakabuela mu bisangilu bionso. Kunyima kua mbingu mitue ku isatu, ngakalekela tshilele tshibi tshia kunua makanya. Meme kuimansha mikanda yanyi ya majimbu a dilonga dia mitoto ne tusete tuanyi tua misambu ivua itumbisha Satana, ne meme kujingulula se: ba-demon bavua benda bajimija bukole buabu kundi. Meme kuakakaja nsombelu wanyi bilondeshile meyi-maludiki adi Yehowa utupesha mu Bible, ne ngondo isatu pashishe, meme kutuadija kumanyisha lumu luimpe lua Bukalenge. Kunyima kua ngondo mikuabu isatu, ngakatambushibua. Matuku abidi kunyima kua batismo wanyi, meme kutuadija mudimu wa bumpanda-njila buambuluishi.

“Ndi ngela Yehowa tuasakidila wa manza tente bua bimpe bionso bidiye mungenzele. Mpindieu, muoyo [wanyi] wapetshi tshipatshila. Eyowa, dîna dia Yehowa n’lumbu kundi mupetele tshisokomenu ne bukubi. (Nsumuinu 18:10) Ndi ne mmuenenu wa muomumue ne wa mufundi wa misambu wakafunda mu Musambu wa 84:10 ne: ‘Dituku dimue mu lubanza luebe nditambe tshinunu muaba mukuabu! Ngasungudi bua kuimana ku tshiibi tshia nzubu wa Nzambi wanyi, pamutu pa kuendakana mu ntenta ya bubi.’”

Mukaji eu muena kudipuekesha mu mutshima wapetshi tshipatshila tshia muoyo wende. Tshine etshi ntshiteka kumpala kua aba buonso badi bakeba Yehowa ne muoyo muimpe.